قومی پولیو تور مہم مچ آ ملک اٹی برجاءِ

اسلام آباد۔ 06 فروری (اے پی پی) برجاسال انا اولیکو قومی پولیو تور مہم مچ آملک اٹی پنچ می دے آ ہم سرسہبی اٹ برجاءِ۔ نیشنل ایمرجنسی آپریشن سینٹر (این ای او سی) نا رداٹ مہم نا اولیکو چاردے اٹی مچ آملک اٹی 4 کروڑ 22 لکھ آن زیات چناتے پولیو آن بچفنگ نا پڑی کُنفنگانے۔ نیشنل ای او سی نا رداٹ پنجاب اٹی 2 کروڑ 24 لکھ آن زیات، سندھ اٹی 95 لکھ 85 ہزار آن زیات، خیبرپختونخواٹی 67 لکھ 64 ہزار آن زیات ، بلوچستان اٹی کم وود 20 لکھ 55 ہزار، اسلام آباد اٹی 4 لکھ 54 ہزار آن زیات، گلگت بلتستان اٹی 2 لکھ 61 ہزار آن زیات وخت اس کہ آزاد کشمیر اٹی 6 لکھ 73ہزار آن زیات چناتے پولیو نا پُڑی کنفنگانے۔ مچ آملک اٹی 4 لکھ آن زیات پولیو ورکرز ہراُراغا ہنسا پنچ سال آن کم وئی چناتے پولیو آن بچفنگ نا پُڑی کنفنگءُ۔ نیشنل ای او سی لمہ وباوہ غاتیان خواست کرینے کہ او پولیو ورکرآتیکن درگہ غاتے ملر و تینا چناتے پولیو نا پُڑی ضرور کنفر۔ نیشنل ای او سی نا رداٹ پولیو ٹیم اتون رابطہ کن ہیلپ لائن 1166 آ کال یا 0346-7776546آ واٹس ایپ کلہو مون تننگ مریک۔ لمہ و باوہ و کمیونٹی آن پولیو ورکرآتون پبی کمکاری نا خواست کننگانے تانکہ پولیو نا پورو چٹفنگ نا ہدف دوئی کننگ مرے۔ نیشنل ای او سی نا رداٹ پولیو مہم پاکستان و اوغانستان اٹی اسہ وخت آ اڈتننگ انگ ءِ۔