بنجائی حکومت مذہبی ہم گرنچی، گچین بیانیہ سازی و نیشنل ایکشن پلان آ سختی اٹ عملدرآمد نا کمک اٹ انتہاپسندی و دہشت گردی نا برخلاف مربوط گام گیج آتا بناءِ کرینے، بنجائی وزیر حوالکاری وشینکاری عطاء اللہ تارڑ

اسلام آباد۔ 03 فروری (اے پی پی) بنجائی وزیر حوالکاری وشینکاری عطاء اللہ تارڑ سینیٹ ءِ پارے کہ بنجائی حکومت مذہبی ہم گرنچی ، گچین بیانیہ سازی و نیشنل ایکشن پلان آسختی اٹ عملدرآمد نا کمک اٹ انتہاپسندی و دہشت گردی نا برخلاف مربوط گام گیج آتا بناءِ کرینے۔ سے شنبے نادے آ دیوان اٹی وقفہ سوج آتیٹی اسہ سوج اسے نا ورندی ٹی اوپارے کہ بیدس مسلکی یا سیاسی امتیاز آن پیغام امن کمیٹی اس جوڑ کننگانے۔ وزیر حوالکاری پارے کہ داکمیٹی ٹی مچ آملک آن غٹ مکتبہ فکر انا عالم دین و چندی مذہب آتا نمائندہ غاک اوار ءُ ہرا انتہاپسندی ، بیدادی و دہشت گردی نا برخلاف گچین ورندی بیانیہ ءِ مون آدننگ کن ملک انا چندی بشخ آتا دورہ ءِ کننگ ءُ۔ اوپارے کہ کمیٹی ٹی مذہبی عالم دین، سینئر سرکاری آفیسر و اقلیتی نمائندہ غاک اوار ءُ۔ کمیٹی نا باسک آتیٹی مولانا عبدالکریم، مفتی رحیم، علامہ عارف وحیدی، پیر نقیب الرحمان، علامہ حسین اکبر، ڈاکٹر راغب نعیمی، مولانا طاہر اشرفی، مولانا طیب پنج پیری، علامہ ضیاء اللہ بخاری، بشپ آزاد مارشل، راجیش کمار ہرداسانی و سردار رمیش سنگھ اروڑائسک اوار ءُ۔ بنجائی وزیر عطاء اللہ تارڑ پارے کہ پرتشدد انتہاپسندی نا برخلاف پت انا قابل بیانیہ اس ٹہیفنگ بنداوی وڑاٹ عالم دین تا زمواری ءِ ولے حکومت وزارتِ حوالکاری ٹی کاؤنٹر وائلنٹ ایکسٹریمزم (سی وی ای) سیل اس ہم جوڑ کرینے۔ اوپارے کہ سی وی ای سیل انا تیارکروک بیانیہ سازی نا رسینگ و اثرات خاص کر ڈیجیٹل پلیٹ فارم آتیا ، جانچنگ نا تھرڈ پارٹی آڈٹ نانظام نافذ کننگانے۔ بنجائی وزیر ایوان ءِ معلومدار کرے کہ اسہ پورو وڑاٹ فعال ڈیجیٹل کمیونیکیشن ڈیپارٹمنٹ مچ آملک اٹی انسداد انتہاپسندی نا بیانیہ نا ترسیل کننگ ءِ۔ ساڑی آ سیاسی رابطہ غاتا حوالہ ءِ ترسا اوپارے کہ خیبرپختونخواہ نا وزیراعلیٰ نا وزیراعظم تون اوڑدہی کننگ اسہ مثبت پیش رفت اسے ہراڑآن بنجائی حکومت و خیبرپختونخوا نا نیام اٹ خاص کر امن و ایمنی و انسداد دہشت گردی نا باندات آتیا ہم گرنچی گچین مریک۔ اوکان پد وزیر مملکت طلال چوہدری ہم سینیٹ ءِ انتہاپسندی نا برخلاف حکومت نا گیشتر حکمت عملی آن معلومدار کرے۔ اوپارے کہ کائینیٹک و نان کائینیٹک ہڑتوم آ گام گیج آتے بیک وخت آ کننگ انگ ءِ۔ اوفتا رداٹ انسداد انتہاپسندی آ ساڑی آ دیوان وزیرحوالکاری نا کماشی ٹی اڈ ہلک وخت اس کہ وزیراعظم نا کماشی ٹی جوڑ پیغام امن کمیٹی جامعہ، مدرسہ، مسیت و راج اناایلو تپہ غاتیا تالان اسہ جوان آگاہی پروگرام اس تیار کرینے۔ طلال چوہدری 14 ٹکی نیشنل ایکشن پلان۔ ٹو (NAP-II)آ پورو پارلیمانی شرہ نا گرج آ زور شاغسا پارینے کہ اصل نیشنل ایکشن پلان آرمی پبلک اسکول سانحہ غان پد مسلم لیگ (ن) نادور اٹی جوڑ کننگاسس و اوکان پد پی ٹی آئی حکومت اٹی غٹ صوبہ غاتا امنائی سلاہ اٹ داٹی نظرثانی کننگا۔ اوپارے کہ انسداد دہشت گردی نا بابت اسہ بڑزکو کہولی رابطہ کمیٹی  اس ہرانا کماشی ءِ وزیراعظم کیک و ہراٹی غٹ وزیراعلاک و سیکورٹی ادارہ غاتا سروک آک اوار مریرہ ، باقاعدگی اٹ پیش رفت نا جاچ ءِ ہلیک وخت اس کہ وزیر داخلہ تُو اٹی اِرا وار دیوان تا کماشی ءِ کیک۔ اومستی پارے کہ اسہ جتا ’’ہارڈننگ آف دی سٹیٹ‘‘ کمیٹی اس ہم غٹ 14 ٹک آتیا عملدرآمد نا چاروکی ءِ کننگ ءِ۔ وزیر مملکت پارے کہ مستین اٹ دہشت گردی نا برخلاف سرسہبی بیرہ ہمووخت آ دوئی مس ہراتم غٹ سیاسی واکدار آک سیکورٹی ادارہ غاتون یکجا مسر و داسہ اسہ وار ولدا انتہاپسندی و دہشت گردی ءِ شکست تننگ کن ہمو سیوت نا گرج ءِ۔ اوپیدوار کرے کہ اگہ ایوان سرجمی اٹ شرہ کن وخت اس جتا کے تو حکومت NAP-IIانا غٹ ٹک آتیا عملدرآمد بشمول بنجائی و صوبائی کارکڑد آ جوان حوال تننگ کن تیار ءِ۔