پاکستان ءُ ازبکستان ءِ نیام ءَ بدعنوانی ءِ ھلاپ ءَ کمک ءَ را مھکم کنگ ءِ واستہ مفاہمت نامہ ءِ سر ءَ دستخط

اسلام آباد۔6فروری  (اے پی پی): پاکستان ءُ ازبکستان ءِ نیام ءَ کرپشن ءِ حلاف ءَ وتی یکجائی کوشست آناں گیش کنگ ءِ ھاترا مزنیں گامگیج ءِ رنگ ءَ یک مفاہمت نامہ ءِ سر ءَ دستخط کنگ بوتگ۔ ترجمان ءَ گشتگ کہ اے معاہدہ ازبکستان ءِ اینٹی کرپشن ایجنسی ءُ پاکستان ءِ نیشنل اکاؤنٹیبلٹی بیورو ءِ نیام ءَ اسلام آباد ءَ کنگ بوتگ۔ مفاہمت نامہ ءِ دستخط ءِ مراگش اسلام آباد ءَ برجم دارگ بوت ایشی ءِ تہ ءَ دوئیں ملک آنی مزن مزنیں اگدہ دار آنی بھر زوری بوت۔ اے موہ ءِ سر ءَ اے گپ ءِ سر ءَ زور پر دیگ بوت کہ اے معاہدہ دوئیں ملک آنی اقوام متحدہ ءِ کرپشن ءِ ھلاپ ءَ کنونشن ءِ رد ءَ عزم ءُ کرپشن ءِ ھلاپ ءَ جنگ ءِ واستہ یکجائی عزم ءِ عکس اِنت۔ اے معاہدے ءِ سرا نیب ءِ ڈپٹی چیئرمین سہل ناصر ءُ ازبکستان ءِ صدر ءِ درئی کارانی نمائندہ عبدالعزیز کمالمغلو ءَ دستخط کتگ انت۔ مفاہمت نامہ ءَ چہ دوئیں ادارگ آنی نیام ءَ ادارگی رابطہ، وت مہ وتی کمک ءُ صلاحیت سازی ءِ واستہ یک سرجمیں فریم ورک ءِ پجاری کنگ بیت۔ مفاہمت نامہ ءِ کلیدی نکات آنی تہ ءَ کرپشن ءِ نوکیں رھبند ءُ رجحان آنی ھوالگ ءَ زانتکاری ءِ بدلی، تکنیکی کمک، ماہرین ءُ مردمی قوت ءِ بدلی ھوار انت۔ ایشی ءَ ابید فرانزک پٹ ءُ پول، اثاثہ ءِ پٹ ءُ پول، فرانزک انجینئرنگ ءُ منی لانڈرنگ ءِ ھلاپ ءَ گامگیج آنی تہ ءَ ھم کمک کنگ ءِ سر ءَ ھم تپاک کنگ بیت۔ اے معاہدہ ءِ تہا مشاورتی ءُ لس مہلوک ءِ سرپدی ءِ پروگرام آنی دیمروئی ءَ را ہم ھاسیں ارزشت دیگ بوتگ۔ دوئیں ملک آنی اینٹی کرپشن ایجنسی آنی سروک آں مراگش ءَ گوں گشتانک دیان ءَ دل یکیمی ءِ درشان کت کہ اے منوگری ءَ چہ ادارگی سیادی گیش مھکم بنت ءُ احتساب ءِ نظام ءِ کارکردگی گیش بیت۔ ایشی ءَ پد میڈیا ءَ گوں تران کنان ءَ ڈپٹی چیئرمین نب سحلم ناصر ءَ گوشت کہ کرپشن اقتصادی دیمروئی ءُ الس ءِ بھروسہ ءِ دیم ءَ مزنیں اڑاند انت۔ آئی ءَ اے گپ ءِ سر ءَ زور پر دات کہ مالیاتی جرم ءُ ناجائزیں اثاثہ آنی سیم سر ءِ سرا بوھگ ءِ سبب ءَ میاں اوستمانی کمک ناگزیر بوتگ۔ واکدار آنی رد ءَ مفاہمت نامہ ءِ سر ءَ دستخط کنگ پاکستان ءُ ازبکستان ءِ نیام ءَ دو نیمگی سیادی آنی تہ ءَ یک ھاسیں سنگ میل ءِ اِنت ایشی ءَ چہ دوئیں ملک آنی شفافیت، احتساب ءُ جوانیں حکومت داری ءِ دیمروئی ءِ واستہ عزم ءِ درشان اِنت۔