پاکستان و قازقستان نا نیام اٹ واپار، زرکاری، توانائی و جان جوڑی تون اوار چندی بشخ آتے ٹی کمکاری نا مون آ دننگ کن 19 مفاہمتی یات داشت و معاہدہ غاتیا دستخط کننگا

اسلام آباد۔ 04 فروری (اے پی پی) پاکستان و قازقستان نا نیام اٹ واپار ، زرکاری، توانائی، تعلیم، گوازی، ریلوائی، مصنوعی ذہانت و ڈیجیٹل شونداری و جان جوڑی تون اوار چندی بشخ آتیٹی کمکاری نا مون آدننگ کن 19 مفاہمتی یات داشت و معاہدہ غاتیا دستخط کننگا، وزیراعظم محمد شہباز شریف پارینے کہ پاکستان و قازقستان نا نیام اٹ واپاری کچ اٹی ودکی نا بھلو وارخواہی اسے، اسہ سال اٹی ہڑتوم آ کنڈآتا واپار ءِ اسہ ارب ڈالر اسکان دننگ نا ہدف ءِ، اسیجائی کوشست آتیان اقتصادی و واپاری کمکاری نا ہدف آتے دوئی کینہ، چندی بشخ آتیٹی کمکاری نامعاہدہ و مفاہمتی یات داشت ہڑتوم آکنڈآتا تعلقداری تے ودفنگ نا عزم انا ڈیک ءِ، سٹریٹجک شریداری نامعاہدہ بے کچ اہمیت تخک، ہڑتوم آملک آک غزہ بورڈ آف پیس نا ہم باسک ءُ، دعاکینہ کہ غزہ ٹی آخبتی امن وشونہالی برے وخت اس کہ قازقستان نا صدر قاسم جومارت توکایووف پارے کہ پاکستان قازقستان نا پت انا قابل سنگت و سٹریٹجک شریدار ءِ، ہڑتوم آ ملک آتا نیام اٹ واپار و زرگزران تون اوار چندی بشخ آتیٹی کمکاری ءِ مون آ دننگ انگ ءِ ، اسہ ارب ڈالر نا واپاری ہدف دوئی کننگ کن اواری اٹ مون آ کانہ، ڈیہہ اٹی امن و سوگوی کن پاکستان نا کوشست سفت نا قابل ءِ ، دفاع نا بشخ اٹی ہم پاکستان نا شونداری جہانی کہول آ امنا کننگک، پاکستان تون چندی بشخ آتیٹی کمکاری ءِ ودفنگ کن سنبرینگوک اُن، پاکستانی زرکارآتے کاروبار کننگ کن پرکشش وارخواہی فراوان کینہ۔ چارشنبے نادے آ وزیراعظم ہاؤس اٹی پاکستان و قازقستان نا نیام اٹ چندی بشخ آتیٹی کمکاری نا مفاہمتی یات داشت و معاہدہ غاتا دستاویز آتا ہل و تس نا دود اس اڈہلک۔ دود اٹی وزیراعظم محمد شہباز شریف و صدر قاسم جومارت توکایووف ئسک ہم ساڑی ئسر۔ میری ٹائم نا بشخ اٹی مفاہمتی یات داشت ، ٹرانزٹ ٹریڈ نا معاہدہ، کسٹمز نا بشخ اٹی کمکاری نا بابت معاہدہ ، ریلوائی نا بشخ اٹی کمکاری نا مفاہمتی یات داشت، پلانٹ پروٹیکشن و ویٹرنری نا بشخ آتیٹی کمکاری، مصنوعی ذہانت و ڈیجیٹل شونداری نا بشخ اٹی کمکاری نامفاہمتی یات داشت، جان جوڑی نا بشخ اٹی کمکاری نامفاہمتی یات داشت، اے پی پی و قازقستان نا سرکاری ٹی وی نا نیام اٹ کمکاری نامعاہدہ ، موسمیاتی بدلی نا بشخ آتیٹی کمکاری نامعاہدہ، بڑزکو تعلیم نا بشخ اٹی مفاہمتی یات داشت، مالیاتی نظم ونسق و بینکاری نا بشخ اٹی مفاہمتی یات داشت، دودوربیدہ نا بشخ اٹی کمکاری نا معاہدہ، لاجسٹک نا بشخ اٹی ہم کمکاری نا معاہدہ، ورچوئل میرات آتا بشخ اٹی کمکاری نامعاہدہ، بندرگاہ تا بشخ اتون اوار چندی بشخ آتیٹی کمکاری نا مون آ دننگ کن 19 مفاہمتی یات داشت و معاہدہ غاتا دستاویز آتا ہل وتس کننگا۔ وزیراعظم محمد شہباز شریف و قازقستان نا صدر قاسم جومارت توکایووف اسیجائی اعلامیہ غا دستخط کریر۔ داوخت آ گپ وتران کرسا وزیراعظم محمد شہباز شریف پارے کہ تینا ایلم صدر قاسم جومارت توکایووف و اونا ڈل انا پاکستان نا دورہ غا خیرمقدم ءِ کینہ ، دا دورہ ہڑتوم آملک آتا تعلقداری تے پوسکن ءُ جہت اس تننگ کن بھاز اہم ءِ۔ قازقستان نا صدر اسے نا 32 سال آن پد پاکستان نا دا اولیکو دورہ ءِ، صدر قاسم جومارت توکایووف تون تعمیری و مثبت گپ وتران مس۔ وزیراعظم محمد شہباز شریف پارے کہ طے مروک آ مفاہمتی یات داشت  ومعاہدہ غاتے عملی دروشم اس تننگ کن سنبرینگوک اُن ، معاہدہ غاتا حقیقت نا روپ اس ہلنگ آن زرگزرانی و دودوربیدہ ئی کمکاری ٹی ودکی مریک، صدر قاسم جومارت توکایووف کن نشان پاکستان نا اعزاز خڑکی تعلقداری تا ڈیک ءِ۔ اوپارے کہ غزہ ٹی امن نا بحالی و پوسکن تفنگ کن بورڈآف پیس اہم ءُ فورم اسے۔ پاکستان و قازقستان غزہ بورڈ آف پیس ناہم باسک ءِ، دعاکینہ کہ غزہ ٹی آخبتی امن مرے و شونہالی برے۔ وزیراعظم محمد شہباز شریف پارے کہ ہڑتوم آملک آتا نیام اٹ واپاری کچ اٹی ودکی نا بھلو وارخواہی اس ارے، اسہ سال اٹی ہڑتوم آ کنڈآتا واپار ءِ اسہ ارب ڈالر اسکان دننگ نا ہدف ءِ، اسیجائی کوشست آتیان اقتصادی و واپاری کمکاری نا ہدف آتے دوئی کینہ، پاکستان و قازقستان توانائی نا بشخ آتیٹی ہم کمکاری ءِ پین مون آ دننگ کیرہ۔ اوپارے کہ چندی بشخ آتیٹی کمکاری نا معاہدہ ہڑتوم آ کنڈآتا تعلقداری تے ودفنگ نا عزم انا عکاسی ءِ کیک، شریداری ءِ مون آ درسا کمکاری نا پوسکن ءُ کسر پٹنگ کن سنبرینگوک اُن، ہڑتوم آملک آتا نیام اٹ طے مروک آمعاہدہ ہڑتوم آ کنڈآتا تعلقداری تیا دوررس اثراس شاغرہ، پاکستان و قازقستان نا نیام اٹ سٹریٹجک شریداری نا معاہدہ بھاز اہمیت تخک۔ داوخت آ قازقستان نا صدر قاسم جومارت توکایووف پارے کہ پبی بیابخیری و شاندار مہمانداری آ پاکستان نا حکومت و الس نا منت وار اُٹ، سنگت ملک پاکستان نا دورہ غا بھاز خوشی ءِ، پاکستان قازقستان نا پت انا قابل سنگت وسٹریٹجک شریدار ءِ،ہڑتوم آ ملک اسیجائی قدر و روایت آتا امین ءُ، اسیجائی اعلامیہ ومعاہدہ ہڑتوم آ کنڈآتا تعلقداری تا بابت اہمیت تخک۔ اوپارے کہ ہڑتوم آملک آتا تعلقداری سوگو کننگ اٹ وزیراعظم محمد شہباز شریف نا اہم کڑد انا معترف اُٹ، ڈیہہ اٹی امن و سوگوی کن پاکستان نا کوشست ستاکڑزک، دفاع نا بشخ اٹی ہم پاکستان نا شونداری جہانی کہول آ امنا کننگک، وزیراعظم محمد شہباز شریف تون بھاز جوان و تعمیری گپ وتران مس۔ اوپارے کہ ہڑتوم آ ملک آتا نیام اٹ واپار و زرگزران نا بشخ آتیٹی کمکاری ءِ مون آدننگ انگ ءِ ، اسہ ار ب ڈالر نا واپاری ہدف دوئی کننگ کن اواری اٹ مون آ کانہ، پاکستان تون چندی بشخ آتیٹی کمکاری ءِ ودفنگ کن سنبرینگوک اُن، ٹرانزٹ ٹریڈ، کراچی و گوادر بندرگاہ تا کاریم اٹ اتنگ آہم گپ وتران مس، ہڑتوم آملک آتا نیام اٹ فضائی رابطہ ہم بھاز اہمیت تخک۔ قازقستان نا صدر پارے کہ پیدواری بشخ اٹی پاکستان ءِ پروڈکشن پلانٹ خلنگ نا سلہ خلینہ، اسلامک فنانس اٹی ہم پاکستان نااہم ءُ ہند اسے، اسلامک فنانسنگ نا بشخ اٹی کمکاری آ ودکی خوانہ، سائنس ، تعلیم و ایلو بشخ آتیٹی کمکاری  ءِ ودفنگ آ امنا کرینن۔ اوپارے کہ نن گپ وتران نا کمک اٹ ویل آتا ایسری آ یخین تخنہ، دادورہ ہڑتوم آملک آتا تعلقداری ٹی پوسکن ءُ بشخ اسے نا بناءِ، قازقستان پاکستانی زرکارآتے کاروبار کننگ کن پرکشش وارخواہی فراوان کننگ کن سنبرینگوک ءِ۔