وزیر خزانہ ءَ امریکی خزانہ ءِ ڈپٹی سیکرٹری ءَ گوں گند ءُ نند کت، اقتصادی کمک ءِ بابت ءَ گپ ءُ تران

اسلام آباد۔18اپریل  (اے پی پی): واشنگٹن ڈی سی ءَ ورلڈ بینک ءُ آئی ایم ایف ءِ بہار ءِ دیوان ءِ ساھت ءَ وفاقی وزیر ءِ ھزانگ ءُ آمدنی سینیٹر محمد اورنگزیب ءَ امریکی خزانہ ءِ ڈپٹی سیکرٹری فرانسس بروک ءِ گوما جوانیں گند ءُ نند کت۔ وزیر خزانہ ءَ پاکستان ءِ میکرو اکنامک استحکام، میاں اوستمانی سرمایہ کاری مارکیٹ آنی تہ ءَ دوبر داخل بوھگ ءِ منصوبگ ءُ درائیں قرض آنی بندوبست ءِ حکمت عملی ءِ سر ءَ چار ءُ تپاسی کت۔ وزارت خزانہ ءِ نیمگ ءَ جاڑی بوتگیں بیان ءِ رد ءَ آئی ءَ پاکستان ءِ معدنی ءُ توان ءِ شوبگ ءَ سرمایہ کاری ءِ ھاسیں موہ آنی سر ءَ چمشانک داتگ ءُ امریکی خزانہ ءِ سروکی ءَ را ڈیجیٹل ءُ ورچوئل اثاثہ آنی ضوابط ءِ تہ ءَ پیشرفت ءُ آسراتی آنی بابت ءَ سرپد کتگ۔ دوئیں نیمگ ءَ توانائی، معدنیات ءِ دیمروئی، ءُ منی لانڈرنگ ءُ ناشرکاری ءِ مالی کمک ءِ گر ءُ دار ءِ واستہ فریم ورک ءَ را مھکم کنگ ءِ واستہ کمک ءِ امکانات آنی سر ءَ تران کت۔ وزیر خزانہ ءَ دو نیمگی اقتصادی سیادی ءِ گہتری ءُ مھکمی ءِ سر ءَ یک رندے پدا پاکستان ءِ میاں اوستمانی مالیاتی فنڈ پروگرام ءِ واستہ امریکہ ءِ برجاھیں کمک ءِ ارزشت ءِ سر ءَ زور پر دات۔