بنجائی وزیر واپار تون قازق ہم منصب نا اوڑدہی، ہڑتوم آملک آتا نیام اٹ واپار، کنیکٹیوٹی و زرکاری ٹی کمکاری ءِ ودفنگ آ امنا

اسلام آباد۔ 04 فروری (اے پی پی) بنجائی وزیر واپار جام کمال خان تون قازقستان نا واپار و انضمام نا وزیر ارمان شقاقلیف وزارت واپار، اسلام آباد اٹی اوڑدہی کرے۔ اوڑدہی ٹی ہڑتوم آکنڈآتا واپار نا ساڑی حالیت آتاجاچ ءِ ہلنگا و اقتصادی کمکاری، رابطہ و زرکاری ءِ ودفنگ کن پبی ءُ کسر پٹنگے۔ اوڑدہی ٹی پاکستان ونیامی ایشیانا نیام اٹ  رابطہ غاتا چیلنج آتون مون تننگ و ہڑتوم آملک آتا نیام اٹ پورو واپاری گمان تے ملنگ کن عملی ایسری آ گپ وتران کننگا۔ فریق آک داہیت آامنا کریر کہ گچین ریل، سڑک و ملٹی ماڈل کنیکٹوٹی پاکستان و قازقستان واپار ءِ سوگو کننگ وپائیدار ، مریس مدی اقتصادی رابطہ غاتے فعال کننگ کن بنداوی حیثیت تخک۔ قازق وزیر بنداوی پنجر نا بھلا ڈٹ، خاص وڑاٹ ریلوائی و سڑک آتا راہداری تے تیار کننگ نا تزویراتی اہمیت ءِ تالان کرے ہراڑآن کم و ود 5 ارب امریکی ڈالر نا واپار و زرکاری نا بہاؤ ودی مننگ کیک وخت اس کہ روزگار نا وارخواہی ودی مننگ کیک و علاقائی سپلائی چین ءِ سپورٹ کننگ مریک۔ اوقازقستان نا نیامی ایشیاءِ سویلی ایشیا، چین، یورپ و گلوبل ساؤتھ بشمول پاکستان نا بندرگاہ آتون گنڈنگ کن اسہ علاقائی مرکز اس جوڑ مننگ نا وژن آ زور شاغا۔ بنجائی وزیر جام کمال خان علاقائی و جغرافیائی سیاسی چیلنج آتا اعتراف ءِ کرسا ترکمانستان و اوغانستان نا کمک اٹ نیامی ایشیاتون براہ راست رابطہ غاتے ودفنگ اٹ پاکستان نا است خواہی نا درشانی ءِ کرے ۔ اوپارے کہ گچین ٹرانزٹ روٹ آتیان نئے بیرہ پاکستان و قازقستان ءِ فائدہ رسینگک بلکن علاقائی و جہانی واپار نا گیشتر وارخواہی ہم ملنگک ہرافتے ٹی پاکستان نا بندرگاہ تا کمک اٹ افریقی و آسیان منڈی اسکان رسینگ ہم اوار ءِ۔ ہڑتوم آ وزیر آک اولیتی بشخ بشمول کشت وکشار و فوڈ سیکورٹی ، فارماسیوٹیکل، ٹیکسٹائل ، گوازی تا گڑا، سِل انا مصنوعات ، کانڑ کنی و معدنیات، توانائی و بنداوی پنجر نا شونداری ٹی کمکاری آ گپ وتران کریر۔ قازق فریق اسیجائی ڈٹ آتیٹی است خواہی نا درشانی ءِ کرے ، خاص وڑاٹ فوڈ پروسیسنگ ، ایگریکلچر ویلیو چینز و فارماسیوٹیکلز نا بشخ اٹی وخت اس کہ پاکستان قازقستان ءِ پاکستان نا زرکاری نا آسراتی نا فریم ورک نا رداٹ کانڑکنی، معدنیات و کشت وکشار آ تالان صنعت آتیٹی زرکاری نا سلہ خلک۔