پاکستان ءُ قازقستان ءِ بزنس فورم ءِ برجم دارگ بوتگ، آیوکیں دو سال آنی تہ ءَ تجارتی کساس  ءَ را یک ارب ڈالر ءَ سر کنگ ءِ وعدہ کتگ، مزن وزیر ءَ ریل ءُ سڑک ءِ رابطہ ءَ را مھکم کنگ ءِ سر ءَ زور داتگ، دو نیمگی سیادی آناں اسٹریٹجک شریکداری ءِ تہ ءَ بدل کنگ یک ھاسیں سنگ میل ءِ، صدر قاسم جومارت توکایووف

اسلام آباد۔4فروری  (اے پی پی):  وت مہ وتی اقتصادی سیادی ءُ تجارتی کساس  ءَ را نوکیں بالاد ءَ سر کنگ ءِ جزم ءِ درشان کنان ءَ پاکستان ءُ قازقستان ءَ آیوکیں 2سال آنی تہ ءَ تجارتی حجم ءَ را یک ارب ڈالر ءَ سر کنگ ءِ سر ءَ زور پر داتگ ءُ تجارتی ءُ اقتصادی شوبگ آنی تہ ءَ کمک ءَ را گیش کنگ ءِ واستہ 5سالی روڈ میپ ءِ سر ءَ تپاک کتگ۔ مزن وزیر محمد شہباز شریف ءَ میاں اوستمانی ملک آنی سر ءَ زور پر دات کہ آ پاکستانی بندرگاہ آنی وسیلگ ءَ جھان ءِ مارکیٹ آنی تہ ءَ سر بوھگ ءِ موہ آناں کارمرد بہ کن اَنت ءُ ریل ءُ سڑک ءِ رابطہ ءَ را مھکم بہ کن اَنت ءُ گوشت کہ دوئیں ملک آنی نیام ءَ دستخط بوتگیں 37 معاہدہ دو نیمگی کمک ءِ تہ ءَ سنگ میل ثابت بنت۔ دو نیمگی سیادی ءَ را یک ھاسیں سنگ میل ءِ رنگ ءَ جوڑ کنگ ءَ گوشت کہ قازقستان، ترکمانستان، اوگانستان، پاکستان ٹرانسپورٹ راہداری سک باز ارزشت ءِ واھند اِنت، پاکستان ءُ قازقستان دمگی ءُ جھان ءِ رابطہ ءِ ھاسیں وسیلگ اَنت، پاکستان ءَ کاروبار کنگ ءِ واستہ پاکستانی کمپنی آناں جوانیں چاگرد ءِ پجارینگ بیت۔ چار شمبے ءِ روچ ءَ ادا پاکستان ءُ قزاقستان بزنس فورم ءِ برجم دارگ بوت ایشی ءِ تہ ءَ مزن وزیر محمد شہباز شریف ءُ قازقستان ءِ صدر قاسم جومارت توکایووف  ءَ بہر زرت۔ اے فورم ءِ تہا 50 ءَ چہ گیش قازق ءُ 250 پاکستانی کمپنیانی نمائندگاں بہر زرتگ۔ مزن وزیر محمد شہباز شریف ءَ فورم ءَ بہر زوروکیں کاروباری برات آناں وش آتک کنان ءَ گوشت کہ اے دیوان مئے آیوکیں باندات ءِ واستہ سک باز ارزشت ءِ واھند اِنت۔ آئی ءَ گوشت کہ قازقستان ءِ صدر ءِ گوما بامردیں گپ ءُ تران بوتگ، ءُ اے گپ ءِ سر ءَ وشی اِنت کہ دوئیں ملک آنی مزنیں کساس ءَ کاروباری مردم فورم ءَ بھر زوری کنگ ءَ اَنت۔ مزن وزیر ءَ پاکستانی بندرگاہ آناں میاں اوستمانی ریاست آنی واستہ سک باز المی لیک اتگ ءُ گوشت کہ پاکستان وتی بندرگاہ آنی وسیلگ ءَ میاں اوستمانی ریاست آناں تجارت ءِ واستہ نزیک تریں راہ پجاری کت کنت، قازقستان گوادر ءُ کراچی بندرگاہ ءِ وسیلگ ءَ وتی پیداوار آناں برآمد کت کنت۔ آئی ءَ ترکمانستان ءُ اوگانستان ءِ وسیلگ ءَ قازقستان ءِ گوما ریل ءُ سڑک ءِ رابطہ ءَ را مھکم کنگ ءِ واھشت ءِ درشان کت ءُ گوشت کہ ما لوٹاں کہ قازقستان ءِ گوما ریل ءُ سڑک ءِ رابطہ ءَ را گیش مھکم کنگ لوٹ ایت۔ اے منصوبگ گیم چینجر بیت ءُ نہ ایوک ءَ پاکستان ءُ قزاقستان ءِ اقتصادی دیمروئی ءِ تہ ءَ بلکیں دمگ ءِ اقتصادی دیمروئی ءِ تہ ءَ ھم ھاسیں کرد پیلو کنت۔ پاکستان اے منصوبگ ءِ واستہ سرجمی ءَ تیار انت۔ مزن وزیر ءَ 250ملین ڈالر ءِ انوگیں تجارتی کساس ءَ را اصل ٹارگٹ ءَ چہ باز کم لیک اتگ ءُ گوشت کہ اے دوئیں ملک آنی نیام ءَ براتی سیادی ءِ درستیں رنگ ءَ پدر نہ کنت۔ پاکستان ءُ قازقستان ءِ نیام ءَ تجارت ءِ کساس ءَ را گیش کنگ ءِ واستہ بازیں گنجائش است انت۔ آئی ءَ آیوکیں دو سال آنی تہ ءَ تجارتی حجم ءَ را یک ارب ڈالر ءَ سر کنگ ءِ ھاترا دلجم اِنت ءُ اے مول ءُ مراد ءِ سرجم کنگ ءِ ھاترا ھرچ وڑیں گامگیج چست کنت۔ مزن وزیر ءَ قازقستان ءِ تر ءُ تاب ءِ دعوت ءِ سر ءَ صدر کسیم جومارت توکایووف  ءِ منت گپت ءُ گوشت کہ آ اے دعوت ءَ گوں وشی ءَ من ایت ۔ مزن وزیر ءَ گوشت کہ دوئیں ملک آنی نیام ءَ تجارتی ءُ اقتصادی شوبگ آنی تہ ءَ کمک ءَ را گیش کنگ ءِ واستہ 5سالی روڈ میپ ءِ سر ءَ تپاک کنگ بوتگ ءُ اے درگت ءَ احسن اقبال پاکستانی نیمگ ءِ سروکی ءَ کنت وھدیکہ قزاقستان ءِ نائب مزن وزیر کزاکستان ءِ نیمگ ءَ سروکی کنت۔ مزن وزیر ءَ گوشت کہ اے چیلنج ءَ را منگ ءُ دوستی، کاروباری ءُ تجارتی سیادی آناں دیمروئی دیگ ءِ وھد اِنت، دوئیں ملک آنی نیام ءَ دستخط بوتگیں 37مہدگ دو نیمگی کمک ءِ بنیاتی سنگ ءِ رنگ ءَ ثابت بنت۔ مزن وزیر ءَ گوشت کہ اے 23سال ءَ پد کجام ھم قازقستان ءِ صدر ءِ پاکستان ءِ اولی سرکاری تر ءُ تاب اِنت، ایشی ءَ چہ پاکستان ءِ گوں آئی ءِ مزنیں مھر ءِ درشان اِنت، ایشی ءَ چہ پیسر کہ صدر نورسلطان ءَ 2004 ءَ تر ءُ تاب کتگ۔ دیوان ءَ گوں گشتانک دیان ءَ کزاقستان ءِ صدر کسیم جومارت توکایووف  ءَ گوشت کہ کاروباری دیوان ءِ برجم دارگ ءِ واستہ مزن وزیر شہباز شریف ءِ شگر ءُ منت وار آں ۔ دو نیمگی سیادی آناں اسٹریٹجک شراکت داری ءِ تہ ءَ بدل کنگ یک ھاسیں سنگ میل ءِ سر ءَ سر بوتگ۔ دوئیں ملک آں اقتصادی ءُ بیپاری سیادی ءَ را نوکیں کونڈ ءَ سر کنگ ءِ جزم ءِ درشان کت ءُ کشت ءُ کشاری، وانگ ءُ زانگ، آئی ٹی، جان سلامتی ءُ ایندگر شوبگ آنی تہ ءَ کمک کنگ ءِ سر ءَ تپاک کت۔ آؤکیں دو سال آنی تہ ءَ دو نیمگی تجارت ءِ کساس ءَ را یک ارب ڈالر ءَ سر کنگ ءِ ھاترا دلجم اَنت۔ قازقستان ءِ صدر ءَ گوشت کہ بین حکومتی کمیشن ءِ وسیلگ ءَ کاروباری سیادی آناں دیمروئی دیگ بیت۔ قازقستان ءَ کاروبار ءِ واستہ مزنیں ءُ دلکشیں موہ است انت ءُ بازیں پاکستانی کمپنی چہ آہاں پائدگ چست کنگ ءَ انت۔ پاکستان ءِ کمپنی آناں قزاقستان ءَ کاروبار ءِ واستہ سازگاریں چاگرد پجاری کنگ بیت۔ آئی ءَ پاکستان ءُ قازقستان ءَ را دمگی ءُ جھان ءِ رابطہ ءِ ھاسیں وسیلگ لیک اتگ ءُ گوشت کہ دوئیں ملک آنی نیام ءَ کمک دمگ ءِ واستہ وش اتک انت۔ آئی ءَ قزاقستان، ترکمانستان، اوگانستان، پاکستان ٹرانسپورٹ راہداری ءَ را انتہائی المی لیک اتگ ءُ گوشت کہ رسد ءُ کارگو ءِ نوکیں نظام دمگی ءُ جھان ءِ رابطہ ءِ واستہ کمکی بیت۔ آئی ءَ کشت ءِ شوبگ ءَ دوئیں ملک آنی نیام ءَ کمک ءِ مزنیں اوست  ءُ موہ آناں تران  کت ءُ گوشت کہ دوئیں ملک زرعی پیداوار ءُ کشت ءِ پیداوار ءِ تہ ءَ کمک ءَ را گیش کنان ءَ چہ میاں اوستمانی مارکیٹ ءَ وتی بھر ءَ گیش کت کن اَنت۔ آئی ءَ پاکستان ءِ حکومت ءِ نیمگ ءَ ڈیجیٹلائزیشن ءِ ھوالگ ءَ چست کتگیں گامگیج آناں ساڑات ءُ گوشت کہ پاکستان ءِ حکومت ءَ اے ھوالگ ءَ بازیں کار کتگ، قازقستان ھم آرٹیفیشل انٹیلی جنس ءُ ڈیجیٹلائزیشن ءِ شوبگ ءَ دلگوشی دیگ ءَ انت۔ وزیر دلگوشی دیگ ءَ اِنت، قازقستان ءَ یک ہزار ءَ چہ گیش پاکستانی نودربر طب، انجینئرنگ ءُ دگہ پڑاں وانگ ءُ زانگ ءِ ھاتر ءَ دیم ءَ روگ ءَ اَنت۔ آئی ءَ دوئیں ملک آنی یونیورسٹی آنی نیام ءَ کمک ءِ معاہدہ آناں وش اتک کت، قازقستان ءِ صدر ءَ مزن وزیر شہباز شریف ءَ را قازقستان ءِ سرکاری تر ءُ تاب ءِ دعوت ھم دات ءُ آئی ءَ را وتی برات ءُ سنگت گوشت۔ ایشی ءَ چہ پیسر وفاقی وزیر برائے تجارت جام کمال خان ءَ بزنس فورم ءَ گوں گشتانک دیان ءَ یک سال ءِ تہ ءَ پاکستان ءُ قازقستان ءِ نیام ءَ دومی بزنس فورم ءِ برجائی ءَ را وش اتک کت۔ آئی ءَ گوشت کہ قازقستان ءِ معیشت میاں اوستمانی ریاست آنی تہ ءَ گوستگیں سئے سال آنی تہ ءَ مھکم تریں معیشت اِنت۔ دو نیمگی تجارتی کساس ءَ دو رند ءَ گیشی بوتگ، پاکستان ءُ قازقستان ءِ نیام ءَ تجارتی کساس ءَ را گیش کنگ ءِ واستہ بازیں موہ است انت۔ آئی ءَ ٹرانزٹ ٹریڈ ایگریمنٹ ءَ را تجارتی چست ءُ ایر آناں دیمروئی دیگ ءِ واستہ یک ھاسیں سنگ میل ءِ رنگ ءَ گوشت کہ بزنس فورم ءَ 50 ءَ چہ گیش قزاقستان کمپنی ءُ نزیک ءَ 250پاکستانی کمپنی بھر زوری کنگ ءَ اَنت۔ کاروباری فورم ءِ تہا کاروباری شخصیتانی مزنیں کساسے ءِ بہر زورگ وت مہ وتی یکوئی ءِ درشان اِنت۔