حکومتی اصلاحات نا مسخت لس بندغ نا زند اٹی آسانی اتنگءِ، بنجائی وزیر موسمیاتی بدلی و چاگڑدی ہم گرنچی نا پاکستان ریفارمز رپورٹ 2025نا لانچنگ دود آن تران

اسلام آباد۔ 09 فروری (اے پی پی) بنجائی وزیر موسمیاتی بدلی و چاگڑدی ہم گرنچی ڈاکٹر مصدق ملک پارینے کہ وزیراعظم نا وژن نا رداٹ سرکاری ادارہ، غاتیٹی انقلابی بدلی اتنگ انگ ءِ، حکومتی اصلاحات نا مسخت لس بندغ نا زند اٹی آسانی اتنگ ءِ، پاور سیکٹر اٹی اصلاحات آن گردشی وام تیٹی 1.25 ٹریلین روپئی نا کمتی اتنگا ، اسٹ آن یک و نیم سال اٹی بنجائی حکومت نا سددرسد فائل آک ڈیجیٹل مسنو، داسہ اسٹ اس ہم ڈیجیٹل نظام اٹی تینے ڈکنگ کپک۔ داخیال آتا درشانی ءِ او داڑے ہندی ہوٹل اٹی پاکستان ریفارمز رپورٹ 2026 نا لانچنگ دود آن تران کرساکرے۔ بنجائی وزیرپارے کہ اسہ سال اٹی 650 آن زیات اصلاحات کننگا وخت اس کہ تدوک آ سال 620 اصلاحات کننگاسس، بیورو کریٹک نظام اٹی شفاف بدلی المی ءِ تانکہ الس ءِ مشکلات مف، ڈیجیٹل اصلاحات نا مسخت الس کن سروسز اسکان رسینگ ءِ آسان جوڑ کننگ ءِ، اصلاحات نا مسخت شاری تے دفتر و بس سٹاپ آتیا درپہ در مننگ آن بچفنگ ءِ ، پیش کروک آ ریفارمز ایجنڈا ہندا اصول ءِ مون آ تخسا ترتیب تننگانے۔ مالیاتی ادارہ غاتون اوار اوار کانودی، ریگولیٹری، سیکورٹی، راجی رکھ، انسانی حق، کلائمیٹ و دودوربیدہ ئی ادارہ غاتیٹی اصلاحات درستی راستی کرفنگ انگ ءِ۔ اوپارے کہ بنجائی حکومت نا 100 درسد فائل آک ڈیجیٹل مسنو، فائل اٹی چھیڑ چھاڑ نا دروشم اٹی ڈیجیٹل فُٹ پرنٹ پین سلک، غٹ آن زیات اصلاحات پاور و انرجی سیکٹر اٹی کننگا، انرجی سیکٹراٹی 118 اصلاحات درستی راستی کرفنگا، انڈسٹری کن ٹیرف اٹی کمتی خواری کش آتے براہ راست فائدہ کن ءِ۔ بنجائی وزیر پارے کہ ورناتے 12،600جہانی آب انا ٹیک سرٹیفکیٹس جاری کننگا، دا سرٹیفکیٹ آک مچ آملک انا ورناتے اُرانا درگہ غا ملرہ، دنیا سیم آتیان آجوءِ۔