پاکستان ءِ آئین ءِ تہا ترمیم کنگ ءِ اختیار ایوک ءَ پارلیمنٹ ءَ است انت، وفاقی وزیر قانود ءُ انصاف

لاہور۔7فروری (اے پی پی): وفاقی وزیر برائے کانود ءُ انصاف سینیٹر اعظم نظیر تارڑ ءَ گشتگ کہ پاکستان ءِ آئین ءِ تہا ترمیم کنگ ءِ اختیار ایوک ءَ پارلیمنٹ ءَ است انت، وھد ءِ گوزگ ءَ گوں اے گپ پدر بیت کہ 26می آئین ءِ تہا ترمیم ءِ پیسلہ راست ثابت بیت یا نہ۔ شمبے ءِ روچ ءَ اسماء جہانگیر کانفرنس ءَ گوں گشتانک دیان ءَ آئی ءَ گوشت کہ آئین ءِ آمید گس ءِ جوڑ کنگ ءِ ضلورت ءِ چیر دستی ءَ آئین ءِ بیست ءُ ششمی ترمیم ءِ بنگیج کنگ بوتگ۔ وفاقی کانود ءِ وزیر ءَ گوشت کہ گوستگیں وھد ءَ لھتیں موہ آنی سر ءَ سپریم کورٹ وتی دائرہ کار ءَ چہ در بوتگ وھدیکہ موت ءِ سزا ءِ لھتیں پیسلہ ھم چار ءُ تپاسی ءِ تہ ءَ رد ثابت بوتگ اَنت۔ آئی ءَ گوشت کہ بیست ءُ ششمی آئین ءِ ترمیم ءِ ھوالگ ءَ جتاجتائیں حلقہ آنی گوما مشورہ کنگ بوتگ ءُ ھمکار آناں اعتماد ءِ تہ ءَ زورگ ءَ اے جیڈھ ءِ سر ءَ جست ءُ پرس کنگ بوتگ۔ آئی ءَ گوشت کہ اے ترمیم ءِ چیر دستی ءَ آئین ءِ بنچ جوڑ کنگ ءِ تصور پیش کنگ بوتگ، وھدیکہ گوست ءَ نوزدہمی آئین ءِ ترمیم ءِ ھلاپ ءَ ھم اعتراض کنگ بوتگ۔ سینیٹر اعظم نظیر تارڑ ءَ گوشت کہ جج آنی بدلی ءِ جیڈھ ءِ سر ءَ پاکستان ءِ صدر، مزن وزیر ءُ چیف جسٹس ءَ گوں مشورہ کنگ بیت جج آنی کارکردگی ءَ را ھیال ءَ دارگ ءَ پیسلہ کنگ بیت۔ اگاں پنجاب ءُ اسلام آباد ءَ جوانیں جج بہ بنت گڈا اندری سندھ ءُ خیبر پختونخوا ءِ الس ءَ ہم برابر ءِ حق است انت۔ آئین ءِ آمیدگس ءَ وتی کار بندات کتگ، ایشی ءِ آسر وھد ءِ گوما دیم ءَ کیت، قانون ءِ سرا عمل کنگ المی اِنت ءُ اگاں کسے لال لیکہ ءَ چہ بگل ایت گڈا آسر دیم ءَ کیت۔ وفاقی کانود ءِ وزیر ءَ گوشت کہ بیگواھیں مردم آنی جیڈھ ایوک ءَ پاکستان ءَ نہ انت بلکینگ ءَ سرجمیں دگنیا ءِ جیڈھ انت ۔ آئی ءَ گوشت کہ آ وت بیگواھیں مردمانی بابت ءَ جوڑ بوتگیں جوڈیشل کمیشن ءِ بھر آں ءُ ذاتی رنگ ءَ ھم اے جیڈھ ءِ سر ءَ کار کنگ ءَ آں۔ وفاقی کانود ءِ وزیر ءَ گوشت کہ حکومت اے حساسیں جیڈھ ءِ سر ءَ سرجمیں سنجیدگی ءَ گوں گامگیج کنگ ءَ اِنت ءُ دی جوڈیشل کمیشن وتی کار ءَ را ذمہ واری ءِ گوما کنگ ءَ اِنت۔ اعظم نظیر تارڑ ءَ گوشت کہ اے تلخیں راستی انت کہ پاکستان گوستگیں بازیں دہائی ءَ چہ ناشرکاری ءِ ھلاپ ءَ جنگ ءَ انت۔ دگنیا ءِ ھچ ملک ءَ ناشرکاری ءِ ھلاپ ءَ انچو وھد ءَ جنگ نہ کتگ کہ پاکستان ءَ کتگ۔ اعظم نظیر تارڑ ءَ گوشت کہ حکومت لوگی زوراکی ءِ ھلاپ ءَ کانود ھم جوڑ کنگ ءَ اِنت وھدیکہ اے کانود اسلام آباد ءِ حد ءَ تاں عمل کنگ بوتگ۔ آئی ءَ گوشت کہ سوشل میڈیا ءِ ھوالگ ءَ جیڈھ آنی سر ءَ ھم کار بوھگ ءَ انت ایشی ءَ چہ ھمگرنچیں کانود ءُ گامگیج آنی سر ءَ چار ءُ بچار بوھگ ءَ انت۔ ایشی ءَ چہ پیسر آئی ءَ وتی کلوہ ءِ بندات ءَ کانفرنس ءِ برجائی ءَ را وش اتک کت ءُ گوشت کہ کجام ہم چاگرد ءَ امن ءُ دیمروئی ءِ واستہ ہر فرد ءَ وتی کرد پیلو کنگی انت۔