تعلیمی ادارہ غاتے صنعت تون ہم گرنچ کننگ نا دمدستی گرج ءِ، بنجائی وزیر واپار جام کمال خان نا نسٹ انا دورہ نا وخت آ گپ وتران

اسلام آباد۔ 13 فروری (اے پی پی) بنجائی وزیر واپار جام کمال خان تدوک آ دے نیشنل یونیورسٹی آف ٹیکنالوجی نا دورہ ءِ کرے۔ تینا دورہ ٹی او یونیورسٹی نا اسہ مچی اسے آن بطور مہمان خاص تران کرساپارے کہ تعلیمی ادارہ غاتے صنعت تون ہم گرنچ کننگ و پاکستان ءِ ترندی اٹ پدتموک جہانی ٹیکنالوجی نا منظرنامہ کن تیار کننگ نا دمدستی گرج ءِ۔ جام کمال خان پارے کہ دنیا مصنوعی ذہانت، ڈیٹا اینالیٹکس ، کوانٹم کمپوٹنگ ، آٹومیشن  و ڈیجیٹل پلیٹ فارم آتا کمک اٹ اسہ بے مٹ تکنیکی بدلی اسے آن گدرینگ انگ ءِ۔ اوپارے کہ انجینئرنگ و پٹ وپول کروک آ قومک آخبت نا جہانی زرگزران ءِ ٹہیفنگ ءُ، ’’ٹیکنالوجی داسہ اختیاری اف ، دابنداوی ءِ‘‘۔ اومستی پارے کہ اینو اسہ ہی سمارٹ فون جہانی معلومداری اسکان رسینگ تخوک بندغ آتے واکدار کیک۔ اوپارے کہ مصنوعی ذہانت نا اوزار فیصلہ سازی، پٹ وپول، گورننس و کاروباری مڈل آتے بدل کننگ ءِ و پاکستان دا مون آ بروک مصنوعی ذہانت اٹ چلینگوک آ چاگڑدی نظام اٹی تینے فعال وڑاٹ بایدے سلفے۔ اوڈیٹا سینٹرز، ڈیجیٹل انفراسٹرکچر و پوسکن مینوفیکچرنگ نا جہانی ودکیءِ مون آ تخسا پارے کہ آخبت نا زرگزران توانائی نا کارکڑد، سیمی کنڈکٹرز، اہم معدنیات، و بڑزکو کسب کار انجینئرآتیا بھاز زیات سیبو کیک۔ پاکستان نا معدنی وسیلہ بشمول ، تانبا و نایاب ڈغار نا عناصر آتا حوالہ ءِ ترسا اوپارے کہ ملک اٹی کاریم اٹ اتنگ نا قابل لائخی ساڑی ءِ ہرادے پوسکن آ ٹیکنالوجی و پالیسی اصلاحات نا کمک اٹ حکمت عملی اٹ بایدے کاریم اٹ اتنگے، پالیسی فریم ورک تکنیکی بدلی اتون بایدے تیار مرے۔