اسلام آباد ءِ دومی رند ءِ گپ ءُ تران، وفاقی وزیر داخلہ محسن نقوی ءَ امریکی سفیر ءَ گوں گند ءُ نند کتگ، آئی ءَ را سیکورٹی بندوبست ءِ بابت ءَ بریفنگ

اسلام آباد۔20اپریل  (اے پی پی): وفاقی وزیر داخلہ محسن نقوی ءَ ’’اسلام آباد گپ ءُ تران‘‘ ءِ دومی راؤنڈ ءِ واستہ کتگیں سیکورٹی بندوبست آنی ھوالگ ءَ امریکی سفیر نیٹلی بیکر ءَ را اعتماد ءِ تہ ءَ زرتگ۔ وزارت داخلہ ءِ جارکش ءِ رد ءَ وفاقی وزیر ءَ سفارتی انکلیو ءَ امریکی سفارتخانہ ءِ تر ءُ تاب کتگ ات، ایشی ءِ تہ ءَ آئی ءَ اے گپ ءِ پدرائی کتگ ات کہ گپ ءُ تران ءِ سوبمندی ءُ درملکی مہمان آنی جان سلامتی ءِ واستہ یک غیر معمولی سیکورٹی منصوبگ جوڑ کنگ بوتگ۔ گند ءُ نند ءِ ساھت ءَ تران کنان ءَ محسن نقوی ءَ گوشت کہ ما وتی درستیں ھاسیں مہمان آنی واستہ سیکورٹی ءِ ھاسیں بندوبست کتگ ءُ اسلام آباد ءِ دومی رند ءِ گپ ءُ تران ءِ سوبمندی ءِ واستہ دعا کن ایں ۔ اے موہ ءِ سر ءَ امریکی سفیر ءَ پڑ ءَ کش ءُ چیل ءِ تہ ءَ کمی ءِ واستہ پاکستان ءِ دلجمیں کرد ءِ توسیپ کت۔ گند ءُ نند ءَ پاک امریکہ ءِ دو نیمگی سیادی آنی دیمروئی ءُ خطہ ءِ سرجمیں جاور ھال آنی سر ءَ ھم سرجمی ءَ گپ ءُ تران کنگ بوت۔ دوئیں شخصیت آں وت مہ وتی مفاد ءِ جیڈھ آنی سر ءَ کمک ءَ را برجاہ دارگ ءِ وتی جزم ءِ پدر کنگ کت۔ وزیر داخلہ ءِ اے ھاسیں تر ءُ تاب ءِ تہا ڈی جی ایف آئی اے ڈاکٹر عثمان انور، چیف کمشنر اسلام آباد سہیل اشرف، آئی جی اسلام آباد پولیس علی نصیر رضوی ءُ ڈپٹی کمشنر اسلام آباد عرفان میمن ءِ ہمراہی ءَ بوتگ انت، آہاں ہمگرنچیں سیکورٹی جیڈھ آنی بابت ءَ بریفنگ ءِ تہا کمک کتگ۔