وفاقی وزیر برائے تجارت ءَ پاکستان ءَ ایتھوپیا ءِ سفیر ءَ گوں گند ءُ نند کت، یکجائی منصوبگ ءُ سیل ءُ سواد ءِ کمک ءَ را دیمروئی دیگ ءِ سر ءَ تپاک

اسلام آباد۔20اپریل  (اے پی پی): پاکستان ءَ ایتھوپیا ءِ سفیر ڈاکٹر عمیر حسین اوبا  ءَ وفاقی وزیر تجارت جام کمال خان ءَ گوں گند ءُ نند کت۔ گند ءُ نند ءَ دو نیمگی تجارت، صنعتی کمک ءُ دمگی رابطہ آناں مھکم کنگ ءِ راہ آنی سر ءَ ھیال ریچی کنگ بوت، ءُ نوکیں راہ آناں پٹ ءُ پول کنگ بوت۔ گند ءُ نند ءِ ساھت ءَ دوئیں نیمگ ءَ پاکستان ءُ ایتھوپیا ءِ سیادی ءِ تہ ءَ گیش بوھوکیں رپک ءِ سر ءَ دل یکیمی ءِ درشانی کت ءُ اے ھوار بوھگ ءَ را عملی ، آسر ءِ سر ءَ استیں شریکداری ءِ تہ ءَ بدل کنگ ءِ ضلورت ءِ سر ءَ زور پر دات۔ وفاقی وزیر ءَ اسلام آباد ءَ یک کثیر ملکی کاروباری فورم ءِ برجائی ءِ تجویز پیش کتگ کہ ایشی ءِ تہ ءَ مشرقی افریقہ ءِ ملک آناں دعوت دیگ بوتگ کہ آ پاکستان ءِ صنعتی صلاحیت آناں وتی چماں گوں بہ گند اَنت۔ آئی ءَ اے گپ ءِ سر ءَ زور پر دات کہ براہ راست دیم ءَ آھگ ءَ چہ پاکستان ءِ بابت ءَ جھان ءِ لیکہ آنی نوکیں رنگ ءَ جوڑ کنگ ءَ کمک رسیت ءُ نوکیں تجارتی ءُ سرمایہ کاری شریکداری آنی پچ کنگ ءَ کمک رسیت۔ جام کمال ءَ ملک ءِ مھکمیں کسان ءُ میاں اوستمانی کاروباری ادارگ ءِ شوبگ ءِ سر ءَ زور پر دات کہ ایشی ءِ تہ ءَ لوگی سامان، انجینئرنگ ءِ سامان، کشت ءُ کشاری مشینری ءُ صارفین ءِ سامان آنی یک مزنیں رِد ءُ بندے جوڑ کنگ بیت۔ آئی ءَ ھاسیں رنگ ءَ زراعت، انجینئرنگ ءِ صنعت ءُ ٹریکٹر آنی تہ ءَ کمک ءِ مھکمیں گنجائش ءِ سر ءَ زور پر دات۔ وفاقی وزیر ءَ گوستگیں چار ءُ پنچ سال آنی تہ ءَ پاکستان ءَ ھما مزنیں دیمروئی ءِ سر ءَ تران کت۔ آئی ءَ دوئیں دمگ آنی تہ ءَ گیش بوھوکیں صارف آنی لوٹ آناں پیلو کنگ ءِ واستہ کاسمیٹکس، پرفیوم ءُ ایشی ءَ گوں سیادی داروکیں چیز آنی تہ ءَ پاکستانی ءُ ایتھوپیا ءِ فرم آنی نیام ءَ یکجائی منصوبگ آنی تجویز پیش کتگ۔ پاکستان ءِ صنعتی سوبمندی ءِ کسہانی ذکر کنان ءَ وفاقی وزیر ءَ ایتھوپیا ءِ ڈل ءَ را سیالکوٹ ءِ تر ءُ تاب ءِ دعوت دات ءُ ایشی ءَ را نجی شعبہ ءِ سروکی ءَ دیمروئی ءِ یک انچیں مثال ءِ رنگ ءَ پیش کت۔ آئی ءَ گوشت کہ سیالکوٹ چیمبر آف کامرس اینڈ انڈسٹری ءِ سروکی ءَ شہر ءِ کاروباری براتی ءَ وتی وتی رنگ ءَ انفراسٹرکچر جوڑ کتگ ایشی ءِ تہ ءَ یک میاں اوستمانی بالی پٹ ھم ھوار اِنت۔ سیالکوٹ کھیبانی سامان، سرجیکل ساز ءُ سامان، چمڑہ ءُ پاد ءِ ھاتر ءَ یک جھان ءِ مرکز جوڑ بوتگ ءُ ایشی ءِ برآمدات سالانہ ارباں ڈالر ءَ سر بیت، ایشی ءِ تہ ءَ یورپی یونین ھم ھوار اِنت۔ تجارتی رسد ءِ ھوالگ ءَ جام کمال ءَ رابطہ کاری ءَ را گہتر کنگ ءُ جیبل علی پورٹ ءِ وڑیں سیمی ملک ءِ ٹرانس شپمنٹ ہب آنی سر ءَ انحصار ءَ را کم کنگ ءِ سر ءَ زور پر دات۔ آئی ءَ فیڈر جہاز آنی وسیلگ ءَ افریقی بندرگاہ آنی گوما براہ راست سمندری رابطہ آنی تہ ءَ گیشی ءِ تجویز پیش کتگ، ایشی ءَ چہ ٹرانزٹ ءِ وھد 10-12 روچ ءَ چہ ایوک ءَ 2-3 روچ ءَ کم بوت کنت۔ آئی ءَ پاکستان ءِ جغرافیائی برتری ھاسیں رنگ ءَ کراچی ءِ سر ءَ زور پر دات کہ جیبوتی بندرگاہ ءَ ھوار دمگی سمندری راہداری آنی وسیلگ ءَ میاں اوستمانی ایشیا ءَ افریقی برآمدات ءِ دروازگ اِنت۔ ڈاکٹر عمیر حسین اوبا ءَ وزیر ءَ را سرپد کت کہ اے سال ءِ گڈ ءَ تاں اسلام آباد ءَ ایتھوپیا ءِ یک ملکی نمائش ءِ برجم دارگ ءِ منصوبگ انت۔ وزیر تجارت ءَ اے گامگیج ءَ را وش اتک کت ءُ گوستگیں نمائش ءِ سوبمندی ءَ را ساڑات ءُ ایشی ءَ را دو نیمگی تجارتی سیادی ءَ را مھکم کنگ ءِ نیمگ ءَ مزنیں گامگیج گوشت۔ سفیر ءَ گیش گوشت کہ ایتھوپین ایئر لائنز لاہور ءَ را براہ راست بالی گراب بندات کنگ ءِ منصوبگ بندی کنگ ءَ اِنت ایشی ءَ چہ کاروباری رابطہ آنی تہ ءَ مزنیں کساسے ءَ گیشی بیت، رابطہ کاری ءَ را گہتر بیت ءُ دوئیں ملک آنی نیام ءَ دود ءُ ربیدگ ءِ تبادلہ ءَ را گیش کنگ بیت۔ ایتھوپیا ءِ سفیر ءَ پاکستان ءِ اقتصادی دیمروئی ءَ را ساڑات ءُ ملک ءِ ہنرمندیں انسانی وسائل ءِ شوبگ ءَ را من اِت۔ ڈاکٹر اوبا ءَ گوشت کہ انسانی سرمایہ المی تریں وسیلگ اِنت ءُ وانگ ءُ زانگ، ھنر ءُ ادارگ ءِ دیمروئی ءِ تہ ءَ گیشیں کمک ءِ سر ءَ زور پر دات۔ دوئیں نیمگ ءَ اے گپ ءِ سر ءَ تپاک کنگ بوت کہ پاکستان ءُ افریقی ملک یک انچیں المی موڑ ءِ سر ءَ اوشتاتگ اَنت کہ ایشی ءِ تہ ءَ کشت ءُ کشاری، انجینئرنگ ءُ ٹریکٹر ءِ جوڑ کنگ ءَ ھوار صنعتی کمک، سیل ءُ سواد ءِ دیمروئی ءُ عملی کاروباری ھوار بوھگ ءَ چہ ھاسیں اقتصادی موہ آناں پچ کنگ بوت کنت۔ آہاں دو نیمگی تجارت ءَ را گیش کنگ، یکجائی منصوبگ آناں دیمروئی دیگ ءُ دراجیں مدتی، کوالٹی ءِ سر ءَ بنیات ءِ سر ءَ اقتصادی شراکت داری ءِ دیمروئی ءِ واستہ وتی جزم ءِ پدا زور دات۔