ملک ءَ پٹرولیم ءِ چیر دیوک باز انت، بنجاہی پیداوار ءِ تہ ءَ گیشی بوھگ ءَ انت، مزن وزیر ءِ سروکی ءَ دیوان ءَ بریفنگ کنان ءَ توانائی ءِ سلامتی ءَ را دل یکیمی کنگ ءِ واستہ گامگیج المی انت، شہباز شریف

اسلام آباد۔23اپریل  (اے پی پی): مزن وزیر محمد شہباز شریف ءَ توانائی ءِ سلامتی ءِ ھاتر ءَ گامگیج زورگ ءِ لوٹ کتگ ءُ آیوکیں وھد ءَ سرکاری کارمرد کنگ ءِ ھاتر ءَ ایوک ءَ الیکٹرک بس ءُ موٹر سائیکل ءِ گرگ ءِ ہدایت کتگ، شمسی توانائی ءِ چہ پیداکیں گیشیں بجلی ءِ چیر دیوک کنگ ءِ ھاتر ءَ بیٹری آنی گرگ ءِ آسراتی ءِ منصوبگ جوڑ کنگ بوتگ۔ پنچ شمبے ءِ روچ ءَ مزن وزیر ءِ سروکی ءَ توانائی ءِ سلامتی ءِ ھوالگ ءَ یک ھاسیں دیوان ءِ برجم دارگ بوت، ایشی ءِ تہ ءَ وفاقی وزیر مصدق مسعود ملک ، احد خان چیمہ، محمد اورنگزیب، سردار اویس لغاری، عطاللہ تارڑ، علی پرویز ملک، احسن اقبال، مشیر برائے نجکاری محمد علی، وزیر مملکت بلال اظہر کیانی،  ھاسیں کمکار  ہارون  اختر ءُ ہمگرنچیں سرکاری مزنیں کارندہ آں بہر زرتگ ات۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ دیوان ءَ گشتانک دیان ءَ گوشت کہ توان ءِ رکھینگ نوں ملک ءِ سرجمیں آیوکیں منصوبگ بندی ءِ سک باز ھاسیں بھر جوڑ بوتگ۔ انوگیں دمگی جاور ھال آنی تہ ءَ توان ءِ رکھینگ ءُ اے درگت ءَ وھد ءِ سر ءَ چست کتگیں گامگیج توان ءِ بحران ءِ سوب جوڑ نہ بوتگ اَنت۔ آئی ءَ گوشت کہ آیوکیں وھد ءَ توان ءِ ضلورت آنی رد ءَ ملک ءَ خام تیل ءِ اسٹریٹجک چیر دیوک ءِ ھست بوھگ ءِ منصوبگ ءِ سر ءَ کار بوھگ ءَ اِنت۔ مزن وزیر ءَ توانائی ءِ رکھینگ ءُ پائیدار دیمروئی ءِ واستہ ٹرانسپورٹ ءِ وسیلگ آناں کم کم ءَ چاگرد دوستیں بجلی وسیلگ آنی نیمگ ءَ شنگ کنگ ءِ ہدایت کت ءُ گوشت کہ آیوکیں وھد ءَ سرکاری کارمردی ءِ واستہ ایوک ءَ الیکٹرک بس ءُ موٹر سائیکل آناں گرگ بہ بیت ءُ الیکٹرک چارجنگ اسٹیشن آنی واستہ ترندیں رنگ ءَ گامگیج چست کنگ بہ بیت۔ آئی ءَ شمسی توانائی ءَ چہ پیداکیں گیشیں بجلی ءِ چیر دیوک کنگ ءِ واستہ بیٹری آنی گرگ ءِ آسراتی ءِ واستہ منصوبگ جوڑ کنگ ءُ دمگی رنگ ءَ مزنیں کوالٹی ءِ اسٹوریج بیٹری آنی پیداوار ءِ واستہ دلبڈی دیگ ءِ ھم ہدایت کتگ۔ بریفنگ ءِ ساھت ءَ گوشگ بوت کہ دمگی جاور ھال آنی رد ءَ توان ءِ شوبگ ءِ واستہ جوڑ بوتگیں راجی ھمگرنچی ءُ انتظامی کونسل ھمک روچ جاور آنی سر ءَ چار ءُ تپاسی کنگ ءَ انت۔ ملک ءَ اے وھد ءَ پٹرولیم ءِ چیر دیوک ءِ کساس باز اِنت، ملک ءِ تہ ءَ فوڈ سیکیورٹی ءِ جاور ھال مھکم اَنت ءُ تیل ءُ گیس کمپنی آنی برجاھیں کوشست آنی سبب ءَ گیس ءُ تیل ءِ بنجاہی پیداوار گیش بوھگ ءَ اِنت۔ بریفنگ ءِ رد ءَ گرڈ ءِ تک ءَ بیٹری ءِ چیر دیوک کنگ ءِ واستہ 2 پائلٹ پروجیکٹ آنی تہ ءَ پی سی 1 تیار کنگ بوھگ ءَ اِنت ءُ شمسی توانائی پیداک کنوکیں ملکی صارف آناں بیٹری ءِ چیر دیوک کنگ ءِ واستہ دلبڈی دیگ بوھگ ءَ اِنت۔