ورناک ننا روشنا آخبت ءُ، اوفتے میرٹ نا بنداو آ روزگار فراوان کننگ اولیت ءِ، رانا مشہود احمد خان نا پنجاب یونیورسٹی ٹی جاب فیئر آن تران

لاہور۔ 09 فروری (اے پی پی) چیئرمین وزیراعظم یوتھ پروگرام رانا مشہود احمد خان پارینے کہ ورناک ننا روشنا آخبت ءُ ، اوفتے میرٹ نا بنداو آ برسرروزگار کننگ کن غٹ وسیلہ غاتے کاریم اٹ اتنگ اولیت ءِ، آئی ٹی برآمدات آتے 25 بلین ڈالر اسکان ودفنگ کن سنبرینگوک ءِ، پاکستان نا اولیکو یوتھ ایمپلائمنٹ پالیسی لانچ کننگ والا ءِ، وزیراعظم یوتھ پروگرام نا رداٹ ویژن 2047 پالیسی آ کاریم برجاءِ، 35 درسد زالبول لیبر فورس انا بشخ جوڑ مریرہ، ڈیجیٹل یوتھ ہب آ 8 لکھ آن زیات چنارجسٹرڈ مسنو۔ داخیال آتا درشانی ءِ او دوشنبے نادے آ جامعہ پنجاب اٹی کیریئر کونسلنگ و پلیسمنٹ سینٹر نا کنڈآن جاب فیئر آن تران کرساکرے۔ داوخت آ وائس چانسلر پنجاب یونیورسٹی محمد علی، طارق ریاض، ڈائریکٹر کیریئر کونسلنگ اینڈ پلیسمنٹ سینٹر ڈاکٹر فوزیہ ہادی، فیکلٹی باسک آک، استاد، خوانوک آمار ومسن تا بھلو کچ اس ہم ساڑی ئسر۔ رانامشہود پارے کہ وزیراعظم یوتھ پروگرام نا رداٹ نن ورناتے ملک و پیشن نا ملک روزگار نا وارخواہی فراوان کننگ کن چندی پروگرام نا بناءِ کرینن، آخبت ہم دا چرجوئی برجاسلک۔ اوپارے کہ اینو نا پاکستان ورناتے قابلیت نا بنداو آ مون آ بننگ نا موقع فراوان کیک، اوپارے کہ بیرہ چنکو وخت اسے ٹی ڈیجیٹل یوتھ ہب آ 8 لکھ آن زیات چناو رجسٹرڈ مسنو، پورٹل آ میرٹ نا بنداو آملک و پیشن نا ملک آتیٹی آئی ٹی سیکٹر، گرین ٹیکنالوجی سیکٹر، بزنس سیکٹر تون اوار چندی سیکٹرآتیٹی ملازمت نا بے شمار وارخواہی دوئی ءِ، ہرافتا دوئی کننگ کن کس اسے نا سفارش نا ضرورت تمپک بلکن بیرہ میرٹ و قابلیت نا بنداو آ غٹ وارخواہیک ساڑی ءُ۔