صدر آصف علی زرداری ءَ پاکستان ءِ گوما یکوئی ءِ درشان کنگ ءَ جھان ءِ سروک آنی شگر ءُ منت گپت، ناشرکاری ءِ ھلاپ ءَ یکجائی جزم ءِ سر ءَ زور پر دات

اسلام آباد۔8فروری (اے پی پی): صدر آصف علی زرداری ءَ اسلام آباد ءَ ناشرکاری ءِ وئیل ءِ سر ءَ پاکستان ءِ گوما یکوئی ءِ درشان کنگ ءِ پد ءَ جھان ءِ سروک آنی شگر ءُ منت گپت ءُ ناشرکاری ءِ ھلاپ ءَ یکجائی جزم ءِ سر ءَ زور پر دات۔ یک شمبے ءِ روچ ءَ سوشل میڈیا پلیٹ فارم ایکس ءِ سر ءَ وتی بیان ءِ تہ ءَ صدر آصف علی زرداری ءَ گوشت کہ دگنیا ءِ سروک، حکومت ءُ میاں اوستمانی گل آنی نیمگ ءَ ھمدردی ءُ یکوئی ءِ درشان آنی پد ءَ پاکستان ءِ منت وار آں ۔ اے پیغام اے گپ ءِ پدرائی ءَ کن اَنت کہ ناشرکاری ءُ زوراکی ءِ نظریات ءِ ھلاپ ءَ جھد یکجائی ءِ جھد اِنت۔ آئی ءَ گوشت کہ مئے موقف سک تچک انت کہ یک ملکے ایوک ءَ ناشرکاری ءَ گوں جنگ کت نہ کنت۔ پاکستان ءِ وئیلاں اے گپ ثابت کتگ کہ وھدے ناشرکاریں گلاں درائیں کمک ءُ آسراتی رس ایت گڈا ایشی ءِ آسر بے گناہیں شہریاں برداشت کنگی انت۔ صدر آصف علی زرداری ءَ گوشت کہ لھتیں ھمساھگیں ملک وتی سرزمین ءَ چہ ناشرکاریں عناصر آناں پاکستان ءِ ھلاپ ءَ کاروائی آناں کنگ ءِ موہ دیگ ءَ بدبھتی ءَ اے جرم ءِ تہ ءَ ھمگرنچ اَنت۔ مالی کمک ءِ ہمراہی ءَ ناشرکاراں تکنیکی ءُ فوجی وسیلہ ہم دئینت۔ صدر ءِ مملکت ءَ اوگانستان ءِ جاور ھال آنی سر ءَ سک باز جیڈھ ءِ درشان کت ءُ گوشت کہ طالبان ءِ سرکار ءَ ھما جاور ھال جوڑ کتگ اَنت کہ 11 سپتامبر ءِ وڑ ءَ اَنت یا چہ ایشی ءَ ھم بدتر اَنت۔ ھما وھد ءَ ھم ناشرکاریں گل جھان ءِ امن ءِ ھاترا ھترہ بوتگ اَنت ءُ ایشی ءِ آسر ءَ 11ستمبر ءِ سانحہ بوتگ۔صدر آصف علی زرداری ءَ گوشت کہ پاکستان ءِ رودراتکی ھمساھگ ھم طالبان ءِ رژیم ءِ کمک ءَ گوں پاکستان ءَ دمگی ءُ جھان ءِ امن ءَ را ھترہ ءَ چہ رکّینگ ءَ اِنت۔ صدر ءِ مملکت ءَ اے گرانیں وھد ءَ میاں اوستمانی براتی ءِ ھمدردی ءُ کمک ءِ سر ءَ شگر ءُ منت گپت ءُ گوشت کہ امن، برجائی ءُ ناشرکاری ءِ سرجمیں ھلاسی ءِ واستہ وتی شریک آنی گوما کوشست آناں برجاہ دارگ ءِ واستہ جزمیگ آں ۔