بنجائی وزیر آئی ٹی و ٹیلی کام شزا فاطمہ خواجہ اسہ دے ئی سرکاری دورہ غا کویت آ سرمس

اسلام آباد۔ 04 فروری (اے پی پی) بنجائی وزیر آئی ٹی و ٹیلی کام شزافاطمہ خواجہ اسہ دے ئی سرکاری دورہ غا کویٹ آ سرمس ہراڑے او ڈیجیٹل کوآپریشن آرگنائزیشن (ڈی سی او) نا پنچ می جنرل اسمبلی ٹی پاکستان نا نمائندگی و باسک ملک آتا وزیر و جہانی سرکڑدہ غاتون بڑزکو کہولی اوڑدہی ہم کیک۔ شزافاطمہ خواجہ ڈی سی او نا جنرل اسمبلی نا بنائی سیشن آن تران ہم کیک۔ وزیر آئی ٹی ڈی سی او نا تھیمیٹک وزارتی راؤنڈ ٹیبل اٹی بشخ ہلیک ہراڑے باسک ملک آتا وزیر آتون مصنوعی ذہانت، ڈیجیٹل شونداری و اوڑتون وابستہ خطرہ غاتا بارواٹی گپ وتران کننگک۔ داوخت آ اونا جہانی پالیسی ساز آتون ہم اوڑدہی مریک۔ ڈی سی او نا پریذیڈنسی پاکستان ءِ حوالگی نا وخت آ بنجائی وزیر نا تنظیم نا بڑزکو سرکڑدہ غاتون اوڑدہی گمانی وخت اس کہ تنظیم نا سیکرٹری جنرل دیما الیحییٰ تون اوڑدہی ہم شیڈول ءِ۔دورہ ٹی بنجائی وزیر نا سعودی عرب نا وزیر مواصلات و انفارمیشن ٹیکنالوجی ، کینیا نا وزیر انفارمیشن ، کمیونیکیشنز و ڈیجیٹل اکانومی، روانڈا نا وزیر مملکت انوویشن و آئی سی ٹی، آذربائیجان نا نائب وزیر ڈیجیٹل ڈویلپمنٹ و ٹرانسپورٹ و کویت نا وزیر مملکت کمیونیکیشن افیئرز تون ہڑتوم آ کنڈآتا اوڑدہی ہم گمانی ءِ۔ بنجائی وزیر ڈی سی او جنرل اسمبلی نا وخت آ اڈ ہلوک سرکاری دے انا اِرغ و کویت نا میزبانی ٹی مروک آ وزارتی سیشن اٹی ہم بشخ ہلیک ہراڑے جہانی مندوبین و سرکڑدہ غاتون اوڑدہی مریک۔