پاکستان، سرجمیں دگنیا ءَ کشمیری آں گوں یکوئی ءِ درشان کنگ ءِ ھاترا جلسہ، جلوس، سیمینار ءُ دگہ مراگش برجم دارگ بوتگ

اسلام آباد۔ 5فروری(اے پی پی): پنچ شمبے ءِ روچ ءَ کشمیر یکوئی ءِ روچ ءِ موہ ءَ پاکستان ءَ ھوار سرجمیں دگنیا ئِ پاکستانی مشن ءُ پاکستانی ءُ کشمیری کمیونٹیز ءَ وتی کشمیری برات آنی گوما یکوئی ءِ درشان کنگ ءِ جلسہ، جلوس، سیمینار ءُ اے دگہ مراگش برجم داشتگ اَنت۔ بھارتی انسانی حقانی لگتمالی ءَ را میاں اوستمانی براتی ءِ دیم ءَ دیم ءَ آرگ بوت ءُ اے جزم ءِ پدا زور دیگ بوت کہ پاکستان ہر فورم ءَ کشمیری الس ءَ را اخلاقی، سیاسی ءُُ سفارتی کمک ءَ را برجاہ دار ایت۔ اے روچ ءَ را سرجمیں ملک ءُُ آزاد جموں ءُُ کشمیر ءَ جلسہ، انسانی زنجیر، امن ءِ راہ ءُُ ھاسیں دعا آنی گوما برجم دارگ بوت تانکہ بھارتی ظلم ءُُ زوراکی آنی مذمت کنگ ءُُ کشمیر ءِ جیڈھ ءَ را جھان ءِ تک ءَ پدر کنگ بہ بیت۔ سہب ءِ 10بج ءَ سرجمیں ملک ءَ یک منٹ ءِ ھاموشی برجم دارگ بوت، ایشی ءَ پد کشمیری الس ءِ قربانی آناں خراج تحسین پیش کنگ ءِ واستہ سائرن ءِ توار کنگ بوت۔ سرجمیں ملک ءَ سیمینار، جلوس ءُ میڈیا مہم ءَ ھوار جتا جتائیں مراگش برجم دارگ بوتگ اَنت کہ ایشی ءِ تہ ءَ کشمیری آنی واستہ پاکستان ءِ سیاسی، سفارتی ءُ اخلاقی جہد ءِ سر ءَ زور دیگ بوتگ۔ سیاسی رہشوناں کشمیری آنی حمایت ءِ یک رندے پدا جیڈھ ءِ منصفانہ ءُُ پرامن گیواری ءِ واستہ اقوام متحدہ ءِ قرارداد آنی سر ءَ عمل کنگ ءِ سر ءَ زور پر دات۔ اے موہ ءَ لس مچی، کشمیر ءِ شہیدانی واستہ دعا ءُ مقبوضہ درہ ءَ انسانی حقانی لگتمالی ءِ ھلاپ ءَ زھرشانی ھم کنگ بوت۔ اے درگت ءَ وفاقی دارالحکومت ءَ ھاسیں مراگش ءِ برجم دارگ بوت کہ ایشی ءِ تہ ءَ ھمک تک ءُ پھنات ءِ مردماں مزنیں کساسے ءَ بھر زرت ءُ وتی کشمیری برات ءُ گہار آں گوں یکوئی ءِ درشان کت۔