موسمیاتی بدلی ءِ وفاقی وزیر ءَ سرکاری کارندہ آنی سر ءَ زور پر دات کہ آ پیسلہ کنگ ءِ تہ ءَ شواہد ءِ سر ءَ بنیات ءِ رھبند ءَ بہ زور اَنت، پاکستان ایڈمنسٹریٹو اسٹاف کالج  ءَ گوں تران

لاہور۔24اپریل  (اے پی پی): موسمیاتی بدلی ءُ چاگردی ردوم ءِ وفاقی وزیر ڈاکٹر مصدق ملک ءَ سرکاری کارندہ آناں زور پر دات کہ آ پیسلہ کنگ ءِ تہ ءَ شواہد ءِ سر ءَ بنیات ءِ رھبند ءَ بہ زور اَنت ءُ السی وشھالی ءَ را وتی اولی ترجی ءَ بہ کن اَنت، پرچا کہ پاکستان ءِ آیوکیں وھد ءِ جوڑ کنگ ءِ تہ ءَ آھانی کرد سک باز المی اِنت۔ آئی ءَ جمعہ ءِ روچ ءَ نیشنل اسکول آف پبلک پالیسی ءِ چیر دستی ءَ پاکستان ایڈمنسٹریٹو اسٹاف کالج ءَ 124می نیشنل مینجمنٹ کورس ءِ گریجویشن مراگش ءَ ھاسیں مہمان ءِ بستار ءَ گشتانک دیگ ءَ ات۔ ڈاکٹر مصدق ملک ءَ گوشت کہ سول سروس ملک ءِ یک سکیں باصلاحیت ءُ مقابلہ ءِ ادارگ اِنت ایشی ءِ تہ ءَ جتا جتائیں تجربگ ءُ توانائی ءِ واھندیں افسر ھوار اَنت۔ آئی ءَ گوشت کہ گریجویٹ افسر آناں نوں پیسلہ کنگ ءِ موہ رستگ کہ گورننس سسٹم ءُ السی وشھالی ءِ تہ ءَ مزنیں گہتری آرگ بوت کنت۔ آئی ءَ قدرتی آفت آنی وھد ءَ پاکستان ءِ تابکاری ءُ سول سروس ءِ کرد ءِ توسیپ کت ءُ گوشت کہ افسر آناں مشکلیں جاور ھال آنی تہ ءَ ریلیف ءُ ریسکیو ءِ کار آنی تہ ءَ ارزشتی ایں ازمت کتگ۔ آئی ءَ کمیں وسیلگ آنی باوجود نوکیں ٹیکنالوجی ءِ پڑ ءَ پاکستان ءِ دیمروئی ءِ ھم توسیپ کت۔ البت فدرال وزیر ءَ انسانی دیمروئی ءِ شوبگ ءِ تہ ءَ کمیں وانندگی ءِ شرح، ساپیں آپ ءِ دست نہ کپگ ءُ جان سلامتی ءِ نا شریں شاھد آنی سر ءَ نگرانی ءِ درشانی کتگ۔ آئی ءَ اے جیڈھ آناں نا منّگ لیک اِتگ ءُ زوتیں گامگیج ءِ ضلورت ءِ سر ءَ زور پر داتگ۔ آئی ءَ انتظامی نظام ءِ تہ ءَ کوتاہی آنی نیمگ ءَ دلگوش گور کت ءُ گوشت کہ کارروائی آنی سر ءَ گیش دلگوشی ءِ سبب ءَ ھاسیں منصوبگ آنی تہ ءَ تاخیر ءِ سبب جوڑ بیت۔ آئی ءَ افسر آناں ہدایت کت کہ آ طریقہ کار ءِ سر ءَ آسر آناں اولیت بہ دنت ءُ رائے ءِ بدل ءَ شواہد ءِ بنیاد ءَ پیسلہ بہ کنت۔ آئی ءَ نوکیں ٹیکنالوجی ءِ ارزشت ءِ سر ءَ ھم زور پر دات ءُ افسر آناں پنت ءُ شون کت کہ آ وت ءَ را مصنوعی ذہانت ءَ ھوار نوکیں ٹولز ءَ گوں لیس بہ کن اَنت تانکہ گورننس ءُ پالیسی سازی ءِ عمل ءَ را کارآمد جوڑ بہ کن اَنت۔ آئی ءَ وتی گڈی گشتانک ءِ تہ ءَ افسر آناں پنت ءُ شون کت کہ آ وتی زمہ واری ءَ گوں دلیری، ایمانداری ءُ ذمہ واری ءِ احساس ءَ پیلو بہ کن اَنت ءُ گوشت کہ بامردیں اصلاحات ءُ جوانیں سرکاری ازمت ایوک ءَ ایشانی سروکی ءُ جزم ءِ گوما ممکن اَنت۔ مراگش ءِ گڈ ءَ ڈاکٹر مصدق ملک ءَ سوبمندیں افسراں مبارکی دات ءُ سرٹیفکیٹ بہر ءُ بانگ کت۔ 124 ءِ راجی انتظامی کورس ءَ چہ 46 افسراں گریجویشن کتگ۔ اے موہ ءِ سر ءَ ڈائریکٹر جنرل سول سروسز اکیڈمی و ریکٹر این ایس پی پی فرحان عزیز خواجہ، سابق ریکٹرز اسماعیل قریشی ءُ  خالد محمود  ءِ ھوار افسر آنی کھول ءِ ھم ھوار اتنت۔