وفاقی وزیر خزانہ محمد اورنگزیب ءَ علولہ کانفرنس ءِ ساھت ءَ ایرانی ھمکار ءَ گوں گند ءُ نند کتگ ءُ دو نیمگی تجارت ءِ کساس ءَ را گیش کنگ ءِ یکجائی جزم ءِ درشان

اسلام آباد۔8فروری (اے پی پی): وفاقی وزیر مالیات ءُ آمدنی سینیٹر محمد اورنگزیب ءَ سعودی عرب ءَ برجم دارگ بوھوکیں الولا کانفرنس 2026 ءِ ساھت ءَ ایران ءِ اقتصادی کار ءُ مالیات ءِ وزیر ڈاکٹر سید علی مدنی زاده ءَ گوں گند ءُ نند کت۔ یک شمبے ءِ روچ ءَ وزارت ھزانگ ءِ نیمگ ءَ جاڑی بوتگیں بیان ءِ رد ءَ گند ءُ نند ءَ پاکستان ءُ ایران ءِ نیام ءَ دو نیمگی تجارتی ءُ اقتصادی کمک آناں مھکم کنگ ءِ سر ءَ دلگوشی دیگ بوتگ۔ دوئیں وزیراں دوئیں ملک آنی مزنیں سروکی ءِ وژن ءُ ہدایت آنی رد ءَ دو نیمگی تجارتی حجم ءَ را گیش کنگ ءِ واستہ وتی یکجائی عزم ءِ پدا زور دات۔ اے مول ءُ مراد ءِ سرجم کنگ ءِ ھاترا مدام رابطہ، تجارت ءِ آسراتی ءُ رکاوٹانی ھلاسی ءِ ھاترا زور دیگ بوتگ۔ گپ ءُ تران ءِ ساھت ءَ ایران ءِ وزیر ءَ سرمایہ کاری ءُ مارکیٹ ءِ کمک ءِ ھوالگ ءَ جتا جتائیں شوبگ ءِ موہ آنی سر ءَ چمشانک دات کہ ایشی ءِ مول ءُ مراد اقتصادی سیادی ءَ را گیش گہتر کنگ ءُ وت مہ وتی نتیجہ آناں رسگ اِنت۔ سینیٹر محمد اورنگزیب ءَ اے سوج آنی وش اتک کتگ۔ ایران ءِ وزیر ءَ سینیٹر محمد اورنگزیب ءَ را ایران ءِ تر ءُ تاب ءِ دعوت ھم داتگ ات کہ ایشی ءِ پسو ءَ وفاقی وزیر خزانہ ءَ آئی ءَ را اسلام آباد ءِ تر ءُ تاب ءِ دعوت داتگ ات۔