پرتشدد سوچ و انتہاپسندانہ بیانیہ تا حوصلہ شکنی کن عملی گام گیج المی ءِ، وزیراعلیٰ بلوچستان میر سرفراز بگٹی

کوئٹہ۔ 23 اپریل (اے پی پی )وزیراعلیٰ بلوچستان میر سرفراز بگٹی صوبہ ٹی راجی کہول آ ودوک آ بیدادی و انتہاپسندانہ رجحان تا گچین توننگ کن اسہ اہم پیش رفت اس کرسا بلوچستان نا اولیکو ریسرچ سینٹر، بلوچستان سینٹر آف ایکسیلنس آن کاؤنٹرنگ وائلنٹ ایکسٹریمزم نا باقاعدہ بناءِ کرے ، بنائی دود اٹی صوبائی وزیر داخلہ میر ضیاء لانگو، اسمبلی نا باسک آک و بڑزکو سرکاری کمامدار و تعلقدار ادارہ غاتا نمائندہ غاک بشخ ہلکر ہراڑے ایڈیشنل چیف سیکرٹری داخلہ محمد حمزہ شفقات سینٹر نا گرج و مسخت ، پٹ وپولی دنگ و آخبت نا گام گیج آتیا سرجمی اٹ حوال تننگا ، داوخت آ وزیراعلیٰ میر سرفراز بگٹی پارے کہ دا سینٹر پٹ وپول نا کمک اٹ ورناتے مون تروک ویل آتے تالان کیک و اوفتا ایسری کن پبی بنداو فراوان کیک، اوپیدوار کرے کہ ورناتے مثبت سرجز آتا کنڈآ اتنگ حکومت نا اولیت ءِ وخت اس کہ پرتشدد سوچ و انتہاپسندانہ بیانی تا حوصلہ شکنی کن عملی گام گیج المی ءِ، وزیراعلیٰ بلوچستان دا اہم گام ءِ عملی دروشم اس تننگ آ صوبائی وزیر داخلہ میر ضیاء اللہ لانگو ، ایڈیشنل چیف سیکرٹری داخلہ محمد حمزہ شفقات و تعلقدار انتظامیہ نا کوشست آتا ستاءِ کرے ، وزیراعلیٰ بلوچستان میر سرفراز بگٹی سینٹر نا بناءِ کننگ آن پد نیشنل یونیورسٹی آف سائنس اینڈ ٹیکنالوجی کوئٹہ کیمپس نا ایڈمن بلاک آ سرمس ہراڑے او نیال اس خلک و اسہ دیوان اسے نا کماشی ءِ کرے۔ دادورہ نا وخت آ جامعہ نا طالب علم آتون یوتھ ڈائیلاگ سیشن ٹی تران کرسا میر سرفراز بگٹی پارے کہ اودے خوشی ءِ کہ او پاکستان نا اسہ آب اٹ تعلیمی ادارہ سے ٹی آخبت ناجوڑ کروک آتون مخاطب ءِ اوزور شاغا کہ ورناتے تصور و راستی تیٹی پرخ ءُ سرپند کننگ کن عملی پٹ وپول ءِ تینا کروئی مریک اوپارے کہ پاکستان تون اوار مچ آ راج پروپیگنڈا بیانی تا چیلنج آتا گواچی ءُو ریاست پاکستان نا برخلاف منظم منفی پروپیگنڈا ٹی ہمو زموار آک اوار ءُ ہرافک بناآن پاکستان ءِ امنا کتنو۔ اوپارے کہ راستی تا نسبت تصور آک زیات ترندی اٹ تالان مریرہ ہرانا سوب بلوچستان نا بابت حقیقت و تاثراٹی پیدوار پرخ ودی مریک ، وزیراعلیٰ پارے کہ پاکستان نا تاریخ اٹی بلوچستان نا اسہ زیبا و مثبت کِسہ اس ساڑی ءِ ولے منہ زموار دا تاریخی راستکی تے مسخ کرسا پیش کریر میر سرفراز بگٹی دا عزم انا درشانی ءِ کرے کہ او بلوچستان نا بابت راستکی و ریاستی بیانیہ غا ہرکہول آ گپ وتران کن تیار ءِ اوتینا جندی آزموندہ غاتا حوالہ ءِ ترساپارے کہ اوڑآ 17 مہلک جلہو مسنے ولے او ریاست نا دفاع کن پین ہفدہ سد جلہو آتیکن تیار ءِ او طالب علم آتے مخاطب کرسا پارے کہ او بلاجھجھک سوج کیر و ہر سوج انا ورندی ءِ دلیل و راستکی تا بنداو آتننگک ، وزیراعلیٰ بلوچستان داہیت آ زور شاغا کہ میر ٹوکریسی و پدریسہ گپ وتران نا کمک اٹ ورناو ریاست نا نیام اٹ ساڑی خلیج ءِ چٹفنگ مریک ۔ داوخت آ او خوانوک آ مار و مسن تتون چار گھنٹہ غان زیات مرغن ءُ نشست اسے ٹی پبی مکالمہ کرے و باوری کرفے کہ او ہر چنا و ہر مسڑ نا سوج انا ورندی ءِ تننگ آن بیدس ہنپک مکالمہ ٹی آجوئی اٹ سوج آتا است بڈی کن کیمرہ غاتے بند کرفنگا وخت اس کہ وزیراعلیٰ تینا جندی عملہ ءِ ہم ایلو مصروفیات آتا یات دہانی آن تورے تانکہ او پورو چکار اٹ ورناتتون گپ وتران ءِ برجاتخنگ کے یوتھ ڈائیلاگ نا داسیشن اٹی طالب علم آک وزیراعلیٰ بلوچستان آن تاریخی، راجی، سیاسی ، انتظامی امور، حکومتی گام گیج تون اوار چندی خرین وہنین سوج کریر ہرافتا وزیراعلیٰ بلوچستان صبر و تحمل و دلیل اٹ سرجم ورندی ءِ تس۔