مزن وزیر شہباز شریف ءَ الیکٹرک گاڑی آنی دیمروئی ءِ واستہ گامگیج آنی ترند کنگ ءِ پنت ءُ شون

اسلام آباد۔22اپریل  (اے پی پی):  مزن وزیر محمد شہباز شریف ءَ الیکٹرک گاڑی آنی دیمروئی ءِ واستہ گامگیج ترند کنگ ءِ پنت ءُ شون کتگ۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ ملک ءَ الیکٹرک گاڑی آنی دیمروئی ءِ ھوالگ ءَ مزن وزیر محمد شہباز شریف ءِ سروکی ءَ چار ءُ تپاسی دیوان برجم دارگ بوت۔ دیوان ءِ تہ ءَ وفاقی وزیر ڈاکٹر مصدق ملک، احد خان چیمہ، محمد اورنگزیب، عطاء اللہ تارڑ ،  اویس خان لغاری ، احسن اقبال، وزیر مملکت بلال اظہر کیانی،  مزن وزیر ءِ ھاسیں کمکار   ہارون اختر ، چیئر مین وزیراعظم یوتھ پروگرام رانا مشہود احمد خاں، گورنر سٹیٹ بینک جمیل احمد  ءُ تعلقداریں مزنیں کارندہ آں چہ دیم ءَ اتکگ۔ مزن وزیر ءَ دیوان ءَ گوں گشتانک دیان ءَ پنت ءُ شون کت کہ الیکٹرک گاڑی آنی دیمروئی ءِ واستہ ترندی ءَ گوں گامگیج چست کنگ بہ بیت۔ انوگیں دمگی جاور ھال ءُ آیوکیں لوٹ آنی رد ءَ الیکٹرک گاڑی آنی دیمروئی ءَ چہ نہ ایوک ءَ سوخت ءِ درآمد ءِ بار کم بیت بلکیں اے پہ چاگردی رکھینگ ءُ توانائی ءِ ایمنی ءَ ھم سک باز المی اِنت۔ آئی ءَ راجی ای وی پالیشی ءِ چیر دستی ءَ الیکٹرک موٹر سائیکل ءِ سر ءَ کم آمدنی ءِ مردم آناں دیگ بوتگیں سبسڈی ءِ تہ ءَ شفافیت ءِ ھم پک کنگ ءُ اے اسکیم ءِ سر ءَ عمل کنگ ءَ را گیش ترند کنگ ءِ ھم پنت ءُ شون کتگ۔ دیوان ءَ سرجمیں ملک ءَ الیکٹرک گاڑی آنی دیمروئی ءِ واستہ جاری گامگیج آنی بابت ءَ سرپدی دیگ بوت، ایشی ءِ تہ ءَ سرپدی دیگ بوت کہ الیکٹرک موٹر سائیکل ءُ رکشہ آنی جوڑیشت ءِ واستہ 72مینوفیکچرنگ سرٹیفکیٹ جاری کنگ بوتگ، وھدیکہ سرجمیں ملک ءَ الیکٹرک گاڑی آنی واستہ 4 مینوفیکچرنگ سرٹیفکیٹ جاری کنگ بوتگ۔ ایشی ءَ ابید ای وی چارجنگ اسٹیشن آنی جوڑ کنگ ءِ واستہ تاں انوگ ءَ 123 درخواست رستگ۔ بریفنگ ءِ رد ءَ اے منصوبگ بندی کنگ بوھگ ءَ اِنت کہ آیوکیں 5سال آنی تہ ءَ ملک ءِ تہ ءَ 30درسد گاڑی بجلی ءِ سر ءَ کار کن اَنت ایشی ءَ چہ 4.5ارب ڈالر ءِ تیل ءِ بچت بیت۔ بریفنگ ءِ رد ءَ گریڈ 16 ءَ تاں سرکاری ملازم آناں آسانیں قسط آنی سر ءَ الیکٹرک بائیک پجاری کنگ بیت۔