صدر آصف علی زرداری ءَ ازبکستان ءِ صدر شوکت مرزایف ءَ گوں گند ءُ نند ءِ ساھت ءَ گوشت کہ پاکستان رابطہ، تجارت ءُ مردم آنی نیام ءَ رابطہ آنی پڑ ءَ نزیکیں کمک ءِ وسیلگ ءَ ازبکستان ءِ گوما دو نیمگی سیادی آناں نوکیں بالاد ءَ سر کنگ ءِ واستہ جزم

اسلام آباد۔6فروری  (اے پی پی): صدر آصف علی زرداری ءَ گوشت کہ پاکستان ازبکستان ءِ گوما وتی دوستی ءُ برات ءِ سیادی ءَ را سک باز ارزشت دنت ءُ اے شریکداری ءَ را یک قدرتی ءُ برجمیں سیادی ءِ رنگ ءَ چاریت کہ ایشی ءِ بُن ھشت یکجائی راجدپتر، دود ءُ ربیدگ ءُ روایات ءَ گوں بندوک انت۔ پاکستان رابطہ، تجارت ءُ مردم آنی نیام ءَ رابطہ ءِ شوبگ ءَ نزیکیں کمک ءِ وسیلگ ءَ ازبکستان ءِ گوما دو نیمگی سیادی ءَ را نوکیں بالاد ءَ سر کنگ ءِ واستہ جزم انت۔ صدارت ءِ میڈیا ونگ ءِ رد ءَ صدر ءِ مملکت ءَ اے ھیالانی درشانی جمہوریہ ازبکستان ءِ صدر شوکت مرزایف ءَ گوں جمعہ ءِ روچ ءَ صدارت ءِ تہ ءَ گپ ءُ تران کنان ءَ کت۔ صدر شوکت مرزایف ءَ را وش اتک کنان ءَ صدر آصف علی زرداری ءَ دل یکیمی ءِ درشان کت کہ اے تر ءُ تاب پائدگ مند ءُ آیوکیں وھد ءِ نیمگ ءَ گامگیج ءِ بیت۔ آئی ءَ صدر شوکت میرزایف ءَ را یک رژنائیں رہشونے لیک اِت کہ آئی ءِ سروکی ءَ ازبکستان یک نوکیں ءُ وشھالیں ملک ءِ رنگ ءَ دیم ءَ اتکگ ءُ دمگی ءُ میاں اوستمانی امن ءُ ایمنی ءِ دیمروئی ءِ واستہ آئی ءِ ھزمت آنی ستا کنگ بیت۔ آئی ءَ پاکستان ءُ ازبکستان ءَ را نزیک کنگ ءِ تہ ءَ صدر مرزایف ءِ ذاتی کرد ءَ را ھم شگر ءُ منت درشان کت۔ صدر آصف علی زرداری ءَ گوشت کہ پاکستان ءُ ازبکستان قدرتی شریک اَنت ایشانی آیوکیں باندات یکے دومی ءَ گوں بندوک اَنت۔ دو نیمگی سیادی آنی تہ ءَ جوانیں پیشرفت ءِ سر ءَ دل یکیمی ءِ درشان کنان ءَ آئی ءَ تجارت، رابطہ، دفاع، ایمنی، دود ءُ ربیدگ ءُ ورثہ ءِ شوبگ آنی تہ ءَ کمک ءَ را گیش گیش کنگ ءِ واستہ پاکستان ءِ جزم ءِ سر ءَ زور پر دات۔ صدر ءِ مملکت ءَ دوئیں ملک آنی نیام ءَ براہ راست بالی رابطہ آناں مردم آناں نزیک کنگ ءِ وسیلگ لیک ات ءُ ازبکستان اوگانستان پاکستان ریلوے منصوبگ ءِ وڑیں دمگی رابطہ ءِ گامگیج آنی ارزشت ءِ سر ءَ زور پر دات ءُ رند ءَ چہ رند ءِ چیلنج آنی گیواری ءِ واستہ یکجائی کوشست آنی ضلورت ءِ سر ءَ زور پر دات۔ صدر آصف علی زرداری ءَ گوستگیں سال آنی تہ ءَ دو نیمگی تجارت ءِ تہ ءَ برجاھیں گیشی ءِ سر ءَ چمشانک دیان ءَ گوشت کہ سیادی آنی راستیں اقتصادی گنجائش ءَ را کارمرد کنگ المی اِنت، ایشی ءِ چیر دستی ءَ دوئیں ملک آناں وتی نیام ءَ تجارت ءَ را 2 ارب ڈالر ءَ سر کنگ ءِ ٹارگٹ ایر کتگ۔ آئی ءَ مردم آنی نیام ءَ رابطہ، گپ ءُ تران ءِ دیمروئی ءُ دود ءُ ربیدگ ءِ تبادلہ ءِ ارزشت ءِ ذکر کت کہ اے دوئیں ملک آنی نیام ءَ راجدپتری ءُ روحانی سیادی ءِ درشان انت۔ صدر ءِ مملکت ءَ مالیاتی ادارگ ھاسیں رنگ ءَ بینک آنی نیام ءَ کمک ءُ آسراتی ءِ ضلورت ءِ سر ءَ ھم زور پر دات تانکہ تجارت ءُ سرمایہ کاری ءِ روانی ءَ را کمک کنگ بہ بیت۔ صدر شوکت میرزیویف ءَ گوشت کہ ازبکستان ءَ پاکستان ءِ گوما دوستی ءُ اسٹریٹجک شراکت داری ءَ را گیش مھکم کنگ ءَ سک باز ارزشت دنت۔ آئی ئَ جتا جتائیں تک آنی سر ئَ دو نیمگی ئِ سیادی ئِ برجاھیں دیمروئی، تجارت ئِ دیمروئی، یکجائی منصوبگ آناں گیشی ئُُ ترجیحی اقتصادی شوبگ آنی تہ ئَ کمک ئِ سر ئَ دل یکیمی ئِ درشان کت۔ اے درگت ءَ آئی ءَ وتی سیادی داروکیں وزیر ءَ را ھم ھدایت کتگ کہ آ وتی پاکستانی ھمکار ءِ گوما نزیکیں رابطہ ءَ بہ دار ایت۔ ازبکستان ءِ صدر ءَ سیاسی گپ ءُ تران ءَ را گیش مھکم کنگ، تجارتی، اقتصادی ءُ سرمایہ کاری سیادی آناں دیمروئی دیگ ءُ گیش فعال کاروباری رابطہ آنی وسیلگ ءَ عملی کمک ءَ را گیش کنگ ءِ ضلورت ءِ سر ءَ زور پر دات۔ آئی ءَ صدر آصف علی زرداری ءَ را ازبکستان ءِ سرکاری تر ءُ تاب ءِ دعوت ھم داتگ۔ آئی ءَ اے ھم جار جتگ کہ دوئیں ملک آنی نیام ءَ دو گیشیں براہ راست بالی گراب بندات کنگ بنت کہ ایشی ءَ چہ ھپتگی بالی گراب آنی کساس شش ءَ سر بیت، تانکہ مردم آنی نیام ءَ رابطہ، سیل ءُ سواد ءُ کاروباری کار آناں گیش آسراتی رس ایت۔ گند ءُ نند ءِ ساھت ءَ دوئیں صدر آنی نیام ءَ دمگی جاور آنی بابت ءَ ھم حیال ءُ لیکہ درشان کنگ بوتگ ایشی ءِ تہ ءَ امن ءُ مھکم ءُ ایمنی ءِ ھوالگ ءَ جیڈھ ھم ھوار اَنت۔ دوئیں صدراں اولی رند ءَ یک پہ یک ءَ گند ءُ نند کتگ ات کہ ایشی ءِ تہ ءَ ھاسیں دو نیمگی، دمگی ءُ میاں اوستمانی جیڈھ آنی سر ءَ گپ ءُ تران کنگ بوتگ ات۔ پد ءَ دوئیں ملک آنی ڈل آنی گوما سرجمیں گپ ءُ تران کنگ بوت۔ ڈل ءِ تک ءَ گپ ءُ تران ءَ نائب مزن وزیر ءُ دری کارانی وزیر ایس محمد اسحاق دار، وزیر تجارت جام کمال خان، ریلوے ءِ وفاقی وزیر محمد حنفی عباسی، بنجاھی وزیر بلوچستان سرفراز احمد بگٹی، صنعت ءِ ھاتر ءَ ھاسیں کمکار سلخترالو ہرتاکریمہ ءَ بہر زرتگ۔ مندوی والا، راجی اسمبلی ءِ باسک راجہ پرویز اشرف، پیسریگیں چیئرمین سٹیزن نیار حسن بخاری، ازبکستان ءَ پاکستان ءِ سفیر ءُ دری کارانی سیکرٹری ءِ نام ءَ زانگ بیت۔ ازبکستان ءِ ڈل ءِ تہ ءَ صدر ءِ مشیر عبدالعزیز کاملوف، وزیر دفاع شوخرات خالمحمدوف، وزیر سرمایہ کاری، صنعت و تجارت لذیذ قدرتوف، وزیر ٹرانسپورٹ الخام مخکموف، وزیر معدنیات و جیولوجی بابر اسلاموف، وزیر زراعت ابراہیم عبدالرحمونوف، وزیر ثقافت اوزودبیک نذربیکوف، نائب وزیر خارجہ باخروم علیوف  ھوار اتنت۔   پاکستان ءَ ازبکستان ءِ سفیر علیشر توختائیف ءِ نام ءَ زانگ بیت۔ ایشی ءَ چہ پد یک ھاسیں مراگشے ءِ تہ ءَ صدر آصف علی زرداری ءَ پاکستان ءُ ازبکستان ءِ سیادی ءَ را مھکم کنگ ءِ تہ ءَ جوانیں ازمت آنی پجار ءَ صدر شوکت مرزایف ءَ را نشان پاکستان ءِ داد دات۔ مراگش ءَ مزن وزیر محمد شہباز شریف، وفاقی کابینہ ءِ باسک، چیف آف ایئر اسٹاف ایئر چیف مارشل ظاہر احمد بابر سدھو، درملک ءِ سفارتکار ءُ پارلیمنٹرین آں بہر زرتگ۔ مراگش ءَ پد مزن نامیں مہمان ءِ شرپ ءَ نان ءِ ورگ ءِ ھم برجم دارگ بوت۔