صوبائی حکومت ورناتے باعزت روزگار نا فراوانی کن عملی گام گیج کننگ ءِ، وزیراعلیٰ بلوچستان میر سرفراز بگٹی

کوئٹہ۔ 04 فروری (اے پی پی) وزیراعلیٰ بلوچستان میر سرفراز بگٹی پارینے کہ صوبائی حکومت ورناتے باعزت روزگار نا فراوانی کن عملی گام گیج کننگ اٹی ءِ۔ راجی رابطہ نا سائٹ ایکس آوزیراعلیٰ پارے کہ ہندا چرجوئی ٹی گریڈ 1 آن گریڈ 15 نا 25 ہزار آن زیات سرکاری آسامی تا اشتہار جاری کننگانے دا گام گیج آتا مسخت صوبہ نا ورناتے میرٹ نا بنداوآ روزگار نا وارخواہی فراوان کننگ و گڈگورننس نا اصول آتے سوگو کننگ ءِ۔ گریڈ 16 و گریڈ 17 نا 4 ہزار خورک آسامی تا سمری ءِ باقاعدہ وڑاٹ بلوچستان پبلک سروس کمیشن ءِ گدریفنگانے تانکہ شفاف، انصاف اٹ و آئینی وڑوڈول نا رداٹ بھرتی تا عمل ءِ پورو کننگ مرے۔ اوپارے کہ ہرا محکمہ غاتیٹی ٹیسٹ و انٹرویو تا ریسہ پورو مسنے ہموڑے زوت آن زوت تعیناتی نا پرمان جاری کننگک تانکہ اومیتدار آتے پین انتظار کروئی تمپ۔ میر سرفراز بگٹی پیدوار کرےایلو محکمہ غاتا خورک آسامی تیا محکمہ فنانس نا وڑآ آن لائن ٹیسٹنگ سسٹم اس درستی راستی کرفنگک ہرانا رداٹ بھرتی تے خالصتاََ میرٹ نا بنداو آ کننگک۔ اوپارے کہ شفاف و میرٹ آ تالان بھرتی ہی گڈ گورننس نا بنداو ءِ و صوبائی حکومت  دا اصول آ ہچ ءُ سمجھوتہ اس کپک۔ وزیراعلیٰ بلوچستان دوٹوک لوز آتیٹی پارینے کہ او تینا قول آ سلوک ءِ و بلوچستان نا مخلوق نا اسہ نوکری اسے ہم سودا کننگ کن ہلنگ پننگک۔ اوپارے کہ حکومت ورناتا آخبت تون کس اسے گوازی کننگ نا موکل تفک و ہراہل اومیتدار ءِ اونا حق میرٹ آ تننگک۔