ڈاکٹر مختار احمد بھرتھ ءِ گشگ انت کہ انوگیں گامگیج آنی مول ءُ مراد اسلام آباد ءَ را درچکاں چہ رکّینگ نہ انت بلکیں پولن الرجی ءِ وڑیں مزنیں جیڑھے ءِ سر ءَ کنٹرول کنگ انت

اسلام آباد۔11فروری  (اے پی پی): راجی جان سلامتی ءِ وزیر ءِ مملکت ڈاکٹر مختار احمد بھرتھ ءَ گوشت کہ گوستگیں گامگیج آنی مول ءُ مراد اسلام آباد ءَ را درچک آنی چہ آجو کنگ نہ اِنت بلکیں پولن الرجی ءِ وڑیں سنگینیں جیڈھ ءِ سر ءَ کنٹرول کنگ ءُ شھمک ءَ را یک متوازنیں ماحولیاتی نظام ءِ نیمگ ءَ برگ اِنت۔ اے ھیالانی درشانی آئی ءَ وفاقی دارالحکومت ءَ درچک کشی مہم ءِ ھوالگ ءَ برجم داشتگیں مراگش ءَ گوں تران کنان ءَ کت۔ آئی ءَ چیئرمین سی ڈی اے ءَ را شگر ءُ منت درشان کت کہ آئی ءَ درچک ءِ کشت ءُ کشار ءِ مہم ءِ برجاہ دارگ ءُ آیوکیں درستیں مزنیں مہم آنی تہ ءَ سرجمیں کمک ءِ یقین دہانی کت۔ آئی ءَ گوشت کہ محکمہ جان سلامتی ءُ سی ڈی اے ءِ یکجائی کوشست آنی تہ ءَ بنداتی بھر ءَ 28 ءَ چہ 29 ہزار ءِ کساس ءَ درچک کشگ بوتگ ایشی ءَ پد پولن ءِ کساس ءَ مزنیں کمی ریکارڈ کنگ بوتگ۔ اے گامگیج ءِ مستریں مول ءُ مراد شھمکیاں چہ پولن ءِ الرج ءَ رکھینگ ءُ آ یک نارملیں زند گوازینگ ءِ اہل کنگ بوتگ۔ درچک ءِ کشت ءُ کشار ءِ وھد ءُ پاس ءِ بابت ءَ تنقید ءِ سرا چمشانک دیان ءَ گشگ بوت کہ کشت ءُ کشار کتگیں درچک ھما عمر ءُ کساس ءِ بوتگ انت کہ آ شرتر دیم ءَ بہ رو انت۔ شکرپریان ءِ جاہ ءَ 8743 ءِ نزیک ءَ درچک کشگ بوتگ انت۔ سی ڈی اے ءِ رد ءَ اے جاہ ءَ تاں انوگ ءَ نزیک ءَ 10 ہزار نوکیں درچک ءِ کشگ بوتگ وھدے کہ آیوکیں یک ماہے ءَ دگہ 30 ہزار درچک ءِ کشگ ءِ منصوبگ است انت۔ آئی ءَ گوشت کہ شھمکی آنی بھر زوری ءُ شفافیت ءَ را دل یکیمی کنگ ءِ واستہ زوت جدید کیو آر کوڈ ءُ موبائل ایپ سسٹم ءِ بندات کنگ بیت۔ ھمک درچک ءِ سرا کیو آر کوڈ ایر کنگ بیت کہ ایشی ءِ وسیلہ ءَ ایشی ءِ نگرانی، رکھینگ ءُ دیمروئی ءِ ریکارڈ جوڑ کنگ بیت۔ وفاقی دارالحکومت ءَ درچک ءِ کشت ءُ کشار ءِ مہم ءِ ھوالگ ءَ برجم داشتگیں مراگش ءَ گوں تران کنان ءَ گشتانک دیوکاں نودربر، سول سوسائٹی ءُ شھمکی آنی سرگرمیں بھر زوری ءَ را ساڑات ءُ گوشت کہ اسلام آباد ءَ را پدا سبز ءُ چاگرد دوستیں شھمک جوڑ کنگ مئے درست آنی یکجائی ذمہ واری اِنت۔ دیمترا چاگردی زانتکار ءُ جنگل ءِ کارندہ آنی رہشونی ءَ اسلام آباد ءِ مستریں شاھمکاہ آنی سر ءَ درچک ءِ شماری بندات کنگ بوتگ۔ شھمک ءِ تہ ءَ درستیں درچک باقاعدگی ءَ رجسٹر آنی تہ ءَ رجسٹرڈ کنگ بوھگ ءَ اَنت ءُ سرجمیں ڈیٹا جوڑ کنگ بوھگ ءَ اِنت دانکہ آیوکیں وھد ءَ جوانیں منصوبگ بندی کنگ بہ بیت۔ آہاں اے عزم ءِ پدا زور دات کہ اسلام آباد ءَ را یک جان سلامتی، سبز ءُ چاگردی توازن ءِ شھمک جوڑ کنگ ءِ ھاترا گامگیج برجاہ بنت۔