گورنر بلوچستان تون وزیراعلیٰ پنجاب نا اوڑدہی، ملک انا جم امن و ایمنی و صوبہ نا تازہ انگا سیاسی حالیت آتیا گپ وتران

کوئٹہ۔ 10 فروری (اے پی پی) گورنر بلوچستان جعفر خان مندوخیل تون وزیراعلیٰ پنجاب مریم نواز گورنر ہاؤس کوئٹہ ٹی اوڑدہی کرے، ہراٹی ملک انا جم امن و ایمنی و صوبہ نا تازہ انگا سیاسی حالیت آتون اوار تین پہ تینی است خواہی نا امور آ گپ وتران کننگا۔ گورنر ہاؤس نا کنڈآن جاری بیان نا رداٹ اوڑدہی ٹی بلوچستان نا وزیراعلیٰ میر سرفراز بگٹی، اسپیکر بلوچستان اسمبلی کیپٹن (ر) عبدالخالق اچکزئی، صوبائی وزیر آک و اسمبلی نا باسک آک و پنجاب نا چیف سیکرٹری زاہد اخترزمان ئسک ہم ساڑی ئسر۔ داوخت آ گورنر بلوچستان پارے کہ داوخت آ بنجائی حکومت و صوبہ غاتا نیام اٹ جوان تعلقداری ءِ و بین الصوبائی ہم گرنچی ءِ مون آ دننگ و تین پہ تینی تعلقداری تے پین سوگو کننگ کن پبی گام گیج آتا گرج ءِ۔ گورنر بلوچستان کوئٹہ نا دورہ ءِ کننگ آ وزیراعلیٰ پنجاب نا منت واری ءِ ہرفے، ہراڑآ وزیراعلیٰ پنجاب مریم نواز پارے کہ او آخبت اٹی ہم نم تون رابطہ ٹی مریک۔ اوہرممکن کمکاری فراوان کننگ نا باوری کرفے۔ اوڑدہی ٹی ہڑتوم آ راہشونک صوبہ غاتا نیام اٹ تعلقداری تے پین جوان جوڑ کننگ تون اوار اوار السی کہول آ رابطہ غاتے مون آ دننگ آ امنا کریر۔ ایسر اٹی گورنر بلوچستان وزیراعلیٰ پنجاب مریم نواز ءِ یات گاری شیلڈ و روایتی قالین اس پیش کرے۔