کشمیر تنازعہ نہ انت بلکیں ایٹمی فلیش پوائنٹ انت، مشال حسین ملک

اسلام آباد ۔ 5فروری (اے پی پی): کشمیر یکوئی ءِ روچ ءِ موہ ءَ دزگیریں ہریات ءِ سروک محمد یاسین ملک ءِ زالبول مشال حسین ملک ءَ ھال داتگ کہ کشمیر ایوک ءَ سیاسی جیڑھ نہ اِنت بلکیں دگنیا ءِ ھترناکیں ایٹمی فلیش پوائنٹ آنی تہ ءَ یکے ۔ پنچ شمبے ءِ روچ ءَ کشمیر یکوئی ءِ روچ ءِ موہ ءَ ویڈیو پیغام ءِ تہ ءَ آئی ءَ میاں اوستمانی براتی ءَ را زور پر دات کہ آ ناجائزیں رنگ ءَ مقبوضہ جموں ءُُ کشمیر ءَ بھارتی حکومت ءِ ناانصافی ءِ کارروائی آنی سر ءَ چپ ءُ چاگرد مہ بنت۔ مشال ملک ءَ گْوشتگ: یاسین ملک اے وھد ءَ مرگ ءِ کوٹی ءَ بند اِنت۔ آئی ءَ الزام جتگ کہ مزن وزیر نریندر مودی ءِ سروکی ءَ بھارتی حکومت آجوئی ءِ تحریک ءِ سرکوب کنگ ءِ کوشست ءَ کشمیری سروکی ءَ را بے توار کنگ ءُُ اعدام کنگ ءِ کوشست ءَ انت۔ آئی ءَ اے گپ ءِ سر ءَ زور پر دات کہ اے جیڈھ ایوک ءَ یک مردمے یا یک ھاندان ءِ تہ ءَ ھوار نہ اِنت بلکیں سرجمیں کشمیری راج ءَ را یکجاھیں رنگ ءَ سزا دیگ ءُُ بے توار کنگ ءِ یک پراھ ءُُ شاھگانیں کوشست ءِ درشان اِنت۔ آئی ءَ گوشت کہ کشمیر ایوک ءَ دمگی جیڈھ نہ انت بلکینگ ءَ دمگی ءُُ جھان ءِ امن ءِ واستہ سنگینیں آسرات آنی گوما ایٹمی فلیش پوائنٹ انت۔ آئی ءَ گیش کرتگ کہ یاسین ملک ءَ را موت ءِ کوٹی ءَ دارگ ءِ برابر اِنت کہ جائزیں ھک ءِ لوٹ کنوکیں مردماں سزا دیگ بہ بیت۔ مشال حسین ملک ءَ گیش گوشت کہ کشمیر ءَ امن ءُ آجوئی ءِ واستہ توار چست کنگ جرم زانگ بیت۔ آئی ءَ جُست کُت کہ آیا امن ءُ آجوئی ءِ ھاترا کشمیری آنی واستہ جرم جوڑ بوتگ؟ آئی ءَ گوشت کہ اے کجام انصاف اِنت کہ وتی حق ءِ لوٹ کنگ ھم جرم زانگ بیت۔ آئی ءَ اپسوز ءِ درشانی کت ءُ گوشت کہ کشمیر ءَ بے ھچ وڑیں احتساب ءَ پدریں رنگ ءَ زوراکی ءُ ریاستی سرکوبی کنگ بوھگ ءَ انت وھدیکہ میاں اوستمانی براتی چپ ءُ چاگرد برجاہ انت۔ دمگی برجائی ءِ واستہ سنگینیں آسر آنی بابت ءَ ھشدار دیان ءَ مشال حسین ملک ءَ گوشت کہ کشمیری اُلس ءِ ناانصافی ءُُ وت واجئی ءِ ھک ءَ چہ انکار کنگ ءِ ساہگ ءَ دائمی امن رسگ نہ بیت۔