پیرس، پاکستانی سفارت خانہ ٹی یوم یکجہتی کشمیر نا دود، فرانسیسی کمامدارو شاریک، پاکستانی پردیسی تا بھلو کچ اسے ٹی بشخ ہلنگ

پیرس۔ 06 فروری (اے پی پی) فرانس نا دارالحکومت پیرس اٹی پاکستانی سفارت خانہ نا کنڈآن یوم یکجہتی کشمیر نا دود اٹی فرانس اٹی پاکستان نا سفیر ممتاز زہرہ بلوچ ، فرانسیسی شاریک و پاکستانی وکشمیری پردیسی تا بھلو کچ اسے ٹی بشخ ہلکر، داوخت آ کشمیری الس تون مخ تفی و یکجہتی نا درشانی ءِ کننگا۔ دود اٹی صدر مملکت آصف علی زرداری ، وزیراعظم محمد شہباز شریف و نائب وزیراعظم و وزیرخارجہ سینیٹر محمد اسحاق ڈار نا کلہو آتے خوانسا بنفنگا۔ داوخت آ اسہ دستاویزی فلم اس نشان تننگا ہراٹی کشمیر نا جھیڑہ نا بناو غیرکانودی وڑاٹ بھارت نا کوزہ ٹی جموں وکشمیر اٹی بھارتی کوزہ گیر فوج انا برجا ظلم آتے مون آتخنگا۔ ترانکار آک بھارتی کوزہ غان آجوئی نا جہد اٹی بھارت نا غیرکانودی کوزہ ٹی جموں وکشمیر نا مخلوق نا بے مٹ بہادری و قربانی تے خراج تحسین پیش کریر۔ ترانکارآک 5 اگست 2019 نا بھارت نا اسہ کنڈی و غیرکانودی گام گیج آتے کشمیری تا ناقابل تنسیخ حق خودارادیت آ اسہ پین جلہو اس گوندار۔ اوداہیت ءِ مون آتخار کہ بھارت نا غیرکانودی کوزہ ٹی جموں وکشمیر دنیا نا غٹ آن زیات عسکری علاقہ ءِ ہرانارہینگوک آک خوف و دہشت نا چاگڑد اٹی رہینگسا زند ءِ تیر کننگ آ بیوس ءُ۔ اوجہانی برادری آ زور شاغار کہ او کشمیری الس آ کروک آ جور آ بھارت نامحاسبہ ءِ کے۔ داوخت آ سفیر ممتاز زہرہ بلوچ پارے کہ پاکستان نا الس، حکومت، پاکستانی و کشمیری ہرسال یوم یکجہتی کشمیر اڈ ایترہ تانکہ نئے بیرہ بھارت نا غیرکانودی کوزہ ٹی جموں وکشمیر نا مخلوق تون تینا مہرومریبت نا پوسکنی واوفتا حق خودارادیت نا عزم انا درشانی ءِ ہم کننگ مرے۔ اوپارے کہ کشمیر نا مقدمہ سوگوسیاسی، کانودی و اخلاقی بنداوتیا سلوک ءِ و پاکستان کشمیری ایلم  وایڑھ تا انصاف اٹ مسخت نا دوئی کننگ کن اوفتا پورو سیاسی و سفارتی مخ تفی ءِ برجاتخک۔