موسمیاتی بدلی ءُ چاگردی یکوئی ءِ وفاقی وزیر ڈاکٹر مصدق ملک ءَ قازقستان ءِ سفیر ءَ گوں گند ءُ نند کتگ، آئی ءَ را دمگی چاگردی سروک دیوان ءَ بھمک زورگ ءِ دعوت داتگ

اسلام آباد۔11فروری  (اے پی پی): جمہوریہ قزاقستان ءِ سفیر یرژان کستافن ءَ پاکستان ءَ موسمیاتی مٹ ءُ بدلی ءِ وفاقی وزیر ڈاکٹر مصدق ملک ءَ گوں گند ءُ نند کت۔ چار شمبے ءِ روچ ءَ موسمیاتی بدلی ءُ چاگردی رابطہ ءِ وزارت ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ سفیر ءَ پاکستان ءِ حکومت ءِ منت گپت کہ آئی ءَ گوستگیں وھد ءَ پاکستان ءِ تر ءُ تاب ءِ ساھت ءَ جمہوریہ قازقستان ءِ صدر کسیم جومارت توکایف ءُ آئی ءِ ڈل ءَ را گرمیں مہمانداری کتگ۔ آئی ءَ پاکستان ءُ قازقستان ءِ نیام ءَ براتی سیادی آنی پد ءَ دل یکیمی ءِ درشان کت۔ سفیر ءَ وفاقی وزیر ءَ را آیوکیں اپریل ءَ قزاقستان ءِ شھمک آستانا ءَ برجم دارگ بوھوکیں دمگی چاگردی سروک دیوان ءَ بھر زوری ءِ دعوت ھم داتگ۔ اے موہ ءِ سر ءَ وفاقی وزیر ڈاکٹر مصدق ملک ءَ دعوت ءِ وش اتک کت ءُ گوشت کہ پاکستان ءُ قزاقستان ءِ نیام ءَ راجدپتری ءُ دود ءُ ربیدگی سیادی است انت ایشاں گیش مھکم کنگ ءِ ضلورت انت۔ آئی ءَ اے گپ ءِ سر ءَ زور پر دات کہ دوئیں ملک یکے دومی ءِ تجربگ آنی چہ بازیں چیزے دربرگ ءَ انت ءُ نہ ایوک ءَ دو نیمگی تک ءَ بلکیں گیشیں میان اُستمانی دمگ ءَ ھم یکوئی کمک ءُ تجارت ءِ دیمروئی ءِ واستہ بازیں گنجائش است انت۔ گند ءُ نند ءَ صدر کزاقستان ءِ پاکستان ءِ تر ءُ تاب ءِ ساھت ءَ دستخط کتگیں مفاہمت نامہ ءِ سر ءَ عملی پیشرفت ءِ سر ءَ ھم ھیال ریچی کنگ بوت۔ فریقین ءَ مصنوعی ذہانت، مالیاتی ٹیکنالوجی (فن ٹیک) ءُ ای گورننس ءِ پڑ ءَ یکجائی منصوبگ ءُ کمک ءِ توانائی ءِ چار ءُ تپاسی کت۔ آپ ءِ کمی، موسمی بدلی ءُ ایندگر چاگردی چیلنج آنی وڑیں ھاسیں جیڈھ آنی سر ءَ ھم گپ ءُ تران کنگ بوت، ایشی ءِ تہ ءَ چاگردی رکھینگ ءُ پائیدار دیمروئی ءِ واستہ کمک ءَ را گیش مھکم کنگ ءِ سر ءَ زور دیگ بوت۔