صدر مملکت آصف علی زرداری ناجاپان نا وزیراعظم ءِ ایوان نا گچین کاری تیٹی تاریخی و بھلو گیشتری اسے اٹ سرسہبی آ مبارکباد

اسلام آباد۔ 09 فروری (اے پی پی) صدر مملکت آصف علی زرداری جاپان نا وزیراعظم سانائے تاکائیچی ءِ ایوان نا گچین کاری تیٹی اونا لبرل ڈیموکریٹک پارٹی (ایل ڈی پی ) نا تاریخی و بھلو گیشتری اسے اٹ سرسہبی آ مبارکبادی پیش کرینے ہراٹی پارٹی ایوانِ نمائندگان اٹی پیدوار گیشتری دوئی کرے۔ دوشنبے نادے آ ایوان صدر نا پریس ونگ آن جاری بیان اٹی صدرِ مملکت آصف علی زرداری پارے کہ دا فیصلہ ئی گچین کاری سرسہبی جاپانی الس نا وزیراعظم سانائے تاکائیچی نا سرکڑدہ ئی آ پبی پت و جاپان ءِ سوگو و شونہال جوڑ کننگ نا عزم انا ڈیک ءِ۔ صدر آصف علی زرداری پارے کہ بھلا السی مینڈیٹ، ہرا 1955 آن پد پارٹی کن اسہ ریکارڈ اسے، جاپان کن اسہ نازرک ریسہ سے آ وزیراعظم سانائے تاکائیچی نا پالیسی سمت و طرزِ حکمرانی نا ایجنڈا نا السی پک انا درشانی ءِ۔ اووزیراعظم سانائے تاکائیچی کن نیک است خواہی نا درشانی ءِ کرساپارے کہ او جاپانی الس نا کنڈآن تروک آ زمواری تے سرسہبی اٹ پورو کیک و داپت انا درشانی ءِ کرے کہ اونا کماشی ٹی جاپان سوگو، شونداری و شونہالی نا کنڈآ کاہک۔ صدرِ مملکت پاکستان وجاپان نا نیام اٹ دوستانہ تعلقداری تے پین سوگو کننگ و تین پہ تینی است خواہی نا چندی بشخ آتیٹی کمکاری ءِ مون آ دننگ نا پاکستان نا است خواہی نا ہم درشانی ءِ کرے تانکہ ہڑتوم آملک آتا الس فائدہ ہرفنگ کے۔