صدر آصف علی زرداری نا کویتی سرکڑدہ غاتے قومی دے و ہالہ فرورینا دود آتا وخت آ مبارکباد

اسلام آباد۔ 25 فروری (اے پی پی)صدر مملکت آصف علی زرداری چار شنبے نا دے آ کویت نا قومی دے و ہالہ فروری نا دودآتاخوشی آ امیرِ کویت شیخ مشعل الاحمد الجابر الصباح و کویت نا برادر الس ءِ مبارکبادی پیش کرے و اوفتے  کن نیک است خواہی تا درشانی ءِ کرے۔ایوانِ صدر نا پریس ونگ انا رد اٹ صدر مملکت پارے کہ دا دود آک  امیرِ کویت نا پامدار کماشی ٹی کویتی قوم انا استقامت ، سیوت  و پدریسہ شونداری نا ڈیک ءِ ۔ صدر مملکت امیرِ کویت نا پن آ تینا چٹھی ٹی پاکستان و کویت نا نیام اٹی گہرا تاریخی تعلقداری تے تالان کرسا پارے کہ دا رابطہ غاک اسہ ایلو آ پت ، اسیجائی قدر و علاقائی امن و شادمانی نا عزم آ جوڑ ءُ۔او پارے کہ ہڑتوم آ ملک آتا نیام اٹبرادرانہ تعلقداری واپار ، زرکاری ، انفارمیشن ٹیکنالوجی، دفاعی کمک و السی کہول آ رابطہ غاتون اوار جتا اہم انگا بشخ آتیٹی مدام مون آ ہِننگ ءُ ۔ صدر آصف علی زرداری کویت اٹی ہنکینی متحرک پاکستانی برادری ءِ ہڑتوم آ ملک آتانیام اٹ اسہ اہم ءُ پول اس گونداہرا کویت نا شونداری ٹی مثبت کڑد ادا کننگ تون اوار اوار ہڑتوم آ قوم تا نیام اٹی تعلقداری تے پین سوگو کننگ اٹی ءُ۔او دا عزم نا درشانی ءِ کرے کویت نا شونداری و شادمانی نا سفر اٹی پاکستان ہڑتوم آ ملک آتا اسیجائی فائدہ غاتے ٹی ہڑتوم آ کنڈآتا کمکاری ءِ پین مون آ دیک ۔ صدر مملکت امیرِ کویت نا جان جوڑی، کویتی الس نا پدریسہ شادمانی و پاکستان و کویت نا نیام اٹ برادرانہ تعلقداری تا پائیدار سوگوی کن نیک است خواہی نا درشانی ءِ کرے۔