فیلڈ مارشل سید عاصم منیر، وزیر داخلہ محسن نقوی ایران ءِ سئے روچی سرکاری تر ءُ تاب ءَ سرجم کن انت

راولپنڈی۔18اپریل  (اے پی پی): دیمپانی فورسز ءِ سروک، آرمی چیف، فیلڈ مارشل سید عاصم منیر ہلال جرائت نشان امتیاز (ملٹری) ءُ تہی کارانی وزیر محسن نقوی ءَ یک ڈل ءِ گوما ایران ءِ سئے روچی سرکاری تر ءُ تاب سرجم کتگ۔ انٹر سروسز پبلک ریلیشنز ءِ نیمگ ءَ چہ جاڑی بوتگیں پریس ریلیز ءِ رد ءَ فیلڈ مارشل ءَ وتی تر ءُ تاب ءِ وھد ءَ ایران ءِ صدر ڈاکٹر مسعود پیزشکیان ءَ گوں گند ءُ نند کتگ ءُ راجی اسمبلی ءِ سپیکر محمد باقر قالیباف ، وزیر خارجہ عباس عراقچی  ءُ  خاتم الانبیاء ہیڈ کوارٹرز  ءِ کمانڈر میجر جنرل علی عبداللہی ءَ گوں گند ءُ نند آنی ساھت ءَ دمگ ءَ پائیدار امن ءِ ھاترا دلگوشی دیگ بوت ءُ دمگ ءَ پائیدار امن ءُ ایمنی ءِ دیمروئی ءِ واستہ دمگی ایمنی ءِ جاور ھال، برجاھیں سفارتی ھواریں کار ءُ کوآپریٹو گامگیج آنی سر ءَ زور پر دیگ بوت۔ فیلڈ مارشل ءَ برجاھیں سفارتی ھوار بوھگ ءِ وسیلگ ءَ گپ ءُ تران، ڈی اسکالیشن ءُ بقایا جیڈھ آناں پرامن گیواری ءِ ضلورت ءِ سر ءَ زور پر دات۔ فیلڈ مارشل سید عاصم منیر ءَ ایران ءِ سروکی ءُ الس ءِ نیمگ ءَ چہ پیش داشتگیں گرمیں مہمان داری ءَ را ساڑات۔ آئی ءَ صدر آصف علی زرداری، مزن وزیر محمد شہباز شریف ءُ پاکستان ءِ الس ءِ نیمگ ءَ ایران ءِ سروکی ءَ را دل ءِ جہلانکی ءَ چہ مبارکی ءُ نیکیں واھگ آناں سر کت ءُ دوئیں ملک آنی نیام ءَ راجدپتری ءُ براتی سیادی ءَ را گیش مھکم کنگ ءِ پاکستان ءِ واھشت ءِ سر ءَ زور پر دات۔ اے تر ءُ تاب ءَ گپ ءُ تران ءِ وسیلگ ءَ میاں اوستمانی جیڈھ آناں گیواری ءُ خطہ ءَ امن، مھکم ءُ وشھالی ءِ دیمروئی ءِ واستہ پاکستان ءِ بے مٹیں جزم ءِ درشان کنگ بیت۔