مزن وزیر ءِ صنعت ءُ پیداوار ءِ ھاسیں کمکار ہارون اختر خان ءَ کمبوڈیا ءِ وزیر تجارت چم نیمول ءَ گوں گند ءُ نند کتگ، دوئیں ملک آنی نیام ءَ اقتصادی ءُ صنعتی کمک ءِ بابت ءَ گپ ءُ تران

اسلام آباد۔11فروری  (اے پی پی): مزن وزیر ءِ صنعت ءُ پیداوار ءِ ھوالگ ءَ ھاسیں کمکار محمد شہباز شریف ءَ گوں کمبوڈیا ءِ وزیر تجارت چم نیمول ءَ گوں گند ءُ نند کت ایشی ءِ ساھت ءَ دوئیں ملک آنی نیام ءَ اقتصادی ءُ صنعتی کمک ءِ دیمروئی ءِ ھوالگ ءَ گپ ءُ تران کت۔ وزارت صنعت ءُ پیداوار ءِ نیمگ ءَ جاڑی بوتگیں بیان ءِ رد ءَ دوئیں بامرد آں گند ءُ نند ءِ ساھت ءَ دو نیمگی اقتصادی ءُ صنعتی شریکداری ءَ را مھکم کنگ، آیوکیں سیادی آناں گیش کنگ ءُ سرمایہ کاری ءِ موہ آناں گیش کنگ ءِ سر ءَ ھیال ریچی کتگ۔ ہارون اختر خان ءَ گوستگیں سال آنی تہ ءَ کمبوڈیا ءِ وشیں اقتصادی دیمروئی ءِ توسیپ کنان ءَ گوشت کہ پاکستان کمبوڈیا ءِ دیمروئی ءِ تجربگ آناں چہ نپ چست کنت۔ آئی ءَ گوشت کہ مزن وزیر محمد شہباز شریف ءِ وژن ءِ چیر دستی ءَ پاکستان ءِ معیشت ءَ را مھکم کنگ ءِ واستہ سرجمیں گامگیج کنگ بوھگ ءَ انت۔ آئی ءَ گوشت کہ مزن وزیر محمد شہباز شریف ءِ سروکی ءَ اقتصادی دیمروئی ءَ را ترند کنگ ءُ صنعتی شوبگ ءَ را دیمروئی دیگ ءِ واستہ راجی صنعتی پالیشی ءُ راجی ٹیرف پالیشی جوڑ کنگ بوتگ۔ کمبوڈیا ءِ وزیر تجارت ءَ پاکستان ءِ قدرتی زیبائی، پراھ ءُ شاھگانیں وسیلگ ءُ مھکمیں دیمپانی توانائی آنی توسیپ کت۔ دوئیں رہشون آں صنعتی شوبگ ھاسیں رنگ ءَ ٹیکسٹائل انڈسٹری ءِ تہ ءَ کمک ءَ را گیش کنگ ءِ سر ءَ تپاک کتگ کہ ایشی ءِ تہ ءَ دوئیں ملک ویلیو ایڈیشن ءِ وسیلگ ءَ وت مہ وتی نپ آناں رسگ ءَ اَنت۔ کمبوڈیا ءِ وزیر ءَ گوشت کہ اے وھد ءَ کمبوڈیا ءَ 166 پاکستانی کمپنی کار کنگ ءَ اَنت ءُ آھاں آسراتی ءِ واستہ اودا چیمبر آف کامرس اینڈ انڈسٹری ءِ جوڑ کنگ ءِ واستہ واھشت ءِ درشان کت۔ آئی ءَ دوئیں ملک آنی نیام ءَ کاروباری ڈل آنی بدلی ءِ ھم تجویز پیش کتگ تانکہ تجارتی ءُ کاروباری سیادی آناں گیش مھکم کنگ بہ بیت۔ ہارون اختر خان ءَ کسانیں ءُ میاں اوستمانی کاروباری دیمروئی اتھارٹی ءِ وسیلگ ءَ مائیکرو، کسانیں ءُ میاں اوستمانی کاروباری ادارگ آنی پڑ ءَ کمک ءِ مزنیں امکانات آنی سر ءَ زور پر دات۔ آئی ءَ گوشت کہ مزن وزیر محمد شہباز شریف ءِ وژن ءِ چیر دستی ءَ سمیڈا ءَ جوانیں کارکردگی ءِ درشان کتگ ءُ اے ادارگ کمبوڈیا ءِ گوما کمک ءَ را دیمروئی دیگ ءَ ھاسیں کرد پیلو کت کنت۔ پاکستانی ایس ایم ایز ءِ بے دروریں توانائی ءِ ذکر کنان ءَ آئی ءَ گوشت کہ زیتون ءِ تیل، شہد ءُ چمڑی ءِ چیز چوشکہ ”میڈ ان پاکستان“ ءِ چیز مزنیں کوالٹی ءِ اَنت ایشی ءَ را جھان ءِ مارکیٹ آنی تہ ءَ جوانیں رسائی ءِ ضلورت اِنت۔ آئی ءَ پاکستانی زالبولیں کاروباری مردم آنی گس ءَ چہ کار کنگ ءِ کرد ءَ را ھم ساڑات ءُ آوانی واستہ برآمداتی موہ آنی پجاری ءِ ارزشت ءِ سر ءَ زور پر دات۔ ھاسیں کمکار ہارون اختر خان ءَ دوئیں ملک آنی نیام ءَ دوستی ءُ نیک راھی ءِ نشان ءِ رنگ ءَ کمبوڈیا ءِ وزیر تجارت ءَ را سوغات داتگ۔