راجی اسمبلی ءِ اسپیکر سردار ایاز صادق ءَ پہلگام ءِ واقعہ ءِ یک سال ءِ سرجمی ءِ سر ءَ بھارت ءِ دروگیں ءُ بزدلیں کرد ءِ مذمت کتگ

اسلام آباد۔22اپریل  (اے پی پی): راجی اسمبلی ءِ اسپیکر سردار ایاز صادق ءَ پہلگام ءِ وئیل ءِ یک سال ءِ سرجمی ءِ سر ءَ بھارت ءِ دروگیں ءُ بزدلیں کرد ءِ مذمت کتگ ءُ گوشت کہ پہلگام ءِ وئیل بھارت ءِ نیمگ ءَ دروگیں پرچم ءِ آپریشن بوتگ، پاکستان ءَ را وتی ناکامی آنی ذمہ وار لیکگ بھارت ءِ عادت بوتگ۔ چار شمبے ءِ روچ ءَ آئی ءَ پہلگام ءِ واقعہ ءِ یک سال ءِ سرجمی ءِ بابت ءَ وتی بیان ءَ گوشت کہ اے وڑیں دروگیں کارروائی کمیں ذہنیت ءِ یات ءَ دنت کہ نہ ایوک ءَ بے گناھیں شہری آنی جان ءَ گوں ناپاکی ءِ مول ءُ مراد ءِ سرجم کنگ ءِ واستہ گوازی کنت بلکیں دمگی ءُ جھان ءِ امن ءَ را ھم مزنیں ھترہ ءِ دیم ءَ کاریت۔ اے دروگیں ءُ من گھڑتیں واقعہ ءَ را بنیاد ءِ رد ءَ زرتگ ءُ ہندوستان ءَ یک نیمگی سندھ ءِ آپ ءِ معاہدہ کہ شش دہائی ءَ چہ برجاہ اِنت معطل کتگ ءُ میان استمانی کانود ءِ بیرک شنگ ءُ تالان کتگ اَنت۔ اے زھرناکیں کار نہ ایوک ءَ پاکستان ءِ سر ءَ آپی زوراکی ءِ  کپار  کنگ ءِ ناپاکی ءِ گامگیج اِنت بلکیں سرجمیں دمگ ءِ دیمروئی ءُ وشھالی ءِ ھاترا ھم مزنیں ھترہ یے ۔ آئی ءَ گوشت کہ اے معاہدے ءِ برجاھیں ھلاپ ورزی ءِ سر ءَ پاکستان لائکیں پسو دیگ ءِ ھک ءَ وتی گور ءَ دار ایت۔ مزن وزیر شہباز شریف ءَ پہلگام ءِ وئیل ءَ پد بھارت ءَ را بے رھبندیں پٹ ءُ پول ءِ پیشکش کتگ۔ پاکستان انگت ءَ پہلگام ءِ وئیل ءِ بے رھبندیں پٹ ءُ پول ءِ وتی موقف ءِ سر ءَ اوشتاتگ۔ اے پہ ہندوستان ءَ شرمندگی ءِ گپ اِنت کہ پہلگام ءِ وئیل مزنیں سیکورٹی ءِ ھستیں جاوراں بوتگ۔ پاکستان امن ءِ واھشت مند اِنت بلے ھرچ وڑیں زوراکی ءِ لائکیں پسو دیگ ءِ ھک ءَ وتی گور ءَ دار اِیت۔ مئی 2025 ءَ پاکستانی لشکر ءَ دژمن ءِ زوراکی ءِ سرا لائکیں پسو دات۔ اسپیکر سردار ایاز صادق ءَ پاکستانی سلاہ بندیں اُرد ءِ پیشہ وارانہ ءُ قربانی ءَ را  توسیپ ءُ ستا پیش کت۔