ورناتے اے آئی نا تربیت ترسا کشت وکشار، صنعت، واپار تون اوار ہر بشخ اٹی انقلاب برپا کننگ مریک، وزیراعظم شہباز شریف نا انڈس اے آئی ویک 2026 نا بنائی دود آن تران

اسلام آباد۔ 09 فروری (اے پی پی) وزیراعظم محمد شہباز شریف 2030ء اسکان مصنوعی ذہانت (اے آئی) نا بشخ اٹی اسہ ارب ڈالر خڑچ کننگ، اے آئی نا نصاب تیار کننگ، اے آئی ٹی پی ایچ ڈی کن اسہ ہزار وظیفہ تننگ، آئی ٹی و اے آئی نا بابت کچ اٹی ودکی کن قومی کہول آ پروگرام نا بناءِ کننگ نا پڑو کرسا پارینے کہ ورناتا آبادی اسے اے آئی نا تربیت ترسا کشت وکشار، صنعت، واپار، تون اوار ہر بشخ اٹی انقلاب برپاکننگ مریک وپاکستان اقوام علم اٹی نمان ہند اس ودی کننگ کیک۔ داخیال آتا درشانی ءِ او دوشنبے نادے آ داڑے انڈس اے آئی ویک 2026 نا بنائی دود آن تران کرساکرے۔ داوخت آ گورنر سندھ آن بیدس احسن اقبال، شزافاطمہ خواجہ، عطاء اللہ تارڑ تون اوار بنجائی وزیرآک، سنگت ملک آتا سفارتی و بڑزکو سرکاری کمامدارآک ہم ساڑی ئسر۔ وزیراعظم محمد شہباز شریف پارے کہ انڈس اے آئی ویک ایونٹ ملک انا ٹیکنالوجی نا منظرنامہ ءِ بدل کیک، دا ایونٹ جہانی کہول آ پاکستان ءِ اسہ سوگو پارٹنر اسے نا وڑاٹ مون آاتیک۔ اوپارے کہ بطور وزیراعلیٰ پنجاب مسکوہی وزیراعظم محمد نواز شریف نا کماشی ٹی و اونا وژن نا رداٹ او تعلیم، جان جوڑی ، محصولات و ورناتا شونداری کن کیہی اہم ڈٹ آتا بناءِ کرے، بطور وزیراعلیٰ پنجاب ای آئی ٹی نا بشخ آ خاص چکار کرے و پنچ لکھ ہُشار طالب علم آتے لیپ ٹاپ تسن، ہمو وخت آ پنجاب اٹی ای لائبریز نا بناءِ کرین ہراتم کس اس اونا سجفتویسس ، لاہور اٹی اولیکو سیف سٹی ڈٹ و ملک انا اولیکو آئی ٹی یونیورسٹی ہم ہندا دور اٹی جوڑ کننگا، پنجاب لینڈ ڈیجیٹلائزیشن پروگرام نا کمک اٹ ڈغار تا ریکارڈ نا شفافیت ءِ پک کننگا، لینڈ ریکارڈ اٹی اصلاحات آن کرپشن نا چٹفنگ ممکن مس و ریونیو آفیسر آتا وڈی خوری ءِ چٹفنگا، ای اشٹام پیپرز آتے جاری کرسا کٹیاٹی ودکی کرین۔ وزیراعظم پارے کہ فیڈرل بورڈ آف ریونیو (ایف بی آر) نا پورو ڈیجیٹائزیشن آن محصولات آتا وصولی ٹی شفافیت ممکن مس، اسمگلنگ نا توننگ کن پوسکن سکینرو ازباب پورٹس آ خلنگا۔ اوپارے کہ پاکستان نا 24 کروڑ آبادی ٹی 60 درسد ورناءُ، اوفتے پوسکن آ علم و مہارت آتیان آراستہ کننگ وخت انا گرج ءِ۔ وزیراعظم پارے کہ پاکستان داسہ مصنوعی ذہانت نا بشخ اٹی جہانی کہول آ گام تخنگ کن تیار ءِ، خلقی آ علاقہ غاتسکان سرمسن و ورناتے پوسکن آعلم و تکنیکی مہارت فراوان کرین۔ وزیراعظم اسہ ملین غیر آئی ٹی پروفیشنلرآتے اے آئی ٹی تربیت فراوان کننگ، 1000 پورو فنڈ شدہ پی ایچ ڈی اسکالرشپ اے آئی نا بشخ اٹی تننگ و بنجاآن بیدس آزاد جموں وکشمیر ، گلگت بلتستان و بلوچستان نا پدسلوک علاقہ غاتیٹی ہم اے آئی نا تعلیم و نصاب درستی راستی کرفنگ و 2030ء اسکان اے آئی نا بشخ اٹی اسہ ارب ڈالر زرکاری نا پڑو کرے۔ اوپارے کہ ورناتے کشت وکشار، واپار و ایلو اقتصادی بشخ آتیٹی پوسکن آ ٹیکنالوجی نا تربیت فراوان کننگ نا گرج ءِ۔ پاکستان جہانی شریدار آتون اواری اٹ ٹیکنالوجی نا مثبت اثرآتے تینا کننگ کن سنبرینگوک ءِ، پاکستان ہر چیلنج نا مقابلہ ءِ کیک و جہانی برادری ٹی تیناجاگہ ءِ جوڑ کیک، زرگزران، صنعت، واپار وزالبول آتا حق اٹی اے آئی نا کمک اٹ انقلاب گمانی ءِ۔ اوپارے کہ صنعت، کشت وکشار، واپار تون اوار اے آئی نا کمک اٹ شونداری نا انقلاب اس برپاکننگ مریک، نن بھاز انگا گام گیج آتے کرینن ولے داسکان بھاز گڑا پین کننگ سلوک ءِ، پاکستان اقوام عالم اٹی تینا پن اس ودی کیک۔ بنجائی وزیر آئی ٹی شزافاطمہ انڈس اے آئی ویک 2026 آن تران کرسا پارے کہ پاکستان ڈیجیٹل انقلاب نا کنڈآ عزم اتون ہِننگ ءِ، ڈیجیٹل نیشن پاکستان ایکٹ انا رداٹ قومی ڈیجیٹل روڈ میپ اس تیار کننگا، وزیراعظم نا کماشی ٹی نیشنل ڈیجیٹل کمیشن اس جوڑ کننگا، پاکستان ڈیجیٹل اتھارٹی مچ آملک ڈیجیٹل ماسٹر پلان اس جوڑ کننگ ءِ ، ڈیٹا، سائبر سیکورٹی و اے آئی کن پیدوار گورننس فریم ورک اس جوڑ کننگا۔ اوپارے کہ پاکستان نا اولیکو قومی اے آئی پالیسی ستمبر 2025ء ٹی درستی راستی کرفنگا، 2026 ء ٹی اے آئی پالیسی آ عملدرآمد نا بناءِ کننگا، انڈس اے آئی ویک آن جامعہ، اسٹارٹ اپ و جہانی کمپنی تیٹی کمکاری ممکن مریک۔ اوپارے کہ ڈیجیٹل اسکلز پروگرام آن بنداوی اے آئی مہارت فراوان کننگ انگ ءِ، السی خذمت آتا بشخ آتے ڈیجیٹائز کننگ انگ ءِ، خراج نظام اٹی اے آئی ٹریک اینڈ ٹریس آن شفافیت اٹی ودکی مس۔ اوزور شاغا کہ نجی بشخ ڈیجیٹل بدلی نا کماشی ءِ کے۔ پاکستان جدت، علم و شونداری نا سفر ءِ برجاتخک۔ بنجائی وزیر ڈٹ بندی و شونداری احسن اقبال تران اٹی پارے کہ اے آئی اینو نا دور انا غٹ آن بھلاگرج ءِ، مسکوہی وزیراعظم نواز شریف نا کماشی ٹی پاکستان ءِ ڈیجیٹل شونداری نا کنڈآ درین، سائنس، ٹیکنالوجی و آئی ٹی نا بشخ اٹی پبی کاریم کرین، وژن 2025 نا رداٹ آئی ٹی نا بشخ آ خاص چکار کننگا، نن تینا مسکوہی دور تیٹی تھری جی و فورجی لیسن جاری کرین۔ وژن 2025 نا رداٹ پاکستان ءِ چارمیکو صنعتی انقلاب کن تیار کننگا، آئی ٹی، اے آئی و اوڑتون گنڈوک ایلو بشخ آتا سینٹرز جوڑ کننگا، سائبر سیکورٹی نا نیشنل سینٹر جوڑ کننگا، دا سینٹر آتا جوڑ کننگ نا مسخت دا بشخ آتیٹی خودکفالت نا دوئی کننگ ءِ۔ اوپارے کہ وزیراعظم شہباز شریف نا کماشی ٹی اے آئی نا بابت نیشنل ٹاسک فورس اس جوڑ کننگا ہرا پاکستان نا اولیکو قومی اے آئی پالیسی نا جاری کننگ اٹ اہم کڑد ادا کرے، معرکہ حق اٹی سرسہبی آن پد داسہ ننے معرکہ شونداری نا ہدف آتے دوئی کروئی ءِ۔