ناشرکار پہ لھتیں کلدار ءَ مسلمانانی ھوناں ریچگ ءَ اَنت، آ سرجم ءَ ھلاس بنت۔ عطا اللہ تارڑ

لاہور۔7فروری (اے پی پی): وفاقی وزیر ءِ اھوالکاری عطا اللہ تارڑ ءَ ترلائی ءِ سانحہ ءِ مذمت کتگ ءُ گشتگ کہ ناشرکار پہ لھتیں کلدار ءَ مسلمانانی ھون ریچگ ءَ اَنت، آھانی کش ءُ گور ءِ دائرہ تنگ بوھگ ءَ اِنت، آ سرجم ءَ ھلاس کنگ بنت۔ تارلائی ءِ سانحہ ءِ سرا سرجمیں ملک ءِ جوہ غم ءُ اندوہ ءِ تہا انت۔ وت کُش تراک ءِ پجار کنگ بوتگ۔ اے بابت ءَ گیشیں پٹ ءُ پول برجاہ اِنت۔ مئے اے جزم سک پدر انت کہ ما ناشرکاراں چہ رحم نہ کنیں۔ ما ناشرکارانی واستہ زمین ءَ تنگ کن ایں ۔ پاک فوج ملک ءِ ایمنی ءِ واستہ قربانی ءِ کسہ جوڑ کنگ ءَ انت ۔ حکومت شہیدانی کھول ءِ غم ءَ یک پیم ءَ بہر کنت۔ غم ءِ آماچیں ھاندان یلہ نہ بنت۔ مزن وزیر محمد شہباز شریف ءِ ہدایت ءِ سرا ترلائی وئیل ءَ ٹپیگاں ہر ممکنیں آسراتی پجاری کنگ بوہگ ءَ انت۔ اے ھیالانی درشانی آئی ءَ شمبے ءِ روچ ءَ مدرسہ منہاج الحسین ءَ ڈاکٹر محمد حسین اکبر ءُ ایندگر علماء ءِ گوما پریس کانفرنس ءَ گوں تران کنان ءَ کت۔ وفاقی وزیر ءِ اھوالکاری ءَ گوشت کہ ترلائی ءِ سانحہ ءِ سر ءَ سرجمیں ملک ءَ ماحول غم ءِ آماچ اِنت۔ آئی ءَ گوشت کہ ملک ءَ کس ءَ را بدمعاشی ءُ آشوب ءِ شنگ کنگ ءِ موہ دیگ نہ بیت ءُ اے وئیل ءَ ھواریں عناصر زوت کیس ءِ دیم ءَ آرگ بنت۔ ترلائی سانحہ ءِ تہا گران بھائیں انسانی جانانی گار بوھگ ءِ سر ءَ دلپدردی ءُ پشومانی ءِ درشانی کنان ءَ آئی ءَ گوشت کہ عبادت کنوکاں نشانگ جوڑ کنگ سکیں بزدل ءُ زھرناکیں کارے، ایشی ءِ سر ءَ ھچ وڑیں مذمت کنگ نہ بیت۔ آئی ءَ گوشت کہ ملک ءَ امن ءُ ایمنی ءَ را ھراب کنگ ءُ فرقہ وارانہ شنگ ءُ تالان کنگ ءِ اجازت نیست، ریاست الس ءُ عبادت جاہ آنی جان ءُ مال ءِ رکھینگ ءِ واستہ جزمیگ انت۔ ناشرکارانی ہچ مذہب ءُ عقیدہ نیست، آہانی کار ایوک ءَ اے وڑیں غیر انسانی ءُ شرمناکیں کارانی کنگ انت۔ ھما کہ پہ کمیں مردمانی ھاترا انسانیت ءَ کُش اَنت آ انسان نہ اَنت بلکیں درندگ اَنت، آھاں انسان گْوشگ انسانیت ءِ توھین اِنت۔ وفاقی وزیر ئَ گوشت کہ پاکستان ئَ ناشرکاری ئِ کنگ ئِ عناصر آناں درملک ئِ کمک است انت، دژمن پاکستان ئِ امن، یکوئی ئُُ دیمروئی ئَ را تاوان دیگ لوٹ ایت، راج ناشرکار آنی ھلاپ ئَ تپاک اِنت، ملک ئِ تہ ئَ انتہا پسندی ئُُ ناشرکاری ئِ اجازت دیگ نہ بیت۔ آئی ءَ گوشت کہ وئیل ءَ ھواریں بغاوت پسندیں ناشرکار ءُ آھانی آسراتی کارانی پد ءُ رند کنگ بیت ءُ آ زوت کامید کنگ بنت، ملک ءُ راج ایوک ءَ ایشانی ھلاس کنگ ءَ گہتر بیت۔ آئی ءَ گوشت کہ ترلائی سانحہ ءِ وت کُش بمب تراک کنوک ءِ پجار کنگ بوتگ، وت کُش بمب تراک کنوک ءَ را اوگانستان ءَ چہ ناشرکاری کار آنی تہ ءَ تربیت ھم رستگ، تراک آنی پُشت ءَ بھارت ءُ اوگانستان ءِ وڑیں پلانٹڈ ایلیمنٹ ھوار اَنت، فرانزک ٹیم ءُ سیکورٹی ادارگ آنی نیمگ ءَ اے وئیل ءِ شواہد دست کپتگ اَنت، گیشیں پٹ ءُ پول زوت سرکاری رنگ ءَ پیش کنگ بیت۔ وفاقی وزیر ءَ گوشت کہ مزن وزیر ءِ ہدایت ءِ رد ءَ تہی کارانی وزیر محسن نقوی ءَ امامبرگاہ ءِ انتظامی آں گوں گند ءُ نند کت۔ مزن وزیر ءَ اے وئیل ءِ سرجمیں ءُ شفافیں پٹ ءُ پول ءِ ہدایت کتگ ءُ زمہ وار آنی زوت پجارینگ ءِ پرمان داتگ۔ امامبرگاہ ءِ منتظمین ءَ را ہر وڑیں کمک ءُ پٹ ءُ پول ءِ یقین دیگ بوتگ۔ آئی ءَ گوشت کہ مزن وزیر محمد شہباز شریف ءِ کوھستیں سروکی ءَ امن پیغام کمیٹی ءِ جوڑ کنگ ءِ مول ءُ مراد ھم ملک ءَ امن ءِ دیمروئی ءُ ناشرکار آنی بیانیہ ءِ آسر کنگ اِنت۔ امن ءِ پیغام کمیٹی ءَ ھرچ مکتب ءِ مردم ھوار اَنت کہ آ امن ءِ روایت ءَ ملک ءِ ھر کُنڈ ءَ سر کنگ ءَ اَنت۔ آئی ءَ گوشت کہ وئیل ءِ تہ ءَ ٹپیگ بوتگیں 170 مردم آناں ھمک رنگ ءِ دوا ءُ درمان آسراتی پجاری کنگ بوھگ ءَ انت، ءُ شھید آنی مات ءُ پت ایوک ءَ یلہ نہ بنت۔ یک جستے ءِ پسو ءَ آئی ءَ گوشت کہ ناشرکار وتی گڈی ساہ ءَ زورگ ءَ اَنت، ھارڈ ٹارگٹ آنی سر ءَ آھانی رسائی ھلاس بوتگ، نوں سافٹ ٹارگٹ ءِ واستہ دوریں دمگ آنی تہ ءَ آپریشن کنگ ءَ اَنت، ناشرکار ایشانی ھلاس کنگ ءِ نزیک ءَ اَنت، آ زوت ھلاس کنگ بنت۔ دگہ جست ءِ پسو ءَ وفاقی وزیر ءَ گوشت کہ پاک فوج ءُ سیکورٹی ادارگ ملک ءَ را امن ءِ جھولی جوڑ کنگ ءِ واستہ شپ ءُ روچ کار کنگ ءَ انت، پاک فوج ملک ءِ سلامتی ءِ واستہ قربانی آنی کسہ جوڑ کنگ ءَ انت، سیکورٹی ادارگ آنی کھول ءُ سیاد ھم ناشرکاری ءِ نشانگ جوڑ بوھگ ءَ انت اسلام آباد ءِ وت کُش تراک، ناشرکارانی کارروائیاں مئے روح کم نہ کتگ بلکیں ایشی ءَ گیش گیش کنگ ءَ انت۔ ترلائی وئیل ءِ آسراتی کارانی پجار کنگ بوتگ، آ کانودی پیش کنگ بنت۔ عطا اللہ تارڑ ءَ گوشت کہ مئے سیکورٹی فورسز ءِ مہارت ءَ را دگنیا منگ ءَ انت، سیکورٹی فورسز سرجمی ءَ الرٹ انت، انٹیلی جنس ءِ بنیاد ءَ آپریشن برجاہ انت، سرجمیں دگنیا ءَ انٹیلی جنس ایجنسی جعفر ایکسپریس ءِ سوبمندیں آپریشن ءِ سر ءَ پاکستان ءِ توسیپ ءَ کنگ ءَ انت۔ آئی ءَ گوشت کہ مئے جزم سک پدر اِنت کہ ما ناشرکاراں یلہ نہ کن ایں، آپریشن رد الفساد ءُ آپریشن زرب العظب ءَ پد امن ءُ ایمنی ءِ ضلورت بوتگ اَت، طالبان خان ءِ سوچ ءَ اے ناشرکار پدا آورتگ ءُ آباد کتگ اَنت، ایشی ءِ آسراں ما مرچی تاں زھر ءُ زھرگ ءَ ایں ۔ اے ناشرکاری ءِ پُشت ءَ تحریک انصاف انت ۔ آئی ءَ گوشت کہ وزیر ءِ تہی کار ءُ وزارت ءِ تہی کار سرجمیں رنگ ءَ سرگرم انت۔ پریس کانفرنس ءَ وفاقی وزیر ءِ اھوالکاری عطا اللہ تارڑ ءَ نواب زادہ نصر اللہ خان ءِ اے شعر الہان کت انت ۔