وانگ ءُ زانگ اولی راجی اولویت انت، زانت ءُ زانش  ءُ کانومی   وت جوڑیشیتی ھیل کاری   آؤکیں وھد ءِ  کشک  انت، وفاقی وزیر وانگ ءُ زانگ ءُ ھیل کاری

اسلام آباد۔11فروری  (اے پی پی): وانگ ءُ زانگ ءُ تربیت ءِ وفاقی وزیر ڈاکٹر خالد مقبول صدیقی ءَ گوشت کہ استیں ترندیں دور ءَ اے گپ ءِ سرپد بوھگ المی اِنت کہ مارا چیزے رسگ لوٹ ایت۔ زانت ءُ زانش ءُ ھیل کاری   مئے آیوکیں وھد انت پمیشکا مارا وانگ ءُ زانگ ءُ علم ءِ گچین کنگی انت پرچا کہ وانگ ءُ زانگ مئے اولی راجی اولویت انت ءُ نصاب آئی ءِ دل انت۔ وفاقی وزیر ءَ راجی نصاب کانفرنس ءَ گوں گشتانک دیان ءَ گوشت کہ دگنیا گوں ترندی ءَ بدل بوھگ ءَ اِنت ءُ ھما راج کہ وت ءَ را بدل کنگ ءِ ارادہ نہ کن اَنت آ پشت کپتگ اَنت۔ ڈاکٹر خالد مقبول صدیقی ءَ گوشت کہ ھچ ملک ایوک ءَ دیمروئی نہ کنت بلکیں سرجمیں دمگ دیمروئی کنت البت مارا اے گپ ءِ سرپد بوھگی انت کہ ما وتی دمگ ءَ پد منتگ ایں ۔ آئی ءَ گوشت کہ 1947 ءَ مغربی پاکستان ءِ آبادی ءِ کساس 250ملین ءَ چہ 300ملین بوتگ ءُ وسیلگ ھم دست کپتگ انت وھدیکہ مئے ھمساھگیں ملک سکیں گریبی، قدرتی آفت ءُ چاگردی آشوب ءِ آماچ بوتگ انت۔ چین ءَ قحط ءُ گریبی ءِ ھال باز بوتگ ات، جاپان ایمس ءِ آفت ءَ چہ گوستگ ات ءُ کوریا ءُ ملایا ءَ را دنیا ءِ پڑ ءَ ہچ وڑیں خاصیں جاہ نیست ات بلے مرچی آ ملک دیمروئی ءِ دوڑ ءَ دیم ءَ انت۔ آئی ءَ گوشت کہ مارا دیمروئی کتگیں دگنیا ءِ وانگ ءُ زانگ ءِ ماڈل آنی تہ ءَ چہ دربرگ لوٹ ایت۔ مئے راجی نصاب ءَ را راجی لوٹ، نظریاتی بنیاد، مذہبی قدر، دمگی لوٹ ءُ ذہنی یکوئی ءِ سرا ھیال ءُ لیکہ کنان ءَ جوڑ کنگ بہ بیت، البت ایشی ءِ ہمراہی ءَ بدل بوؤکیں جھان ءِ لوٹانی سرا نزیکیں چماں دارگ ہم المی انت۔ وفاقی وزیر ءَ گوشت کہ پاکستان ءِ 250ملین آبادی ءِ تہ ءَ نزیک ءَ 60درسد ورنا اَنت، ایشانی تہ ءَ مزنیں کساس ءَ ڈگری زورگ ءَ پد ھم روزگار ءِ شوھاز ءَ اَنت۔ اے جاور ھال ءِ رد ءَ ڈگری ءِ ھمراھی ءَ ھُنر ءِ پھجارینگ سک باز المی اِنت ءُ ایشی ءِ ھاتر ءَ یک ھمگرنچیں کوشست ءِ ضلورت اِنت۔ آئی ءَ وانگ ءُ زانگ ءِ ایمرجنسی ءِ ھال ءَ گوشت کہ نزیک ءَ 250ملین ءَ چہ 300ملین زھگ وانگ ءُ زانگ ءَ چہ در اَنت وھدیکہ ھر پنچ زھگ آنی تہ ءَ چار زھگ وانگ ءِ گریبی ءِ آماچ اَنت۔ اے اعداد و شمار ءِ ھاتر ءَ راجی تک ءَ ترندیں ءُ یکجاھیں گامگیج آنی ضلورت اِنت۔ ڈاکٹر خالد مقبول صدیقی ءَ اے گپ ءِ سر ءَ زور پر دات کہ راجی نصاب ءِ جیڈھ ءَ را راجی جزبگ ءَ گوں گیش ءُ گیوار کنگ لوٹ ایت تانکہ وانگ ءُ زانگ راستیں بزانت ءَ راجی دیمروئی ءِ وسیلہ جوڑ کنگ بہ بیت۔ آئی ءَ گوشت کہ اگاں ما وھد ءُ پاس ءِ سر ءَ راستیں پیسلہ نہ کن ایں گڈا ما رفتار ءِ رد ءَ پد منتگ بئیں، پمیشکا اے المی انت کہ ما وانگ ءُ زانگ ءِ اصلاحات ءَ گوں اجتماعی جزم ءَ دیم ءَ براں۔