حکومت ورناہانی دیمروئی ءُ روزگار ءِ واستہ جامع گامگیج زورگ ءَ انت، رانا مشہود احمد خان

لاہور۔11فروری  (اے پی پی): مزن وزیر ءِ ورنا پروگرام ءِ چیئرمین رانا مشہود احمد خان ءَ گوشت کہ حکومت ورنا آناں شریں روزگار ءِ پھجارینگ ءُ آھاں پاد آنی سر ءَ ایر کنگ ءِ واستہ سرجمیں گامگیج کنگ ءَ انت۔ آئی ءَ اے ھیالانی درشانی چار شمبے ءِ روچ ءَ گلشن راوی ءَ متحدہ عرب امارات ءِ کمک ءَ مستحقیں مردم آناں ریلیف پیکج بھر ءُ بانگ کنگ ءِ مراگش ءَ گوں تران کنان ءَ کت۔ رانا مشہود احمد خان ءَ گوشت کہ مزن وزیر محمد شہباز شریف ءِ سروکی ءَ ورنا پروگرام ءَ را گیش مھکم کنگ بوھگ ءَ انت تانکہ ورنا جھان ءِ تک ءِ وانگ ءُ زانگ ءُ ھنر ءَ گوں لیس کنگ بہ بنت۔ آئی ءَ گوشت کہ حلقہ ءِ الس آنی ھزمت کنگ منی اولی ترجی انت۔ آئی ءَ گوشت کہ مرچی پاکستان ءَ اولی اے آئی ہفتگ برجم دارگ بوھگ ءَ انت ایشی ءَ چہ ورنا آنی واستہ نوکیں ٹیکنالوجی ءِ پڑ ءَ نوکیں موہ رس ایت۔ آئی ءَ گوشت کہ اقتصادی جیڈھ آنی باوجود ملک ءَ جاور ھال روچ پہ روچ جوان بوھگ ءَ انت، حکومت دوستیں ملک آنی گوما شریکی ءَ را دیم ءَ برگ ءَ ورنا آنی واستہ وانگ ءُ زانگ، تربیتی ءُ روزگار ءِ موہ آناں گیش کنگ ءَ انت۔ رانا مشہود احمد خان ءَ گوشت کہ مزن وزیر محمد شہباز شریف ءِ کوھستیں سروکی ءَ سفارتی سوبمندی رسگ ءَ انت، ملک ءِ معیشت راستیں کش ءُ گور ءَ روگ ءَ انت ءُ میاں اوستمانی براتی پاکستان ءِ نیمگ ءَ شرپ ءُ شرپ ءِ گوما چارگ ءَ انت۔ آئی ءَ گوشت کہ تہاری ءِ دور ھلاس بوتگ ملک دیمروئی ءُ وشھالی ءِ نیمگ ءَ روگ ءَ انت۔ آئی ءَ گوشت کہ بنجاھی وزیر مریم نواز ءِ جوانیں گورننس ءِ سبب ءَ لاہور ءَ دو دہک ءَ پد دیمروئی ءُ وشھالی ءِ ندارگ گندگ بوتگ ءُ صوبہ مزنیں تیزی ءَ گوں دیمروئی ءِ نیمگ ءَ جنزگ ءَ انت۔ آئی ءَ گوشت کہ دمگی ءُ جھان ءِ کار آنی تہ ءَ پاکستان ءِ ھوار بوھگ ناگزیر بوتگ ءُ ھاسیں موہ آنی سر ءَ میاں اوستمانی براتی پاکستان ءِ نیمگ ءَ چارگ ءَ انت۔ رانا مشہود احمد خان ءَ گوشت کہ لھتیں عناصر کارکردگی ءِ دیم ءَ آشوب ءِ دیمروئی ءِ کوشست ءَ کنگ ءَ اَنت، البت راج ءَ اے وڑیں رویہ رد کتگ اَنت۔ آئی ءَ گوشت کہ مزن وزیر محمد شہباز شریف امن کانفرنس ءَ بھر زوری ءِ واستہ امریکہ ءَ روگ ءَ انت ایشی ءَ چہ پاکستان ءِ جوانیں گلوبل کرد ءِ آدینک انت۔ آئی ءَ گوشت کہ لھتیں ملسلہ آمیدگس آنی تہ ءَ چار ءُ تپاسی ءَ انت، آمیدگس ایشانی پیسلہ ءَ کنت۔ رانا مشہود احمد خان ءَ گوشت کہ گہتریں حکمت عملی ءُ نوکیں ٹیکنالوجی ءِ کمک ءَ پاکستان ءَ بھارتی جنگی بالی گراب ایر کتگ اَنت وھدیکہ بنگلہ دیش ءِ سر ءَ آئی سی سی ءِ پابندیاں ملسلہ ءَ پاکستان ءَ جوانیں سفارتی حکمت عملی ءِ گوما بنگلہ دیش ءَ را مالی تاوان ءَ چہ رکھینگ ءِ تہ ءَ کرد پیلو کتگ۔ آئی ئَ گوشت کہ سبزیں ماہ ءُ استال ءِ بیرک پاکستان ءِ راستیں پجار ئُُ یکوئی ءِ نشان اِنت، راج ایشی ءِ ساہگ ءِ چیر ئَ یک مُشت مان ئَ بہ بیت۔ اے موہ ءِ سر ءَ امارات ءِ سفیر سالم الزھابی ءَ کمکی سامان بھر ءُ بانگ کتگ ۔ صفران ءَ گوشت کہ آ مزن وزیر ءِ ورنا پروگرام ءِ چیئرمین رانا مشہود احمد خان ءِ منت وار آں کہ آئی ءَ اے موہ داتگ کہ آ خدمت ءَ بہ کنت۔ آئی ءَ گوشت کہ امارات ءِ حکومت گوستگیں وھد ءَ ھم سیلاب ءِ آماچیں مردم آناں کمک کنگ ءَ بوتگ ءُ آیوکیں وھد ءَ ھم کمکی کار آنی اے سلسلہ برجاہ بیت۔ صفران ءَ گوشت کہ پاکستان یک برات ءِ اسلامی ملک انت، امارات مشکلیں وھد ءَ پاکستانی الس ءِ کمک ءَ برجاہ دار ایت۔ مراگش ءَ دمگی مہمان، رفاہی ادارہانی نمائندگ ءُ مستحقیں مردماں بھمک زرتگ ءُ کمکی چیزانی بھمک ءُ بانگ ءِ ستا کرتگ۔