پاکستان ءِ جان سلامتی ءِ نظام ءِ گہتری ءِ واستہ جان سلامتی ءِ مراگش آنی مھکم کنگ حکومت ءِ اولی ترجی اِنت، راجی جان سلامتی ءِ وفاقی وزیر سد مصطفیٰ کمال

اسلام آباد۔12فروری  (اے پی پی): راجی جان سلامتی ءِ وفاقی وزیر سد مصطفیٰ کمال ءَ وفاقی حکومت ءِ اے جزم ءِ یک رندے پدا گوشت کہ پاکستان ءَ جان سلامتی ءِ نظام ءِ گہتری ءِ واستہ جان سلامتی ءِ مراگش آناں مھکم کنگ اولی ترجی اِنت پرچا کہ استیں نظام ءِ تہ ءَ راستیں کمی ھمے تک ءَ گندگ بیت۔ اے ھیالانی درشانی آئی ءَ بنجاہی جان سلامتی ءِ ھوالگ ءَ برجم داشتگیں مراگش ءَ گوں تران کنان ءَ کت۔ آئی ءَ گوشت کہ حکومت اے گپ ءَ شری ءَ سرپد اِنت کہ ملک ءَ جان سلامتی ءِ نظام ھما وڑ ءَ کار کنگ ءَ نہ اِنت ھاسیں رنگ ءَ جان سلامتی ءِ آسراتی آنی ھرچ ءُ درچ ءِ تہ ءَ فرق ءِ سبب ءَ الس دیم پہ دیم مزنیں ءُ سیمی درجہ ءِ دمگی اسپتال آنی تہ ءَ رو اَنت ایشی ءَ چہ اے ادارگ آنی سر ءَ بے وسی ءِ بار ءِ سبب جوڑ بیت۔ آئی ءَ گوشت کہ ترتیری ہسپتال آنی تہ ءَ آیوکیں نادراہ آنی تہ ءَ نزیک ءَ 70 درسد ھما نادراہ اَنت کہ آھانی علاج پرائمری یا سیکنڈری تک ءَ ممکن بوتگ بلے گس ءَ چہ ہسپتال ءِ سفر ءِ وھد ءَ جوانیں آسراتی ءِ نہ بوھگ ءِ سبب ءَ آ مزنیں ہسپتال آنی تہ ءَ سر بنت۔ اے جاور ءِ ذمہ وار مردم نہ انت بلکیں نظام ءِ تہا ھواریں خلاء ءِ ذمہ وار انت کہ حکومت ایشی ءِ پُر کنگ ءِ ھاترا عملی گامگیج زورگ ءَ انت۔ آئی ءَ گوشت کہ حکومت شو پروجیکٹ آنی بدل ءَ ٹھوس ءُ دیریں اصلاحات آنی سر ءَ کار کنگ ءَ انت۔ وژن ایش انت کہ آیوکیں وھد ءَ ریفرل سسٹم ءَ را کارآمد جوڑ کنگ بہ بیت تانکہ ایوک ءَ ھما نادراہ کہ آھانی باقاعدہ ریفرل ھست انت آ ترتیری ہسپتالاں رو انت وھدے کہ 90درسد نادراہ وتی لوگانی نزیک ءَ جوڑ بوتگیں جان سلامتی مراگشاں علاج کنگ بہ بنت۔ نوکیں ٹیکنالوجی، رسد ءُ ڈیجیٹلائزیشن ءِ وسیلگ ءَ اے فرق ءَ را کم کنگ بوت کنت۔ کورونا ءِ وبا ءِ وھد ءَ ٹاڈا دوا ءِ تاثیر بازیں رنگ ءَ ثابت بوتگ۔ اے درگت ءَ وفاقی حکومت ءَ 10بناکادی جان سلامتی مراگش آنی تہ ءَ ٹیلی میڈیسن ءِ پائلٹ پروجیکٹ بندات کتگ ایشی ءِ تہ ءَ 6 اسلام آباد ءَ ءُ 4 کراچی ءَ جوڑ کنگ بوتگ اَنت۔ آئی ءَ گوشت کہ اے مراگش آنی تہ ءَ بنجاھی کارندہ آناں آن لائن ایکسپرٹ ڈاکٹر آنی گوما تربیت دیگ ءُ ھمگرنچ کنگ بوتگ تانکہ ایکسپرٹ میڈیکل رائے نادراہ آناں پجارینگ بہ بیت۔ اے نظام ءِ چیر دستی ءَ درملک ءَ نندوکیں پاکستانی ڈاکٹر ھم ازمت دیگ ءَ انت ۔ یک رندے دوریں دمگے ءِ نادراہ ءِ قطر (دوحہ) ءَ ھستیں زالبولیں ڈاکٹر ءِ نیمگ ءَ آن لائن ءِ چکاس کنگ بوتگ کہ اے نظام ءِ کارکردگی ءِ عملی ثبوت اِنت۔ ایشی ءَ ابید اے وڑیں لائکیں جنین ڈاکٹر ھم اے نظام ءِ بھر جوڑ کنگ بوھگ ءَ اَنت کہ آ وتی ذاتی سبب ءَ اے مراکز ءَ جسمانی رنگ ءَ ھست نہ اَنت بلے نوں آ چہ وتی لوگاں آن لائن سروسز دیگ ءَ اَنت۔ وزیر جان سلامتی ءَ گوشت کہ جتا جتائیں پڑ آنی ماہرین ھپتگی بنیاد ءَ دست ءَ بنت تانکہ زھگ، زالبول ءُ ایندگر نادراہ وھد ءِ سر ءَ رہشونی ءَ بہ کن اَنت۔ آئی ءَ گوشت کہ پاکستان ءِ آبادی نزیک ءَ 240ملین اِنت ءُ ھمک سال 6.19ملین زھگ ودی بوھگ ءَ اَنت کہ اے نزیک ءَ نوکیں ملک ءِ آبادی ءِ برابر اِنت۔ اے زھگاں سرکار ءِ نیمگ ءَ 13 جتا جتائیں ویکسین دیگ بنت بلے ایشی ءِ باوجود چار لکھ ءَ چہ گیش زھگ زیرو ڈوز ءِ زمرے ءَ ھوار کنگ بنت کہ اے جیڑھ ءِ گپ اِنت۔ آئی ءَ اپسوز ءِ درشانی کتگ ءُ گوشتگ کہ پاکستان ءَ ھمک سال نزیک ءَ 11 ھزار مات زھگ دارگ یا زھگ ءِ ودی کنگ ءِ وھد ءَ وتی جان ءَ چہ دست کش بنت کہ اے سکیں مزنیں جیڑھے ۔ ہر 10 ہزار حمل ءِ تہا 400 ءِ نزیک ءَ مرگ ءِ تناسب پہ ہچ مہذبیں چاگرد ءَ منّگ نہ بیت۔ آئی ءَ گوشت کہ سرجمیں راج ھرچ وڑیں سانحہ ءِ تہ ءَ لھتیں درجن بے گناھیں مردمانی بیرانی ءِ سر ءَ غم ءُ اندوہ ءِ آماچ اِنت بلے مات ءُ زھگ ءِ جان سلامتی ءِ ھوالگ ءَ برجاھیں کوشست تاوان آنی سر ءَ ھم ھمے سنگینی ءَ گوں چار ءُ بچار کنگ لوٹ اِیت۔ آئی ءَ اے جزم ءِ پدا زور دات کہ حکومت جان سلامتی ءِ نظام ءِ گہتری، موثر ویکسینیشن، مات ءُ زھگ ءِ جان سلامتی ءِ رکھینگ ءُ نوکیں ٹیکنالوجی ءِ کارمرز کنگ ءِ وسیلگ ءَ جان سلامتی ءِ شوبگ ءَ دائمی اصلاحات ءِ ھاترا جزم انت ءُ اے مشن ءَ را دانشور، ماہرین ءُ پالیسی ساز آنی گوما شور ءُ سلاھ ءَ دیم ءَ برگ بیت۔