چیئرمین سینیٹ   ءَ ترلائی  ءَ  امام بارگاہ ءِ نزیک ءَ وت کُشیں تراک ءِ مذمت کتگ

اسلام آباد۔6فروری  (اے پی پی): سینیٹ  ءِ چیئرمین سید  یوسف رضا گیلانی ءَ اسلام آباد ءِ ترلائی  ءَ  امام بارگاہ ءِ گٹا ءِ نزیک ءَ وت کُشیں تراک ءِ سک باز مذمت کتگ ءُ اے سانحہ ءِ وئیل ءَ بے گناہ ءُ بے سلاہیں عبادت کنوک آنی شہید بوھگ ءِ سر ءَ سک باز رنج ءُ گم ءِ درشانی کتگ۔ سٹاک سیکرٹریٹ ءِ نیمگ ءَ جاڑی بوتگیں بیان ءِ رد ءَ آئی ءَ تراک ءِ تہ ءَ ٹپیگیں مردمانی گوما دل ءِ جہلانکی ءَ ھمدردی ءُ سرجمیں یکوئی ءِ درشانی کتگ ءُ آوانی زوت ءُ سرجمی ءَ جان سلامتی ءِ دعا کتگ۔ چیئرمین سینیٹ  ءَ گوشت کہ عبادت جاہ آناں نشانگ جوڑ کنگ انسانیت، مذہبی قدر ءُ راجی یکوئی ءِ سر ءَ براہ راست اُرش اِنت کہ ایشی ءَ را ھچ وڑیں جاور ھال ءَ برداشت کنگ نہ بیت۔ آئی ءَ اے گپ ءِ پدرائی کت کہ اے وڑیں بزدل ءُ زالمیں کار راج ءِ دلبڈی  ءُ جزم ءَ نزور نہ کن انت بلکیں اے وڑیں واقعہ راج ءَ را گیش یکجاہ ءُ جزم کن انت۔ سید یوسف رضا گیلانی  ءَ گشتگ کہ ناشرکارانی ہچ وڑیں مذہب، قوم ءُ ملک ءَ گوں سیادی نیست انت۔ اے  مردم  اصل ءَ انسانیت ءِ دژمن اَنت کہ ملک ءِ دیمروئی، وشھالی ءُ امن ءَ لگت مال  کنگ لوٹ اَنت۔ آئی ءَ اے گپ ءِ سر ءَ زور پر دات کہ ناشرکار وتی نا شریں مول ءُ مراد آنی سر ءَ ھچبر سوبمند نہ بنت داں کہ سرجمیں راج ءُ ریاستی ادارگ ناشرکاری ءِ ھلاپ ءَ یکیں تاک ءَ مہ بنت۔ چیئرمین سینیٹ  ءَ گیش گوشت کہ پاکستان ءِ سلاہ بندیں اُرد ءُ کانود ءِ نفاذ ءِ ادارگ ناشرکاری ءِ سرجمیں رنگ ءَ ھلاسی ءِ واستہ جتا جتائیں پڑ آنی تہ ءَ موثر ءُ سوبمندیں آپریشن برجاہ دارگ ءَ اَنت ءُ راج ءَ را وتی سیکورٹی اُرد آنی نیمگ ءَ چہ داتگیں قربانی آنی سر ءَ فخر اِنت۔ سید یوسف رضا گیلانی  ءَ شہیدانی کھول ءِ گوما دلپدردی ءِ درشانی کتگ ءُ گشتگ کہ اے گرانیں وھد ءَ سرجمیں راج شہیدانی کھول ءِ غم ءَ شریک انت۔