اسلام آباد ءِ اُرش ءِ منصوبہ اوگانستان ءَ بوتگ، اُرش ءِ ذمہ وار ہندوستان اِنت، اُرش ءَ ہواریں تقریباً درستیں مردم دزگیر کنگ بوتگ اَنت، وزیر داخلہ محسن نقوی

اسلام آباد۔7فروری (اے پی پی):وفاقی تہی کارانی وزیر محسن نقوی ءَ بھارت ءِ سر ءَ الزام جتگ کہ آئی ءَ اوگانستان ءَ چہ کار کنوکیں ناشرکاریں نیٹ ورک آناں مالی کمک ءُ ہدایت داتگ ءُ ہمے نیٹ ورک جمعہ ءِ روچ ءَ اسلام آباد ءِ یک مسیت ءِ سر ءَ وت کُش بمبتراک ءِ ذمہ وار اَنت کہ ایشی ءِ تہ ءَ 31 نمازی شہید بوتگ اَنت۔ شمبے ءِ روچ ءَ اسلام آباد ءَ پریس کانفرنس ءَ گوں تران کنان ءَ محسن نقوی ءَ گوشت کہ اے اُرش اوگانستان ءَ ھستیں داعش ءِ کارندہ آنی نیمگ ءَ منصوبگ بندی، تربیت ءُ اعدام ءِ پڑ ءَ چہ گوستگ وھدے کہ درملکی فنڈنگ ”براہ راست ڈالر ءِ تہ ءَ“ داتگ۔ آئی ءَ گوشت کہ من اے گپ ءَ سک پدر کنگ لوٹ آں کہ بھارت آھاں مالی کمک ءَ کنگ ءَ اِنت، بھارت آھاں ٹارگٹ دیگ ءَ اِنت ءُ بھارت ھمک گامگیج ءِ منصوبگ بندی کنگ ءَ اِنت۔ اے ادارہ وتی پگار ءِ سرا انت۔ بوت کنت مرچی دنیا بے توار بہ بیت بلے آ روچ کیت کہ ہر ملک اے گپ ءَ منّیت کہ ہندوستان ناشرکاری ءِ اصل سرپرست اِنت۔ تہی کارانی وزیر ءَ گوشت کہ تراک ءَ چہ پد ھما دمان ءَ کانود نافذ کنوکیں ادارگاں آپریشن بندات کتگ ءُ سرجمیں شپ ءَ آپریشن برجاہ بوتگ۔ خیبر پختونخوا پولیس ءِ انسداد ناشرکاری ءِ محکمہ ءَ تاں سہب ءِ سئے بج ءَ اے اُرش ءَ گوں سیادی داروکیں تقریباً درستیں مردم دزگیر کتگ اتنت۔ آئی ءَ اے گپ ءِ پدرائی کتگ کہ پشاور ءُ نوشیرہ ءَ ارش ءِ وھد ءَ چار آسراتی دزگیر کنگ بوتگ اَنت ءُ مبینہ ماسٹر مائنڈ کہ داعش ءَ گوں سیادی داروکیں اوگان راج دپتر ھم دزگیر اِنت۔ آپریشن ءِ وھد ءَ خیبر پختونخوا پولیس ءِ یک افسرے ھم شھید بوتگ۔ محسن نقوی ءَ گوشت کہ سرجمیں منصوبگ بندی ءُ تربیت اوگانستان ءَ بوتگ۔ مئے کرّا نوں انچیں مردم است کہ آیاں اے بابت ءَ سرجمیں ھال داتگ کہ ارش کنوک چوں ٹرانسپورٹ کنگ بوتگ، تربیت دیگ بوتگ ءُ پدا پدا دیم دیگ بوتگ۔ وزیر داخلہ ءَ گشتگ کہ ٹی ٹی پی، داعش ءُ دگہ درملکی ناشرکاریں گل ”یکجاہ کار کن انت ءُ اوگان سرزمین ءَ چہ کار کن انت۔“ آئی ئَ گوشت کہ اے وھد ئَ اوگانستان ئَ 21 ناشرکاریں تنظیم است انت، اقوام متحدہ ئِ رپوٹ آنی تہ ئَ ھم اے گپ ئِ پدرائی کنگ بیت۔ آئی ءَ گوشت کہ پاکستان دمگ ءَ ناشرکاری ءِ شنگ ءُ تالان بوھگ ءِ ھلاپ ءَ ’’دفاعی دیوال‘‘ ءِ کرد ءَ پیلو کنگ ءَ انت۔ اگاں اے دیوال کمو ھم کمزور بہ بیت گڑا دگہ مردماں ھم ایشی ءِ زھر برداشت کنگی اِنت۔ اے ناشرکارانی بجٹ مئی ءَ چہ سئے رند ءَ گیش بوتگ ۔ محسن نقوی ءَ جار جتگ کہ اے جیڈھ ءَ را میاں اوستمانی دیوان آنی تہ ءَ چست کنگ بیت، ما وتی نائب مزن وزیر ءَ را بریفنگ کن ایں ءُ درملک ءَ مئے سفارتی مشن دگنیا ءَ را راستی آنی بابت ءَ سرپد کن اَنت۔ وزیر داخلہ ءَ سیکورٹی ادارگ آنی سر ءَ ایراد گرگ ءِ پسو ءَ گوشت کہ ھمک سوبمندیں اُرش ءِ واستہ 99 اُرش ناکام کنگ بنت۔ اگاں 100 اُرشانی منصوبہ بندی کنگ بہ بیت، اگاں کیسے بہ بیت گڑا 99 اُرش بند کنگ بنت۔ آئی ءَ چہ الس ءَ اپیل کتگ کہ آ کمیونٹی انٹیلی جنس ءِ وسیلگ ءَ سیکورٹی ادارگ آناں کمک بہ کن اَنت، ما جنگ ءِ جاور ءَ ایں، وھدے کہ مردم مشکوکیں مردم آنی ھال ءَ دنت گڑا سرجمیں نظام فعال بیت۔ محسن نقوی ءَ ھندی رسانکدر ءِ سر ءَ ھم اے الزام جتگ کہ آ بلوچستان لبریشن آرمی ءِ وڑیں بندش جتگیں گلانی پروپیگنڈا ویڈیواں دیم ءَ برگ ءَ اِنت، بی ایل اے ہائی کوالٹی ءِ ویڈیو جوڑ کنت، اُرش کنت ءُ آ ویڈیو فوراً ھندی چینلانی سر ءَ شنگ بنت بلے کس اے جُست ءَ نہ کنت کہ پرچا چوش اِنت؟ آئی ءَ من اِت کہ پاکستان ءِ سیکورٹی ادارگ وسیلگ آنی کمی ءِ آماچ اَنت ءُ آھانی بجٹ باز براں چہ دعویٰ کنگ ءَ باز کم اِنت، منی واھگ اِنت کہ من وتی سیکورٹی فورسز ءِ سرجمیں لوٹ آناں پیلو بہ کن آں بلے مالی جیڈھ آنی سبب ءَ من لھتیں کسانیں لوٹ آناں ھم پیلو کنگ ءِ وس ءَ نہ آں ۔ تہی کارانی وزیر ءَ گوشت کہ ناشرکار آنی گور ءَ اوگانستان ءَ نوکیں امریکی سلاہ ءُ ٹیکنالوجی مان انت ایشی ءَ چہ طاقت ءِ توازن پریشان بوتگ ءُ پاکستان ءَ را اے جاور ھال ءَ گوں زوت گر ءُ چیل بوھگ ءِ ضلورت انت۔ محسن نقوی ءَ دارالحکومت ءِ تر ءُ تاب کتگ آئی ءَ ملک ءِ واستہ آیوکیں سیکورٹی گامگیج آنی ھم جار جتگ ایشی ءِ تہ ءَ 93 انٹری پوائنٹ آناں مھکم کنگ، اسلام آباد ءِ سمارٹ سیکورٹی سسٹم ءِ گہتری ءُ 6ہزار نوکیں پولیس کارندہ بھرتی کنگ ھوار انت تانکہ فورس ءِ کمی ءَ را پُر کنگ بہ بیت۔ آئی ءَ گوشت کہ کمی آناں ما انشاء اللہ ءَ گیش ءُ گیوار کن ایں ۔ پاکستان ایمن اِنت ءُ ما وتی جنگ ءَ برجاہ داراں، پٹ ءُ پول ءِ دیما روگ ءَ گوں گیش بریفنگ دیگ بیت۔