وزیراعظم محمد شہباز شریف نا چین انا سفیر جیانگ زائیڈونگ تون گپ وتران

اسلام آباد۔ 23 اپریل (اے پی پی ) وزیراعظم محمد شہباز شریف چین اتون پاکستان نا تزویراتی شریداری ءِ سوگو آن سوگو تر جوڑ کننگ نا است خواہی نا درشانی ءِ کرسا پارینے کہ پاکستان دا شریداری آ گمر کیک۔ داخیال آتا درشانی ءِ او السی جمہوریہ چین نا سفیر جیانگ زائیڈونگ تون گپ وتران کرساکرے ہرا پنچ شنبے نادے آ داڑے وزیراعظم محمد شہباز شریف تون اوڑدہی کرے ۔ وزیراعظم آفس نا میڈیا ونگ انا کنڈآن جاری بیان نا رداٹ اوڑدہی ٹی نائب وزیراعظم و وزیرخارجہ سینیٹر محمد اسحاق ڈار ، بنجائی وزیر ڈٹ بندی و شونداری ڈاکٹر احسن اقبال، بنجائی وزیر حوالکاری وشینکاری عطاء اللہ تارڑ ، وزیراعظم نا خصوصی کمکار سید طارق فاطمی و سیکرٹری خارجہ آمنہ بلوچ ئسک ہم ساڑی ئسر۔ وزیراعظم عوامی جمہوریہ چین نا صدر شی جن پنگ و وزیراعظم لی چیانگ کن تینا نیک است خواہی نا درشانی ءِ کرے۔ پاکستان و چین نا ہڑتوم آ کنڈآتا تعلقداری آ است جمی نا درشانی ءِ کرسا وزیراعظم داہیت انا درشانی ءِ کرے کہ پاکستان ءِ چین اتون سٹریٹجک شریداری آ گمرءِ۔ اوداعزم انا ہم درشانی ءِ کرے کہ او چینی سرکڑدہ غاتون خڑکی کمکاری ءِ برجاتخک تانکہ دا تعلقداری پین سوگو آن سوگو تر مرے۔ اوڑدہی ٹی دے ٹک نیامی نا حالیت و پاکستان نا امن کوشست آتیا ہم گپ وتران کننگا۔ چینی سفیر وزیراعظم نا منت واری ءِ ہرفے  وڈیہہ اٹی دیرپاامن کن پاکستان نا سفارتی کوشست آتا ستاءِ کرے۔ اوصدر شی جن پنگ نا وژن نا رداٹ پاکستان تون آہنی سنگتی ءِ پین سوگو کننگ و اودے پوسکن آ بڑزی تسکان دننگ نا چین انا عزم انا درشانی ءِ کرے۔