اسپیکر راجی اسمبلی ءَ ایئر ایونیو گرڈ اسٹیشن برکی لاہور ءَ 11کے وی پڈھانہ۔2 فیڈر  ءِ بنگیج کت

لاہور۔21اپریل  (اے پی پی): راجی اسمبلی ءِ اسپیکر سردار ایاز صادق ءَ لیسکو ءِ چیردستی ءَ ایئر ایونیو گرڈ اسٹیشن برکی لاہور ءَ 11کے وی پڈھانہ۔2 فیڈر  ءِ بنگیج کت۔ اے منصوبگ 30 ملین کلدار ءِ ھرچ ءُ درچ ءَ ایوک ءَ سئے ماہ ءِ تہ ءَ سرجم کنگ بوتگ۔ افتتاحی مراگش ءَ گشتانک دیان ءَ اسپیکر راجی اسمبلی ءَ کمیں وھد ءِ تہ ءَ منصوبگ ءِ سرجمی ءَ را ساڑات۔ الس ءَ را گیش ءَ چہ گیش آسراتی پجاری ءِ واستہ بنجاہی بنیاتی ڈھانچگ ءِ مھکم کنگ المی اِنت ۔ آئی ءَ گوشت کہ اے رنگیں منصوبگ نہ ایوک ءَ الس ءَ را زوتیں ریلیف دنت بلکینگ ءَ دراجیں مدت ءِ دیمروئی ءُ الس ءِ دلبڈی بحال کنگ ءَ ھم ھاسیں کرد پیلو کن اَنت۔ آئی ءَ اے جزم ءِ پدا زور دات کہ السی وشھالی منصوبگ آنی سلسلہ ھمے جذبہ ءُ تسلسل ءَ گوں برجاہ بیت۔ زانگ بہ بیت کہ پیسر ءَ 11 کیو وی پدھنا فیڈر 132 کیو وی غازی گرڈ اسٹیشن ءَ گوں بندوک بوتگ ءُ ایشی ءِ سبب ءَ سسٹم ءِ سر ءَ دباؤ، وولٹیج ءِ کمی ءُ لائن ءِ تاوان ءِ وڑیں جیڑھ پیداک بوھگ ءَ ات۔ اے جیڈھ آنی گیواری ءِ واستہ دمگ ءِ منصوبگ بندی ءِ چیر دستی ءَ نوکیں 11کے وی پدھانا.II فیڈر جوڑ کنگ بوتگ ءُ ایشی ءَ را 132کے وی ایکس ایئر ایونیو گرڈ اسٹیشن ءَ گوں ھمگرنچ کنگ بوتگ۔ اے منصوبہ ءِ آسر ءَ دمگ ءَ بجلی ءِ سپلائی ءِ نظام ءَ مزنیں کساسے ءَ گہتری کیت، وولٹیج ءِ کمی ءُ ٹرپنگ ءِ وڑیں جیڑھ مزنیں کساسے ءَ کم بنت ءُ دمگ ءِ مردماں شریں ءُ بے رکاوٹیں بجلی ءِ آسراتی رس ایت۔