بنجائی وزیر کانود تون کینیڈا نا ہائی کمشنر نا اوڑدہی ، عدالتی اصلاحات اٹی کمکاری ءِ پین سوگو کننگ آ امنا

اسلام آباد۔ 04 فروری (اے پی پی) بنجائی وزیر کانود و انصاف سینیٹر اعظم نذیر تارڑ تون کینیڈا نا ہائی کمشنر طارق علی خان اوڑدہی کرے ہراٹی عدالتی اصلاحات، کانودی نظام نا گچینی و ادارہ جاتی کمکاری نا مون آ دننگ آ سرجمی اٹ گپ وتران کننگا۔ اوڑدہی ٹی بنجائی جوڈیشنل اکیڈمی ٹی کینیڈین حکومت نا کمک اٹ  برجا عدالتی ہیلکاری پروگرام تیا ہم گپ وتران مس۔ داپروگرام ہائی کمیشن آف کینیڈا و MUSAWIنا شریداری اٹ اڈتننگ انگ ءِ ہرافتا مسخت جج آتا کسبی لائخی تیٹی ودکی، پوسکن آ عدالتی رجحان تیان آگاہی و جہانی کانودی کمکاری ءِ مون آدننگ ءِ۔ بنجائی وزیر کانود پاکستان نا نظامِ انصاف ءِ سوگو کننگ اٹ کینیڈا نا کمکاری نا ستاءِ کرساپارے کہ حکومت نزور محروم تپہ غاتیکن انصاف اسکان رسینگ ءِ پک کننگ کن عملی گام گیج کننگ ءِ۔ اوپارے کہ نیزگار بندی و نوعمر زیرحراست بندغ آتا آسودہی کن اسہ پلائٹ ڈٹ اس درستی راستی کرفنگ انگ ءِ ہرانا بناء اسلام آباد و راولپنڈی آن مریک۔ داوخت آ بنجائی سیکرٹری کانود و انصاف کیس مینجمنٹ سسٹم و پاکستان کوڈ انا کمک اٹ کانود نا ڈیجیٹلائیزیشن نا بابت برجاپیش رفت آن معلومدار کرے۔ اوپارے کہ کانودی مواد آتا ڈیجیٹل دوئی کننگ شفاف، گچین و پوسکن آ نظامِ انصاف نا قیام نا کنڈآ اسہ اہمءُ گام اسے۔ اوڑدہی جوان ءُ چاگڑد اسے ٹی مس ہراٹی ہڑتو م آ فریق آک عدالتی تربیت، کانودی اصلاحات و تین پہ تینی کمکاری ءِ پین ودفنگ نا عزم انا درشانی ءِ کریر۔