وفاقی وزیر تجارت جام کمال خان ءُ کینیڈا ءِ میاں اوستمانی تجارت ءِ وزیر منندر سدھو ءَ ٹیلی فون ءِ سر ءَ گپ ءُ تران کت، تجارت ءِ تنوع ءُ روایتی شوبگ آنی تہ ءَ کمک ءَ را گیش کنگ ءِ سر ءَ تپاک

اسلام آباد۔8فروری (اے پی پی): پاکستان ءُ کینیڈا ءِ نیام ءَ تجارت ءِ تنوع ءُ روایتی شوبگ آنی تہ ءَ کمک ءَ را گیش کنگ ءِ سر ءَ تپاک کنگ بوتگ ءُ معدنیات ءُ کان کنی ءَ را سرمایہ کاری ءِ واستہ نوکیں اولیت ءِ جار جنگ بوتگ۔ ادا جاڑی بوتگیں بیان ءِ رد ءَ وفاقی وزیر تجارت جام کمال خان ءُ کینیڈا ءِ میاں اوستمانی تجارت ءِ وزیر منندر سدھو ءِ نیام ءَ ٹیلی فون ءِ سر ءَ گپ ءُ تران کنگ بوتگ ایشی ءِ تہ ءَ پاکستان ءُ کینیڈا ءِ نیام ءَ تجارت ءُ سرمایہ کاری ءِ دیمروئی ءِ ھوالگ ءَ سرجمیں گپ ءُ تران کنگ بوتگ ءُ کینولا شپمنٹ ءِ بحالی ءَ را تجارتی دود ءُ ربیدگ ءِ دیمروئی ءِ یک ھاسیں دیمروئی لیکگ بوتگ۔ کینیڈا ءَ پاکستانی پیسلہ ءِ سر ءَ کینولا ءِ برآمدات ءِ بحالی ءِ توسیپ کتگ۔ دوئیں ملک آں وت مہ وتی اقتصادی سیادی آنی تہ ءَ جوانیں پیشرفت ءَ را وش اتک کت۔ اے موہ ءِ سر ءَ بیپار ءِ تہ ءَ رنگ ءُ دروشم ءِ جوڑ کنگ ءُ روایتی شوبگ آنی تہ ءَ کمک ءِ تہ ءَ گیشی ءِ سر ءَ تپاک کنگ بوت۔ پاکستان ءَ ٹیکسٹائل، چمڑہ، کشت ءُ کشاری چیز، سرجیکل انسٹرومنٹس ءُ اسپورٹس سامان آنی تہ ءَ وتی برآمداتی گنجائش آنی سر ءَ زور پر دات۔ ویلیو ایڈڈ فوڈ پروسیسنگ ءِ تہ ءَ پاکستان ءِ گیش بوھوکیں گنجائش ءِ سر ءَ چمشانک دیگ بوت۔ معدنیات ءُ کان کنی ءِ شوبگ ءَ را سرمایہ کاری ءِ واستہ نوکیں اولویت ءِ جار جنگ بوت۔ جام کمال ءَ کینیڈا ءِ کمپنی آناں پاکستان ءِ معدنیات ءِ شوبگ ءَ سرمایہ کاری ءِ دعوت دات۔ تکنیکی ءُ پالیسی ءِ تک ءَ رابطہ آناں برجاہ دارگ ءُ بی ٹو بی رابطہ آناں گیش کنگ ءِ سر ءَ تپاک کنگ بوتگ۔ ٹیلی کانفرنس ءِ تہا کینیڈا ءِ ہائی کمشنر طارق علی خان ءُ ایندگر مزن مزنیں کارندہ آں ہم بہر زرتگ۔