پاکستان و قازقستان نا نیام اٹ واپار، زرکاری، توانائی و مصنوعی ذہانت و ڈیجیٹل شونداری تون اوار چندی بشخ آتیٹی کمکاری نا مون آدننگ کن 37 مفاہمتی یات داشت ، معاہدہ غاتیا دستخط، اسیجائی کوشست آتیان اقتصادی و واپاری کمکاری نا ہدف آتے دوئی کینہ، وزیراعظم شہباز شریف

اسلام آباد۔ 04 فروری (اے پی پی) پاکستان و قازقستان نا نیام اٹ واپار، زرکاری، توانائی، تعلیم، جان جوڑی، گوازی، ریلوائی، چاگڑدی بدلی و مصنوعی ذہانت و ڈیجیٹل شونداری تون اوار چندی بشخ آتیٹی کمکاری نا مون آ دننگ کن 37 مفاہمتی یات داشت  ومعاہدہ غاتیا دستخط کننگا، وزیراعظم محمد شہباز شریف پارینے کہ پاکستان و قازقستان نا نیام اٹ واپاری کچ اٹی ودکی نا بھلو وارخواہی اس ارے، اسہ سال اٹی ہڑتوم آکنڈآتا واپار ءِ اسہ ارب ڈالر اسکان دننگ نا ہدف ءِ، اسیجائی کوشست آتیان اقتصادی و واپاری کمکاری نا ہدف آتے دوئی کینہ، چندی بشخ آتیٹی کمکاری نا معاہدہ و مفاہمتی یات داشت ہڑتوم آکنڈآتا تعلقداری تے ودفنگ نا عزم انا ڈیک ءِ۔ سٹریٹجک شریداری نامعاہدہ بھاز اہمیت تخک۔ ہڑتوم آملک آک غزہ بورڈ آف پیس انا ہم باسک ءُ، دعاکینہ کہ غزہ ٹی آخبتی امن وشونہالی برے وخت اس کہ قازقستان نا صدر قاسم جومارت توکایووف پارے کہ پاکستان قازقستان نا پت انا قابل سنگت و سٹریٹجک شریدار ءِ، ہڑتوم آ ملک آتا نیام اٹ واپار و زرگزران تون اوار چندی بشخ آتیٹی کمکاری ءِ مون آ دننگ انگ ءِ، اسہ ارب ڈالر نا واپاری ہدف دوئی کننگ کن اواری اٹ مون آ کانہ، ڈیہہ اٹی امن و سوگوی کن پاکستان نا کوشست سفت نا قابل ءِ، دفاع نا بشخ اٹی ہم پاکستان نا شونداری جہانی کہول آ امنا کننگک، پاکستان تون چندی بشخ آتیٹی کمکاری ءِ ودفنگ کن سنبرینگوک اُن، پاکستانی زرکارآتے کاروبار کن پرکشش وارخواہی فراوان کینہ۔ چارشنبے نادے آ وزیراعظم ہاؤس اٹی پاکستان و قازقستان نا نیام اٹ چندی بشخ آتیٹی کمکاری نا مفاہمتی یات داشت و معاہدہ غاتا دستاویزات آتا ہل و تس انا دود اس اڈہلک۔ دود اٹی وزیراعظم محمد شہباز شریف و قازقستان نا صدر قاسم جومارت وکایووف ہم ساڑی ئس۔ وزیراعظم محمد شہباز شریف و قازقستان نا صدر قاسم جومارت توکایووف پاکستان و قازقستان نا نیام اٹ اسٹریٹجک شریداری نا قیام نا اسیجائی اعلامیہ غاتیا دستخط کریر۔ چندی بشخ آتیٹی کمکاری نامون آدننگ کن جم وڑاٹ 37 مفاہمتی یات داشت و معاہدہ غاتیا دستخط کننگا وخت اس کہ 19 دستاویزات آتا ہل و تس کننگا۔ نائب وزیراعظم و وزیرخارجہ محمد اسحاق ڈار و قازقستان نا نائب وزیراعظم و وزیر قومی زرگزران پیٹرولیم، کانڑ کنی وجیو سائنسز نا بشخ اٹی کمکاری کن مفاہمت نا یات داشت ، وزیر دفاع خواجہ محمد آصف و قازقستان نا وزیر دفاع اقوام متحدہ ٹی امن دستہ غاتا اسیجائی تعیناتی نا مفاہمت نا یات داشت ، وزیر مملکت داخلہ طلال چوہدری و قازقستان نا پراسیکوٹر جنرل بندی تا ہل و تس نا بابت معاہدہ، بنجائی وزیر بحری امور جنید انوار چوہدری و قازقستان نا چیف ایگزیکٹیو آفیسر میری ٹائم نا بشخ اٹی کمکاری کن مفاہمت نا یات داشت ، بنجائی وزیر واپار جام کمال خان و قازقستان نا وزیر واپار ٹرانزٹ ٹریڈ نا معاہدہ، بنجائی وزیر خزانہ محمد اورنگزیب و قازقستان نا نائب وزیراعظم و وزیر قومی زرگزران کسٹمز نا امور اٹی کمکاری نا مفاہمت نا یات داشت، بنجائی وزیر ریلوائی محمد حنیف عباسی و قازقستان نا وزیر ٹرانسپورٹ ریلوائی نا بشخ اٹی مفاہمت نا یات داشت، بنجائی وزیر نیشنل فوڈ سیکورٹی و ریسرچ رانا تنویر حسین و قازقستان نا نائب وزیراعظم و وزیر زرگزران پلانٹ پروٹیکشن اٹی کمکاری نا معاہدہ و ویٹرنری میڈیسن نا بشخ اٹی کمکاری نا معاہدہ، نائب وزیراعظم و وزیرخارجہ محمد اسحاق ڈار و قازقستان نا وزیر سائنس و بڑزکو تعلیم مصنوعی ذہانت و ڈیجیٹل شونداری نا بشخ اٹی کمکاری کن مفاہمت نا یات داشت ، بنجائی وزیر قومی جان جوڑی سید مصطفیٰ کمال و قازقستان نا نائب وزیراعظم و وزیر قومی زرگزران جان جوڑی نا بشخ اٹی کمکاری کن مفاہمت نا یات داشت ، بنجائی وزیر حوالکاری و شینکاری عطاء اللہ تارڑ و قازقستان نا صدر نا ڈائریکٹر جنرل ٹی وی و ریڈیو کمپلیکس ایسوسی ایٹڈ پریس آف پاکستان (اے پی پی) و قازقستان نا سرکاری ریپبلکن ٹی وی نا نیام اٹ خبر آتا ہل و تس نا مفاہمت نا یات داشت، بنجائی وزیر چاگڑدی بدلی ڈاکٹر مصدق ملک و قازقستان نا وزیر ٹرانسپورٹ موسمیاتی بدلی و چاگڑدی رکھ انا بشخ اٹی کمکاری نامفاہمت نا یات داشت، بنجائی وزیر تعلیم ڈاکٹر خالد مقبول صدیقی و قازقستان نا وزیر سائنس و بڑزکو تعلیم وزارت بنجائی تعلیم وکسبی تربیت و الفارابی قازق نیشنل یونیورسٹی نا نیام اٹ کمکاری کن مفاہمت نا یات داشت ، گورنر اسٹیٹ بینک جمیل احمد و قازقستان نا سفیر بینکاری نا بشخ اٹی کمکاری کن مفاہمت نا یات داشت، بنجائی وزیر دودوربیدہ و قومی میرات اورنگزیب خان کھچی و قازقستان نا وزیرسائنس و بڑزکو تعلیم دودو ربیدہ و انسانی ہمدردی نا بنداو آ کمکاری کن ایکشن پلان، ڈائریکٹر جنرل نیشنل لاجسٹک سیل (این ایل سی ) میجر جنرل فرخ شہزاد راؤ و قازقستان نا چیئرمین مینجمنٹ بورڈ نیشنل لاجسٹک سیل وقازقستان نا کزٹی زی ایکسپریس نا نیام اٹ کمکاری کن مفاہمت نا یات داشت ، وزیر مملکت بلال بن ثاقب و قازقستان نا سفیر پاکستان ورچوئل ایسیٹس ریگولیٹری اتھارٹی و قازقستان نا وزارت مصنوعی ذہانت و ڈیجیٹل ڈویلپمنٹ نا نیام اٹ کمکاری کن مفاہمت نا یات داشت و چیئرمین کراچی پوسٹ ٹرسٹ ریئر ایڈمرل شاہد احمد و قازقستان نا وزیر ٹرانسپورٹ معلومداری تا ہل و تس و پروفیشنل ڈویلپمنٹ کن قازقستان نا کمرشل سی پورٹ نا جائنٹ سٹاک اکتاؤ انٹرنیشنل کمپنی و کراچی پورٹ میری ٹائم ایڈمنسٹریشن نا نیام اٹ کمکاری کن مفاہمت نا یات داشت آتا دستاویزآتا تبادلہ کریر۔ داکان بیدس ڈوہ انا توننگ کن کمکاری نامعاہدہ، قازقستان نا سوخان یونیورسٹی و نیشنل یونیورسٹی آف ماڈرن لینگوئجز (نمل) نا نیام اٹ کمکاری نا معاہدہ، پلانٹ پروٹیکشن نا بشخ اٹی کشاری پٹ وپولی کونسل و قازق ریسرچ انسٹی ٹیوٹ نا نیام اٹ کمکاری کن مفاہمت نا یات داشت، پاکستان ٹیلی ویژن و خبرایجنسی آف قازقستان نا نیام اٹ براڈ کاسٹنگ نا بشخ اٹی کمکاری نا اہمیت نا یات داشت، پاکستان نا ایگنائیڈ ٹیکنالوجی فنڈ و قازقستان نا اٹانومس کلسٹر فنڈ انا نیام اٹ کمکاری کن مفاہمت نا یات داشت، نیشنل یونیورسٹی آف سائنس و ٹیکنالوجی پاکستان و قازقستان نا نیشنل ریسرچ ٹیکنیکل یونیورسٹی نا نیام اٹ مفاہمت نا یات داشت، کاٹن ریسرچ نا بابت کمکاری کن مفاہمت نا یات داشت، قازقستان نا آستانہ میڈیکل یونیورسٹی و کنگ ایڈورڈ میڈیکل یونیورسٹی نا نیام اٹ کمکاری کن مفاہمت نا یات داشت، آستانہ میڈیکل یونیورسٹی و یونیورسٹی آف ہیلتھ سائنسز لاہور نا نیام اٹ کمکاری کن مفاہمت نا یات داشت، آستانہ آئی ٹی یونیورسٹی و غلام اسحاق خان انسٹی ٹیوٹ آف ٹیکنالوجی نا نیام اٹ کمکاری کن مفاہمت نا یات داشت ، جہانی اسلامی یونیورسٹی ٹی احمد یسوی ریسرچ سینٹر نا جوڑ کننگ کن مفاہمت نا یات داشت ، قائد اعظم یونیورسٹی ٹی الفارابی سینٹر نا جوڑ کننگ نا بابت مفاہمت نا یات داشت، قازقستان نا فارن پالیسی ریسر چ انسٹی ٹیوٹ و انسٹی ٹیوٹ آف سٹریٹجک سٹڈیز اسلام آباد نا نیام اٹ کمکاری کن مفاہمت نا یات داشت، پاکستان قازقستان سپورٹس سینٹر نا جوڑ کننگ نا بابت مفاہمت نا یات داشت ، پاکستان نا نیشنل اکیڈمی آف پرفارمنگ آرٹ وقازقستان نا وزارت دودوربیدہ و حوالکاری نا نیام اٹ کمکاری کن مفاہمت نا یات داشت و قازق انسٹی ٹیوٹ آف سٹینڈرڈ رائزیشن و میٹارالوجی و پاکستان سٹینڈرڈ اینڈ کوالٹی کنٹرول نا نیام اٹ کمکاری نا معاہدہ غا عملدرآمد کن دستاویز آتیا ہم دستخط کننگا۔ داوخت آ گپ وتران کرسا وزیراعظم محمد شہباز شریف پارے کہ تینا ایلم صدر قاسم جومارت توکایووف و اونا ڈل انا دورہ پاکستان آ خیرمقدم ءِ کینہ، دا دورہ ہڑتوم آ ملک آتا تعلقداری تے پوسکن ءُ جہت اس تننگ کن بھاز اہم ءِ، قازقستان نا صدر اسے نا 23 سال آن پد پاکستان نا دا اولیکو دورہ ءِ، صدر قاسم جومارت توکایووف تون تعمیری و مثبت گپ وتران مس۔ وزیراعظم محمد شہباز شریف پارے کہ طے مروک آ مفاہمتی یات داشت و معاہدہ غاتے عملی دروشم اس تننگ کن سنبرینگوک اُن، معاہدہ غاتا حقیقت نا روپ اس تننگ آن زرگزرانی و دودوربیدہ ئی کمکاری ٹی ودکی مریک، صدر قاسم جومارت توکایووف کن نشان پاکستان نا اعزاز خڑکی تعلقداری تا ڈیک ءِ۔ اوپارے کہ غزہ ٹی امن نا بحالی و پوسکن تفنگ کن بورڈ آف پیس اہم فورم ءِ، پاکستان و قازقستان غزہ بورڈ آف پیس انا ہم باسک ءِ، دعاکینہ کہ غزہ ٹی آخبتی امن مرے و شونہالی برے۔ وزیراعظم محمد شہباز شریف پارے کہ ہڑتوم آ ملک آتا نیام اٹ واپاری کچ اٹی ودکی نا بھاز وارخواہی ءِ، اسہ سال اسے ٹی  ہڑتوم آکنڈآتا واپار ءِ اسہ ارب ڈالر اسکان دننگ نا ہدف ءِ، اسیجائی کوشست آتیان اقتصادی وواپاری کمکاری نا ہدف آتے دوئی کینہ، پاکستان و قازقستان توانائی نا بشخ اٹی ہم کمکاری ءِ پین مون آ دننگ کینہ۔ اوپارے کہ چندی بشخ آتیٹی کمکاری نا معاہدہ ہڑتوم آ کنڈآتا تعلقداری تے ودفنگ نا عزم انا عکاسی ءِ کیک، شریداری ءِ مون آ درسا کمکاری نا پوسکن ءُ کسر پٹنگ نا سنبرینگوک ءِ، ہڑتوم آملک آتا نیام اٹ طے مروک آ معاہدہ ہڑتوم آ کنڈآتاتعلقداری آ دوررس اثرشاغک۔ پاکستان و قازقستان نا نیام اٹ سٹریٹجک شریداری نامعاہدہ بے کچ اہمیت تخک۔ داوخت آ قازقستان نا صدر قاسم جومارت توکایووف پارے کہ پبی بیابخیری و شاندار مہمانداری آ پاکستان نا حکومت و الس نا منت واراُٹ، سنگت ملک پاکستان نا دورہ غا بھاز خوشی ءِ، پاکستان قازقستان نا پت انا قابل سنگت و اسٹریٹجک شریدار ءِ، ہڑتوم آملک اسیجائی قدر و روایت آتا امین ءُ، اسیجائی اعلامیہ و معاہدہ ہڑتوم آ کنڈآتا تعلقداریہ تا بابت اہمیت تخک۔ اوپارے کہ ہڑتوم آملک آتا تعلقداری سوگو کننگ اٹ وزیراعظم محمد شہباز شریف نااہم کڑد انا معترف اُٹ، ڈیہہ اٹی امن و سوگوی کن پاکستان نا کوشست سفت نا قابل ءِ، دفاع نا بشخ اٹی ہم پاکستان نا شونداری ءِ جہانی کہول آ امنا کننگک، وزیراعظم محمد شہباز شریف تون بھاز جوان و تعمیری گپ وتران مس۔ اوپارے کہ ہڑتوم آملک آتا نیام اٹ واپار و زرگزران نا بشخ اٹی کمکاری ءِ مون آ دننگ انگ ءِ، اسہ ارب ڈالر نا واپاری ہدف دوئی کننگ کن اواری اٹ مون آ کانہ، پاکستان تون چندی بشخ آتیٹی کمکاری ءِ ودفنگ کن سنبرینگوک اُن، ٹرانزٹ ٹریڈ، کراچی و گوادر بندرگاہ تا کاریم اٹ اتنگ آہم گپ وتران مس، ہڑتوم آملک آتا نیام اٹ فضائی رابطہ ہم بھاز اہمیت تخک، پاکستان و قازقستان نا نیام اٹ گوازی تا بشخ اٹی کمکاری کن اسپورٹس سینٹر نا جوڑ کننگ بھاز اہم ءُ پیش رفت اسے، دودو ربیدہ نا بشخ اٹی کمکاری آن الس نا کہول آ رابطہ ودک۔ قازقستان نا صدر پارے کہ پیدواری بشخ اٹی پاکستان ءِ پروڈکشن پلانٹ خلنگ نا سلہ خلینہ، اسلامک فنانس اٹی ہم پاکستان نا اہم ءُ ہند اسے، اسلامک فنانسنگ نا بشخ اٹی کمکاری آ ودکی خوانہ، سائنس  ، تعلیم و ایلو بشخ آتیٹی کمکاری ءِ ودفنگ آ امنا کرینن۔ اوپارے کہ نن گپ وتران نا کمک اٹ ویل آتا ایسری آ یخین تخنہ، دادورہ ہڑتوم آملک آتا تعلقداری ٹی پوسکن ءُ بشخ اسے نا بناءِ، قازقستان پاکستانی زرکارآتے کاروبار کننگ کن پرکشش وارخواہی تا فراوانی کن سنبرینگوک ءِ۔ قاسم جومارت توکایووف وزیراعظم شہباز شریف ءِ قازقستان نا دورہ نا سلہ ءِ ہم خلک۔