جی ایس پی پلس ءِ آسراتی یورپی یونین ءِ گوما اقتصادی سیادی ءِ یک ھاسیں ستونے، حکومت اقتصادی اصلاحات ءِ ایجنڈا ءِ سر ءَ عمل کنگ ءَ اِنت، وفاقی وزیر ءِ ھزانگ ءَ یورپی یونین ءِ سفیر ءَ گوں گپ ءُ تران

اسلام آباد۔21اپریل  (اے پی پی): وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ جی ایس پی پلس ءِ آسراتی پاکستان ءُ یورپی یونین ءِ نیام ءَ اقتصادی سیادی آنی یک ھاسیں ستون اِنت، سرجمیں معیشت مھکم اِنت، سرمایہ کار آنی تہ ءَ میاں اوستمانی سرمایہ کاری مارکیٹ آنی گوما سیادی ءِ پدا بندات کنگ ءَ گوں سرمایہ کار آنی بھروسہ گیش بوھگ ءَ اِنت۔ آئی ءَ اے گپ سئے شمبے ءِ روچ ءَ پاکستان ءَ یورپی یونین ءِ سفیر ریمونڈاس کاروالہو ءَ گوں گند ءُ نند ءِ ساھت ءَ کت۔ وزیر ءِ ھزانگ ءَ گوشت کہ پاکستان ءَ انوگیں وھد ءَ یورو بانڈز ءِ وسیلگ ءَ چارسال ءِ فرق ءَ پد جھان ءِ سرمایہ کاری مارکیٹ آنی تہ ءَ دوبر داخل بوتگ ایشی ءَ چہ سرمایہ کار آنی مھکمیں دلچسپی گندگ بوتگ ءُ اے جاری کنگ ءِ کساس ءَ را ھم گیش کنگ بوتگ۔ اے دیمروئی معیشت ءِ گہتر بوھوکیں بنیات آنی عکس اِنت ءُ پاکستان ءِ جھان ءِ مالیاتی نظام ءِ تہ ءَ جوانیں دیمروئی ءِ نشانی اِنت۔ سینیٹر اورنگزیب ءَ گوشت کہ حکومت یک جتائیں سرمایہ کاری مارکیٹ ءِ حکمت عملی ءِ رندگیری ءَ کنگ ءَ اِنت کہ ایشی ءِ تہ ءَ آیوکیں وھد ءَ میاں اوستمانی بانڈ ءِ جاری کنگ ءُ نوکیں مالی کمک ءِ وسیلگ ھوار اَنت تانکہ درائیں مالی کمک ءَ را مھکم کنگ ءُ پائیدار مالی وسیلگ آناں دل یکیمی کنگ بہ بیت۔ گند ءُ نند ءِ تہ یورپی یونین ءِ سفیر ءَ وزیر ءِ ھزانگ ءَ را 28 اپریل 2026 ءَ اسلام آباد ءَ برجم دارگ بوھوکیں مزن تک ءِ یورپی یونین ءُ پاکستان بزنس فورم ءَ بھر زوری کنگ ءِ دعوت دات کہ وزیر ءَ اے گپ من اِت۔ وزیر ءِ ھزانگ ءَ بنجاہی دیوان ءَ ’’ابھریں پاکستان: ترغیب ءُ نا ترغیب، اصلاحات ءُ نوکیں سرمایہ کاری ءِ موہ‘‘ ءِ سر ءَ کلیدی گشتانک ھم دات۔ وزیر ءِ ھزانگ ءَ یورپی یونین ءِ کوشست آناں ساڑات کہ آ یک پلیٹ فارم ءِ سر ءَ میاں اوستمانی ءُ بنجاھی کاروباری مردم آناں یکجا کنگ ءَ انت ءُ گوشت کہ اے وڑیں گامگیج پاکستان ءِ گہتریں کاروباری چاگرد ءُ سرمایہ کاری ءِ موہ آناں پدر کنگ ءِ ھوار کاروباری رابطہ آناں دیمروئی دیگ ءَ کمک کن اَنت۔ وزیر خزانہ ءَ میکرو اکنامک استحکام ءِ برجائی، زرّ ءِ ذخائر ءَ را مھکم کنگ ءُ ڈھانچہ ءِ اصلاحات ءِ وسیلگ ءَ پائیدار ءُ ھواریں دیمروئی ءَ را دیم ءَ برگ ءِ واستہ حکومت ءِ کوشست آنی سر ءَ ھم زور پر دات۔ آئی ءَ دو نیمگی شریک آنی برجاھیں کمک ءَ را ساڑات ءُ گوشت کہ اقتصادی برجائی ءِ واستہ میاں اوستمانی کمک سک باز المی اِنت۔ وزیر خزانہ ءَ پاکستان ءِ دری شوبگ ءِ ھوالگ ءَ امید ءِ درشان کت ءُ گوشت کہ حکومت مقابلہ ءِ توان ءَ را گیش کنگ، سرمایہ کاری ءِ روانی ءَ را گیش کنگ ءُ تجارتی موہ آناں گیش کنگ ءِ سر ءَ دلگوشی دیگ ءَ اِنت۔ اے درگت ءَ آہاں جی ایس پی پلس فریم ورک ءِ چیر دستی ءَ برجاھیں پیشرفت ءِ امیت ھم سہرا کت ءُ پاکستان ءُ یورپی یونین ءِ نیام ءَ اقتصادی سیادی ءِ یک ھاسیں ستون ءِ رنگ ءَ ھم گوشت۔ فریقین ءَ پاکستان ءُ یورپی یونین ءِ نیام ءَ اقتصادی سیادی ءَ را گیش مھکم کنگ ءُ تجارتی، سرمایہ کاری ءُ کاروباری کمک ءَ را دیمروئی دیگ ءِ واستہ وتی جزم ءِ پدا زور دات۔\932