قازقستان نا صدر قاسم جومارت توکایووف نا وزیراعظم ہاؤس آ بننگ آ جم وجوش اٹ بخیر، گارڈ آف آنرپیش

اسلام آباد۔ 04 فروری (اے پی پی) قازقستان نا صدر قاسم جومارت توکایووف نا وزیراعظم ہاؤس آ بننگ آ اودے جم جوش اٹ بخیرکننگا، وزیراعظم محمد شہباز شریف شرفمند آ مہمان ءِ بخیرکرے۔ ہڑتوم آراہشونک گرم جوشی اٹ جوڑ بڑکریر و اوفتا نیام اٹ جوان ءُ ہیت و گپ مس ۔ چارشنبے نادے آوزیراعظم ہاؤس آ بننگ آ قازقستان نا صدر نا اعزاز اٹی باضابطہ بیابخیری دود اس اڈ ہلک، سلہہ بند فوج انا چاق و چوبند دستہ اودے گارڈ آف آنرپیش کرے۔ قاسم جومارت توکایووف گارڈ آف آنر نا معائنہ ءِ کرے۔ داوخت آ ہڑتوم آ ملک آتا قومی ترانہ ءِ ہم خلنگا۔ قازقستان نا صدر تینا ڈل انا باسک آتا وزیراعظم محمد شہبا ز شریف تون درستی راستی ءِ کرفے وخت ا س کہ وزیراعظم شہباز شریف کابینہ نا باسک آتے قازقستان نا صدر تون درستی راستی کرفے۔ قاسم جومارت توکایووف وزیراعظم ہاؤس نا دنگ اٹی نیال اس ہم خلک۔ قاسم جومارت توکایووف صدر مملکت آصف علی زرداری و وزیراعظم محمد شہباز شریف تون اوڑدہی کیک۔ داکان بیدس او پاکستان قازقستان بزنس فورم آن تران ہم کیک۔ دا دورہ ہڑتوم آملک آتیکن ہڑتوم آ کنڈآتا تعلقداری نا جوان جاچ ءِ ہلنگ، کمکاری نا پوسکن وارخواہی تیا سجفنگ خاص کر واپار، لاجسٹک ، علاقائی رابطہ کاری، السی رابطہ نا مون آ دننگ و علاقائی و جہانی فورم تیا کمکاری ناگمان تے دریافت کننگ نا اہم موقع فراوان کیک۔ قازق صدر نا دورہ پاکستان و قازقستان نا نیام اٹ سوگو مرسا تعلقداری تا عکاسی ءِ کیک، تاریخی دودوربیدہ ئی خڑکی تے گچین عملی کمکاری ٹی بدل کننگ نا تین پہ تینی عزم ءِ تالان کیک و ڈیہہ اٹی امن و شونداری کن ہڑتوم آملک آتا اسیجائی است خواہی نا نمائندگی ءِ کیک۔