زمین ءِ رکھینگ یک مشترکہ جھان ءِ چیلنج اِنت، ایشی ءَ گوں گر ءُ دار کنگ ءِ ھاترا اجتماعی سرپدی ءُ یکجاھیں رھبند المی اِنت، سید یوسف رضا گیلانی

اسلام آباد۔22اپریل  (اے پی پی): سینیٹ ءِ چیئرمین سید یوسف رضا گیلانی ءَ گوشت کہ زمین ءِ رکھینگ استیں دور ءِ یک ھاسیں ءُ یکجائی جھان ءِ چیلنج جوڑ بوتگ، ایشی ءَ گوں جوانیں رنگ ءَ گر ءُ چیل بوھگ ءِ واستہ اجتماعی سرپدی، یکجاھیں حکمت عملی ءُ عملی گامگیج آنی ضلورت اِنت۔ سینیٹ ءِ سیکرٹریٹ ءِ رد ءَ آئی ءَ اے ھیالانی درشانی ’’زمین ءِ جھان ءِ روچ‘‘ ءِ موہ ءَ وتی کلوہ ءِ تہ ءَ کت۔ آئی ءَ گوشت کہ اے سال ءِ بنگپ ”مئے زور، مئے سیارہ“ اے گپ ءِ پدر کنگ ءَ اِنت کہ سیارہ ءِ زندگ بوھگ ءُ ایمنی انسانیت ءِ یکجائی کوشست آنی سر ءَ بندوک اِنت۔ سید یوسف رضا گیلانی ءَ گوشت کہ زمین ءِ رکھینگ استیں دور ءِ یک ھاسیں ءُ مشترکہ جھان ءِ چیلنج جوڑ بوتگ، ایشی ءَ گوں جوانیں رنگ ءَ گر ءُ چیل بوھگ ءِ واستہ اجتماعی سرپدی ءُ یکجاھیں حکمت عملی ءِ ضلورت اِنت۔ چیئرمین سینیٹ ءَ گوشت کہ پاکستان ءِ ھواری سرجمیں دگنیا ءَ موسمی بدلی ءِ اثرات گوں ترندی ءَ گیش بوھگ ءَ انت۔ درجہ حرارت ءِ گیش بوھگ، آپ ءِ کمی، ہوا ءِ آلودگی ءُ جنگلانی ھلاس کنگ ءِ وڑیں چیز نہ ایوک ءَ چاگرد ءِ ھاترا بلکیں آیوکیں نسلانی ایمنیں باندات ءِ ھاترا ھم یک مزنیں ھترہ یے جوڑ بوتگ اَنت۔ آئی ءَ اے گپ ءِ سر ءَ زور پر دات کہ اے چیلنج آنی گیواری ءِ واستہ ایوک ءَ پالیسی جوڑ کنگ ءِ واستہ ھچ نہ بیت بلے انفرادی ءُ اجتماعی تک ءَ زندمان ءِ تہ ءَ جوانیں بدلی المی اِنت۔ سید یوسف رضا گیلانی ءَ گوشت کہ درچک ءِ کشت ءُ کشار، آپ ءُ توان ءِ زانتکاریں رنگ ءَ کارمرد کنگ، پلاسٹک ءِ کم چہ کم کارمرد کنگ ءُ صفائی ءِ دیمروئی ءِ وڑیں گامگیج بوت کنت کہ ناچیز گندگ بہ بنت بلے سرجمی ءَ اے چاگردی رکھینگ ءِ تہ ءَ سک باز جوانیں کرد پیلو کت کن اَنت۔ آئی ءَ وانگ ءُ زانگ ءِ ادارگ، چاگردی ادارگ ءُ ھاسیں رنگ ءَ ورنا آنی کرد ءِ توسیپ کت ءُ گوشت کہ چاگردی سرپدی ءِ تہ ءَ گیشی ءُ پائیداریں زندمان ءِ دیمروئی ءِ تہ ءَ آھانی کرد کلیدی اِنت۔ چیئرمین سینیٹ ءَ ایوان بالا ءِ کرد ءِ سر ءَ زور پر دات ءُ گوشت کہ سینیٹ ءَ کانود سازی، سیادی داروکیں قائمہ کمیٹی آنی کار ءُ کرد ءُ پالیسی ءِ نگرانی ءِ وسیلگ ءَ چاگردی رکھینگ ءِ واستہ مزنیں پیشرفت کتگ۔ آئی ءَ گوشت کہ چاگردی آلودگی ءِ ھلاسی، قدرتی وسیلگ آنی رکھینگ ءُ برجمیں دیمروئی ءَ را دیم ءَ برگ ءِ واستہ بازیں گامگیج آنی سر ءَ ھیال ءُ لیکہ کنگ بوھگ ءَ اِنت ایشی ءَ چہ ملک ءَ را ایمن، متوازن ءُ برجمیں ماحولیاتی نظام ءِ نیمگ ءَ رھادگ بیت۔ سید یوسف رضا گیلانی ءَ گوشت کہ پاکستان ءِ آیوکیں باندات یک ساپ ءُ سبز ءُ ایمنیں چاگرد ءَ گوں بندوک انت، اے مئے درستانی یکجائی ذمہ واری انت کہ ما وتی آیوکیں باھند آنی واستہ زمین ءَ جوانیں جاور ھال ءَ یلہ بہ کن ایں ۔ آئی ءَ راج ءَ چہ اپیل کت کہ زمین ءِ روچ ءَ را ایوک ءَ یک روچے ءَ محدود مہ کن اَنت بلکیں ایشی ءَ را دائمی بنیاد ءَ ماحول دوستیں زندمان ءِ رہبند ءِ زورگ ءِ عزم ءِ تہ ءَ بدل بہ کن اَنت۔ سینیٹ ءِ چیئرمین سید یوسف رضا گیلانی ءَ گوشت کہ اگاں ما وتی اجتماعی طاقت ءَ جوانیں ءُ جوڑیشت ءِ رد ءَ کارمرد بہ کن ایں گڑا پائیدار، ایمن ءُ وشھالیں باندات ممکن اِنت ءُ اے مئے سیارہ ءِ گوما راستیں وفاداری ءِ لوٹ اِنت۔\932