پنجاب، بلوچستان ءِ ہرممکن کمک، وسیلہ و سپورٹ فراوان کننگ کن تیار ءِ، وزیراعلیٰ پنجاب مریم نواز نا دورہ کوئٹہ نا وخت آ گپ وتران

کوئٹہ۔ 10 فروری (اے پی پی) وزیراعلیٰ پنجاب مریم نواز شریف پارینے کہ بطور پاکستانی، وزیراعلیٰ پنجاب و اسہ ایڑھ اسے نا وڑاٹ پنجاب، بلوچستان ءِ ہرممکن کمک، وسیلہ و سپورٹ فراوان کننگ کن تیار ءِ، بلوچستان ءِ مون تروک چیلنج آتون مون تننگ کن استقامت نا گرج ءِ، و داحالیت آتیٹی صوبہ ءِ چلیفنگ آ وزیراعلیٰ بلوچستان خراج تحسین نا حقدار ءِ۔ دخیال آتا درشانیءِ او کوئٹہ نا دورہ نا وخت آ گپ وتران کرساکرے۔ داوخت آ گورنر بلو چستان شیخ جعفر خان مندوخیل، وزیراعلیٰ بلوچستان میر سرفراز بگٹی ، صوبائی وزیر آک، اسمبلی نا باسک آک و ایلو شخصیت آک ہم ساڑی ئسر۔ وزیراعلیٰ پنجاب پارے کہ بلوچستان آ بننگ آ ہرا شفقت و عزت تون بخیرکننگا اوڑآ او گورنر بلوچستان ، وزیراعلیٰ و حکومت بلوچستان نا منت وار ءِ۔ اوپارے کہ وزیراعلیٰ پنجاب گچین مننگ آن پد دااونا پین صوبہ اسے نا اولیکو دورہ ءِ۔ اوایف سی ہیڈکوارٹرز نا دورہ نا ذکر ءِ کرساپارے کہ ایف سی نا عزم ستاکڑزک، ہرادے خنسا اونا حوصلہ بڑزمس، وزیراعلیٰ پنجاب فتنۃ الخوارج آتا برخلاف برجاآپریشن و ایلو حکومتی چیلنج آتا بابت پورو کمکاری نا باوری کرفساپارے کہ پنجاب حکومت ہر کہول آبلوچستان تون سلوک ءِ۔ اواومیت ظاہر کرے کہ بلوچستان آن زوت دہشت گردی چٹک و دا صوبہ امن و شونہالی نا وت اس جوڑ مریک۔