ویکسین نا ہندی تیاری اسہ بھلو چیلنج اسے، بنجائی وزیرجان جوڑی

اسلام آباد۔ 09 فروری (اے پی پی) بنجائی وزیر جان جوڑی مصطفیٰ کمال پارینے کہ ویکسین نا تیاری جان جوڑی نا بشخ اکن بھاز اہمیت تخک و پاکستان کن ویکسین نا ہندی تیاری اسہ بھلو چیلنج اسے۔ داخیال آتا درشانی ءِ او اوآئی سی ویکسین مینو فیکچررز گروپ نا چارمیکو دیوان آن تران کرساکرے۔ بنجائی وزیر جان جوڑی پارے کہ پاکستان نا آبادی ٹی ہرسال 60 لکھ آن زیات ودکی مننگ ءِ، ہرانا سوب ننکن المی ءِ کہ نن ویکسین نا تیاری ٹی خودکفیل مرین۔ اوپیدوار کرے کہ حکومت 2030 اسکان ویکسین نا درآمد و پیشن نا ملک سیبو ءِ چٹفنگ نا ہدف مقرر کرینے، ولے داڑکن 2030 نا انتظار ءِ کننگ نا جاگہ غا دمدستی وڑاٹ کچ و ویکسین تیاری نا لائخی ءِ ودفنگ نا گرج ءِ۔ مصطفیٰ کمال پارے کہ ملک اٹی انفراسٹرکچر نا کمتی اف، قومی ادارہ جان جوڑی کون آسوگو ادارہ غاک ساڑی ءُ، ولے ویکسین نا تیاری یا خریدوفروخت ہچ ءُ کٹیاکروک ءُ کاروبار اس اف، دامسخت کن پاکستان ءِ گچین وپت انا قابل شریدار آتا گرج ءِ، ہرانا رداٹ چین، سعودی عرب، و انڈونیشیا کون آملک آتیان کمک دوئی کننگ انگ ءِ۔ اوپارے کہ سعودی عرب تدوک آ 10 سال آن ویکسین نا تیاری نا ریسہ غاتیان گدرینگ انگ ءِ۔ بنجائی وزیرجان جوڑی دیوان ءِ پارے کہ پاکستان تینا اولیکو ویکسین پالیسی تیارکرینے۔ اوپارے کہ اسہ کمپنی اس بیرہ اسہ ویکسین اس تیار کننگ کیک وخت اس کہ پاکستان ءِ جم وڑاٹ 13 ویکسین درکار ءِ۔ داوخت آ اواوآئی سی ویکسین الائنس اس جوڑ کننگ نا سلاہ پیش کرساپارے کہ اسلامی ملک آتا نیام اٹ ویکسین نا اسیجائی سیوت نا سخت گرج ءِ ہراڑآ غٹ باسک ملک آتے اواری اٹ کاریم کروئی مریک۔ اوپڑوکرے کہ اوآئی سی ویکسین الائنس کن شارٹ ٹرم، میڈیم ٹرم و لانگ ٹرم بنداوتیا اینو آن کاریم نا بناءِ کننگک تانکہ اسلامی ملک آک اسہ ایلو نا آزموندہ غاتیان فائدہ ہرفنگ کیر۔ او انکشاف کرے کہ جنگ اٹی ویکسین نا کاختی نا ویل آتیا ہیت مون آبس کہ جہانی ادارہ ’’گاوی‘‘ بھارت آن ویکسین ہلسا پاکستان ءِ فراوان کریکہ۔ بنجائی وزیر جان جوڑی پارے کہ ساڑی آپاک بھارت جنگ اٹی ویکسین نا کاختی نا آزموندہ غان پد حکومت آخبتی بنداو تیا ڈٹ بندی نا فیصلہ کرینے۔ بنجائی وزیر جان جوڑی داہیت آ زور شاغا کہ جان جوڑ چاگڑد، جان جوڑ قوم و زرگزرانی سوگوی نا براہ راست تعلق قومی سلامتی تون ءِ۔